ރާއްޖޭގައި ރުކުގެ އައު ޖީލެއް އުފެއްދުމަށް 3955 ރުއް އިންދައިފި
-
މި ރުއްތައް އިންދާފައިވަނީ 26 ރަށެއްގައި
-
ރުއް އިންދަން ބޭނުން ރަށްރަށުން އެކަމަށް އެދެވޭނެ
-
އިތުރަށްވެސް ރުއް ގެންނާނެ
ރާއްޖޭގައި ރުކުގެ އައު ޖީލެއް އުފެއްދުމަށްޓަކައި ފެންވަރު ރަނގަޅު ރުކުގެ މުޑުވައް އާލާކުރުމުގެ ޕްރޮގްރާމެއް މި ސަރުކާރުން ވަނީ ފައްޓަވާފައެވެ. މިއީ ރާއްޖޭގެ ރުއްތަކަށް ބަލިތަކެއް ޖެހި ރުކުގެ މަތިވަރު ވަރަށް ބޮޑަށް ދަށްވުމާއެކު ސަރުކާރުން ފެއްޓެވި ޕްރޮގްރާމެކެވެ.
ރުކުގެ އައު ޖީލެއް އުފެއްދުމަށް ރުއް އިންދުމުގެ ޕްރޮގްރާމް ފެއްޓެވީ މިއަހަރުގެ މާރޗް މަހުގެ 5 ވަނަ ދުވަހުއެވެ. އެންމެ ފުރަތަމަ ރުއް އިންދާފައިވަނީ ހދ. ވައިކަރަދޫގައެވެ.
މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އިން ގްރީން ފަންޑުގެ މާލީ އެހީތެރިކަމާއެކު ރާއްޖޭގެ އެކި ރަށްރަށުގައި އިންދުމަށް 4980 ރުއް ވަނީ ގެނެސްފައެވެ. މި ރުއްތަކުގެ ތެރެއިން 3955 ރުއް މިހާރު އިންދާފައިވާކަމަށް އެގްރިކަލްޗަރ މިނިސްޓްރީން ވިދާޅުވެއެވެ. މި ރުއްތައް ރާއްޖޭގެ 26 ރަށެއްގައި ވަނީ އިންދާފައެވެ.
މިނިސްޓްރީން ވިދާޅުވީ، މިހާރު ރުއް އިންދާފައިވަނީ އެކަމަށް އެދުނު ރައްތަކުގެ ތެރެއިން ބިން އޮތް ރަށްރަށުގައި ކަމަށެވެ. އެގްރިކަލްޗަރ މިނިސްޓްރީން ވިދާޅުވީ، ގެނައި ރުއްތަކުގެ ތެރެއިން 785 ރުއް އަދި އިންދަން އެބަހުރިކަމަށެވެ. އެހެންކަމުން ރުއް އިންދަން އެދޭ ރަށްރަށުގައި ޖާގަ އޮތް މިންވަރަކަށް ބަލައި އެ ފުރުޞަތު ދޭނެކަމަށެވެ.
މިހާރު ހުރި ރުއްތައް އިންދާ ނިމުމުން އިތުރު ރުއް އިންދުމަށް ގެނައުމަށް ހަމަޖެހިފައިވާކަމަށް މިނިސްޓްރީން މައުލޫމާތުދެއެވެ.
ރާއްޖޭގައި ރުއް އާލާކުރެއްވުމުގެ ޤައުމީ ޕްރޮގްރާމެއް ފަށާފައި މިވަނީ ރާއްޖޭގެ ރުއްގަހަށް ޖެހޭ ބަލިތައް އިތުރުވެ ކާށްޓާއި ކުރުނބާ ލިބުން ދަތިވުމާ ގުޅިގެންނެވެ.
އެގްރިކަލްޗަރ މިނިސްޓްރީން ލަފާކުރަނީ މިހާރު އިންދާފައިވާ ރުއްތަކުން 2 ނުވަތަ 3 އަހަރުތެރޭ ކުނރުބާ ލިބި، ނަފާ ހޯދަން ފެށޭނެކަމަށެވެ. އެ މިނިސްޓްރީގެ އަމާޒަކީ ރާއްޖޭގެ ހުރިހާ އަތޮޅުތަކެއްގައި ވެސް ރުއްދަނޑުތައް ހެއްދުމެވެ.