ދައުލަތަށް ގިނަ ދުވަހު ޚިދުމަތް ކުރުމުގެ އިނާމް މިފްކޯގެ 26 މުވައްޒަފަކަށް

ދައުލަތަށް ގިނަ ދުވަހު ޚިދުމަތް ކުރުމުގެ އިނާމު މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯގެ 26 މުވައްޒަފަކަށް ލިބިއްޖެއެވެ. މިއިނާމު ދެއްވާފައިވަނީ ދައުލަތަށް ޚިދުމަތް ކުރުމުގެ އިނާމް ދެއްވުމަށް ބޭއްްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްއެވެ.

ދައުލަތަށް ޚިދުމަތް ކުރުމުގެ އިނާމަކީ 35 އަހަރަށް ވުރެ ދިގު މުއްދަތަކަށް ދައުލަތަށް ޚިދުމަތް ކޮށްފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމުގައި ގާބިލުކަމާއި އިޚުލާސްތެރިކަމާއެކު ކޮށްފައިވާ ޚިދުމަތްތަކަށާއި އެމުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމަށް 2021 ވަނަ އަހަރުން ފެށިގެން ދެމުން އަންނަ އިނާމެކެވެ. މިއިނާމް މިފްކޯގެ 26 މުވައްޒަފަކަށް ލިބިފައިވާއިރު މިއީ މިހާތަނަށް އެއް މުއައްސަސާއަކުން މިހާ ގިނަ އަދަދެއްގެ މުވައްޒަފުންނަށް އެވޯޑް ލިބުނު ފުރަތަމަ ފަހަރެވެ.

މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްވެސް ވަނީ މިކަން ފާހަގަކުރައްވާފައެވެ. އަދި މި ބޭފުޅުންނަށް ވަކިން ޚާއްސަ ޝުކުރެއް ރައީސް ވަނީ ދަންނަވާފައެވެ.

"މިފަހަރު އިނާމު ލިބިވަޑައިގަންނަވާ ބޭފުޅުންގެ ތެރެއިން، އެއް މުއައްސަސާއެއްގެ 26 ބޭފުޅަކަށް މި އިނާމު ލިބިވަޑައިގަންނަވާކަން އަޅުގަނޑު ޚާއްޞަ ގޮތެއްގައި ފާހަގަކުރަން. އާދެ، އެއީ މިފްކޯގައި ވަރަށް އިޚްލާޞްތެރިކަމާއެކު ޚިދުމަތް ކުރައްވަމުން ގެންދަވާ، ވަރަށް ގިނަ ދުވަސްވީ ބޭފުޅުންކޮޅެއް. ފެލިވަރާއި، ކޫއްޑޫއާއި، ކަނޑުއޮތްގިރީގައި އަދި މިފްކޯގެ ހެޑް އޮފީހުގައި މަސައްކަތް ކުރައްވާ ބޭފުޅުން، އޭގެ ތެރޭގައި ހިމެނިވަޑައިގަންނަވާ." ރައީސް ވިދާޅުވިއެވެ.

ޕީއެސްއެމް ނިއުސްއަށް މައުލޫމާތުދެއްވަމުން އިނާމު ލިބިވަޑައިގެންނެވި ބޭފުޅުންގެ ތެރެއިން 41 އަހަރު މިފްކޯއަށް ޚިދުމަތް ކުރައްވާފައިވާ އަބްދުލް ރަހްމާން ހަސަން ވަނީ މި އިނާމް ލިބުމަކީ އޭނާ މަސައްކަތުގެ ހަޔާތުގައި އަދި މުޅި ދިރިއުޅުމުގައިވެސް ލިބުނު އެންމެ ބޮޑު އުފަލުގެ ގޮތުގައި ސިފަކުރައްވާފައެވެ. މީގެކުރިން މިގޮތަށް މުވައްޒަފުން ކުރާ މަސައްކަތުގެ އަގު ވަޒަންކުރެވިފައި ނެތްނަމަވެސް މި ސަރުކާރުން މުވައްޒަފުންގެ މަސައްކަތް ފާހަގަކޮށް އިނާމް ދެއްވުމަކީ ލިބުނު ވަރަށް ބޮޑު ހިތްހަމަޖެހުމެއްގެ ގޮތުގައި އޭނާ ވަނީ ސިފަކުރައްވާފައެވެ.

“މީގެކުރިން އަޅުގަނޑުމެންގެ މަސައްކަތް ވަޒަންކޮށް މިކަހަލަ އިނާމެއް ލިބިފައެއް ނެތް. ގިނަފަހަރު ދައުލަތުން ދެއްވާ މިކަހަލަ އިނާމްތައް ލިބިފައި ހުންނަނީ މާލޭގައި ތިއްބަވާ ވަކި ލެވެލްއެއްގެ ބޭފުޅުން ކޮޅަކަށް އެކަނި. އާދައިގެ މަސައްކަތެއްގައި އުޅޭ މުވައްޒަފަކަށް މިކަހަލަ އިނާމެއް ލިބުމަކީ ވަރަށް ފެންނަން ނެތްކަމެއް. އަދި މުވައްޒަފުން ދެކެނީ އެއީ އެމީހުންނަށް ވުން ދުރުކަމެއްކަމަށް. އެހެންނަމަވެސް މި ސަރުކާރުން މިކަން ފާހަގަކޮށް ޚާއްސަކޮށް ރައީސުލްޖުމްހޫރިއްޔާ 2021 ވަނަ އަހަރުން ފެށިގެން މި އިނާމް ދެއްވަން ފެށިކަމަކީ އެއީ ސަރުކާރު ކުންފުނިތަކުގައި މަސައްކަތްކުރާ މުވައްޒަފުންނަށް ލިބުނު ވަރަށް ބޮޑު ހިތްހަމަޖެހުމަކާއި އުފަލެއް.” އަބްދުލް ރަހްމާން ހަސަން ވިދާޅުވިއެވެ.

މަސައްކަތުގައި މިހާ ގިނަ ދުވަހު ދެމިހުރުމުގެ އަސްލެއްގެ ގޮތުގައި އަބްދުލް ރަހްމާން ހަސަން ފާހަގަކުރައްވަނީ ދައުލަތަށް ޚިދުމަތެއް ކޮށްދިނުމަށް އޭނާގެ ހިތުގައި އޮންނަ ޝައުގުވެރިކަމެވެ. އަދި މިހާރުގެ ޒުވާނުންނަށް ދޭން ބެނުންވާ މެސެޖަކީ ކޮންމެ ވަޒީފާއަކީވެސް ޝައުގުވެރިކަމާއި އިޚްލާސްތެރިކަމާއިއެކު ކޮށްފިނަމަ ކާމިޔާބު މަސައްކަތެއްކަމަށް އޭނާ ވިދާޅުވިއެވެ.

“ވަޒީފާއަށް ވަންނައިރު އެއީ ކޮންކަހަލަ ވަޒީފާއެއްތޯ ކޮންކަހަލަ މަސައްކަތެއް ބެލުމެއް ނޫނޭ މުހިންމުވަނީކީ. ކޮންމެ މަސައްކަތަކީވެސް ޝައުގުވެރިކަމާއި ތެދުވެރިކަމާއި އިޚްލާސްތެރިކަމާއިއެކު ކޮށްފިނަމަ އެމީހަކު ބޭނުން ހިސާބަކަށް ވަޒީފާގެ ގޮތުން ވާސިލްވެވޭނެ ވަޒީފާއެކޭ.” އަބްދުލް ރަހްމާން ހަސަން ވިދާޅުވިއެވެ.

މި ޖަލްސާގައި އެވޯޑު ލިބުނު މިފްކޯގެ 26 މުވައްޒަފުންގެ ތެރޭގައި ފެލިވަރުގެ އިތުރުން ކޫއްޑޫ އަދި ކަނޑުއޮތްގިރި އާއި މިފްކޯ ހެޑް އޮފީހުގައި މަސައްކަތްކޮށްފައިވާ އަދި މިހާރު ވެސް މަސައްކަތް ކުރަމުން އަންނަ މުވައްޒަފުން ހިމެނެ އެވެ. މީގެތެރޭގައި މިފްކޯގެ މެނޭޖްމަންޓު މަގާމުތައް މިހާރު އަދާކުރަމުން އަން،ނަ މީހުންނާއި، އިންޖިނިއަރުނ،ް ކާޕެންޓަރުނ،ް މެކޭނިކުނ،ް އިލެކްޓްރީޝަނުނ،ް ފޯރމަނުނ،ް ކޭޝިއަރުނ،ް ކޭނަރީގައި މަސައްކަތް ކުރައްވާ މީހުންންނާއި މިފްކޯގެ ބޯޓުތަކުގައި އާއި ސައިޓުތަކުގައި މަސައްކަތްކުރާ މުވައްޒަފުން ހިމެނޭކަމަށް އެ ކުންފުނިން ވަނީ ބުނެފައެވެ.