7 އަހަރަށްފަހު ޗައިނާގެ ސިޗުއާން އެއަރލައިންގެ ދަތުރުތައް ރާއްޖެއަށް ފަށައިފި
-
މި އެއަރލައިނުން ހަފްތާއަކު 3 ދަތުރު ރާއްޖެއަށް ބާއްވާނެ
-
ޗައިނާގެ 3 އެއަރލައިނަކުން މިހާރު އަންނަނީ ރާއްޖެއަށް ދަތުރުކުރަމުން
-
ޗައިނާ ހިމެނެނީ މިހާރު ރާއްޖެއަށް 3 ވަނައަށް އެންމެ ގިނަ ފަތުރުވެރިން އަންނަ ޤައުމުގެ ގޮތުގައި
ޗައިނާގެ ސިޗުއާން އެއަރލައިންގެ ދަތުރުތައް ރާއްޖެއަށް ފަށައިފިއެވެ.
މިއީ 7 އަހަރުގެ މެދުކެނޑުމަކަށްފަހު މި އެއަރލައިންގެ ދަތުރުތައް ރާއްޖެއަށް ފެށި ފުރަތަމަ ފަހަރެވެ.
މޯލްޑިވްސް އެއަރޕޯޓްސް ކޮންޕެނީ ލިމިޑެޓް، އެމްއޭސީއެލްއިން ވިދާޅުވީ، ސިޗުއާން އެއަރލައިންގެ ދަތުރުތައް ރާއްޖެއަށް ހަފްތާއަކު 3 ދުވަހު އޮންނާނެކަމަށެވެ. މި ދަތުރުތައް އޮންނާނީ ޗައިނާގެ ޗެންގްޑޫ ޓިއަންފޫ އިންޓަނޭޝަނަލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ.
މިއީ ޗައިނާގެ އެންމެ ކާމިޔާބި އެއް އެއަރލައިނެވެ. މި އެއަރލައިންގެ ދަތުރުތައް އިއްޔެ ރާއްޖެއަށް ފެށިއިރު ފުރަތަމަ ފްލައިޓްގައި ރާއްޖެއަށް 186 ފަސިންޖަރުން ވަނީ އައިސްފައެވެ.
މި އެއަރލައިންގެ ދަތުރުތައް ރާއްޖެއަށް ފެށުމާއެކު ޗައިނާއިން ރާއްޖެއަށް ދަތުރުކުރާ އެއަރލައިންތަކުގެ ޢަދަދު 3 އަކަށް ވަނީ އިތުރުވެފައެވެ. އޭގެތެރޭގައި ޗައިނާ ބެއިޖިންގ ކެޕިޓަލް އެއަރލައިނާއި އަދި ޗައިނާ އީސްޓަން އެއަރލައިން ހިމެނެއެވެ.
ޗައިނާ ބެއިޖިންގ ކެޕިޓަލް އެއަރލައިނުން ހަފްތާއަކު ޗާޓަރު ފްލައިޓެއް އަންނަނީ ބާއްވަމުންނެވެ. އަދި ޗައިނާ އީސްޓަން އެއަރލައިނުން ކޮންމެ ހޮނިހިރު ދުވަހަކު އަންނަނީ ޝެޑިއުލް ދަތުރެއް ކުރަމުންނެވެ.
ކޯވިޑް-19 އާއި ގުޅިގެން 3 އަހަރެއްހާ ދުވަސް ވަންދެން ޗައިނާއިން ރާއްޖެއަށް އެއްވެސް ފަތުރުވެރިންނެއް އައިސްފައެއް ނުވެއެވެ. ނަމަވެސް މި އަހަރުގެ ޖަނަވަރީ 18 ވަނަ ދުވަހު އަލުން ވަނީ އެ ޤައުމުން ރާއްޖެއަށް ދަތުރުތައް ފަށާފައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ޗައިނާ މިވަގުތު ހިމެނެނީ ރާއްޖެއަށް 3 ވަނައަށް އެންމެ ގިނައިން ފަތުރުވެރިން އަންނަ ޤައުމުގެ ގޮތުގައެވެ. އެގޮތުން ޖުލައި 30 ގެ ނިޔަލަށް ޗައިނާއިން ރާއްޖެއަށް 91،555 ފަތުރުވެރިން ވަނީ އައިސްފައެވެ.
މިހާރު މުޅި ދުނިޔޭގެ 30 އަށްވުރެ ގިނަ މަންޒިލުން 40 އަށްވުރެ ގިނަ އެއަރލައިނުން އަންނަނީ ރާއްޖެއަށް ދަތުރުކުރަމުންނެވެ.