އަމާރީ ރާޔާ މޯލްޑިވްސް ރިސޯޓު ހުޅުވައިފި

ރ. އަތޮޅުގައި ތަރައްޤީކޮށްފައިވާ އަމާރީ ރާޔާ މޯލްޑިވްސް ރިސޯޓު ހުޅުވައިފިއެވެ.

މި ރިސޯޓް ހުޅުވުމުގެ ރަސްމިއްޔާތުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމްއާއި، ޓޫރިޒަމް މިނިސްޓްރީގެ ސްޓޭޓް މިނިސްޓަރ އަޙްމަދު ޞާލިހްއާއި، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވަނީ ބައިވެރިވެވަޑައިގަންނަވާފައެވެ.

މި ރިސޯޓަކީ ތައިލެންޑްގެ އޮނިކްސް ހޮސްޕިޓަލިޓީ ގުރޫޕުގެ އަމާރީ ބުރޭންޑުގެ ރިސޯޓެކެވެ. މި ރިސޯޓް ތަރައްޤީކޮށްފައިވަނީ ރ. އަތޮޅު ކުޑަކުރަތުގައެވެ. މިރިސޯޓްގައި 187 ވިލާ ހުރެއެވެ. އޭގެތެރޭގައި ބީޗް ފްރޮންޓް ވިލާތަކާއި، އޯވަރ ވޯޓަރ ވިލާތައް ހިމެނެއެވެ.

ތަފާތު އެކި ކަހަލަ ކެއުންތައް ލިބޭ 10 ރެސްޓޯރެންޓާއި، ސްޕާއެއްގެ ޚިދުމަތުގެ އިތުރުން ކިޑްސް ކްލަބެއްވެސް މި ރިސޯޓްގައި ހުރެއެވެ.

ތައިލެންޑްގެ އޮނިކްސް ހޮސްޕިޓަލިޓީ ގުރޫޕުގެ އަމާރީ ބުރޭންޑުގެ ރިސޯޓެއް މިހާރުވެސް ރާއްޖޭގައި އަންނަނީ ހިންގަމުންނެވެ. އެއީ ހުވަދުއަތޮޅު ދެކުނުބުރީ ހަވޮއްޑާގައި ހިންގާއަމާރީ ހަވޮއްޑާ މޯލްޑިވްސް ރިސޯޓެވެ.

އޮނިކްސް ހޮސްޕިޓަލިޓީ ގުރޫޕުން މިހާރުވެސް އަންނަނީ އޭޝިއާ އަދި ޕެސިފިކް ސަރަހައްދުގައި ފަންސާސް އެއް ޕްރޮޕަޓީ އެއް މެނޭޖްކުރަމުންނެވެ. އެގޮތުން މިހާރުވެސް 44 ޕްރޮޕަޓީއެއް ހިންގަމުން އަންނައިރު އެކުންފުނީގެ އަމާޒަކީ 2025ގެ ނިޔަލަށް 54 ޕްރޮޕަޓީ ހިންގުމެވެ.