އެމްއެމްޕީއާރުސީއާއެކު 22 ކުންފުންޏަކުން އިންޑިއާގައި ރޯޑް ޝޯވތަކެއް ބާއްވައިފި
-
މި ރޯޑްޝޯތައް ބާއްވާފައިވަނީ އިންޑިއާގެ 3 ސިޓީއެއްގައި
-
އިންޑިއާއަކީ މިހާރު ރާއްޖެއަށް 2 ވަނައަށް އެންމެ ގިނަ ފަތުރުވެރިން އަންނަ ޤައުމު
-
އިންޑިއާއިން އެކަނިވެސް އަހަރުގެ މިހާތަނަށް 121,046 ފަތުރުވެރިން ޒިޔާރަތްކޮށްފައިވޭ
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރު.ސީން ރާއްޖެ އިޝްތިހާރުކުރުމަށް އިންޑިއާގެ 3 ސިޓީއެއްގައި ރޯޑް ޝޯވތަކެއް ބާއްވައިފިއެވެ. މި ރޯޑްޝޯތައް ބާއްވާފައިވަނީ އިންޑިއާގެ ލަކްނައު، ޖައިޕޫރު އަދި ޗަންދިގަރު ގައެވެ.
މި ސިލްސިލާ ރޯޑް ޝޯވތަކުގެ މައިގަނޑު އަމާޒަކީ އިންޑިއާ މާކެޓުގެ އޮޕަރޭޓަރުންނާއި ޓްރެވަލް އޭޖެންޓުންނާ ވިޔަފާރީގެ ގުޅުންތައް ބަދަހިކުރުމުގެ އިތުރުން، ރާއްޖޭގެ ޓޮޕް ސޯސް މާކެޓްގެ ގޮތުގައި އިންޑިއާ ދެމެހެއްޓުންކަމަށް އެމް.އެމް.ޕީ.އާރު.ސީން ބުނެއެވެ. އަދި އިންޑިއާ މާކެޓަށް ގެންގުޅޭ ސްޓްރެޓެޖީތަކާ އެއްގޮތްވާގޮތުގެ މަތިން، ރާއްޖޭގެ ވަކިވަކި އުފެއްދުންތަކާއި ތަޖުރިބާތައް ކުރިއެރުވުންވެސް މި ސިލްސިލާ ރޯޑް ޝޯވތަކުގެ މަޤްޞަދުތަކުގެ ތެރޭގައި ހިމެނޭކަމަށް އެމް.އެމް.ޕީ.އާރު.ސީން ވަނީ ފާހަގަކޮށްފައެވެ.
ރާއްޖޭގެ ފަތުރުވެރިކަމުގެ ސިނާއަތުގެ މަޝްހޫރު 22 ކުންފުންޏަކުން މި ރޯޑް ޝޯވގައި ބައިވެރިވެ، އެ ކުންފުނިތަކުގެ ތަފާތު އުފެއްދުންތަކާއި ޚިދުމަތްތައް މި ރޯޑްޝޯގައި އިންޑިއާ މާކެޓަށް ވަނީ ހުށައަޅާފައެވެ. މި ކުންފުނިތަކުން މި ހަރަކާތުގައި ބައިވެރިވުމުން ދައްކައިދެނީ އިންޑިއާގެ މާކެޓް ދެމެހެއްޓުމަށް ރާއްޖޭގެ ފަތުރުވެރިކަމުގެ ސިނާއަތުން ބޮޑު އަހައްމިއްޔަތުކަމެއް ދޭކަންކަމަށް އެމް.އެމް.ޕީ.އާރު.ސީން ވަނީ ބުނެފައެވެ.
އެމް.އެމް.ޕީ.އާރު.ސީއިން ވަނީ މި ރޯޑް ޝޯވ ސިލްސިލާގެ ތެރެއިން ރެފަލްތަކެއް ނަގާފައެވެ. އަދި ނަސީބުވެރި ފަރާތްތަކަށް ރާއްޖޭގައި ޗުއްޓީ ހޭދަކުރުމުގެ ފުރުޞަތު ވަނީ ދީފައެވެ. އިންޑިއާއަކީ މިހާރު ރާއްޖެއަށް 2 ވަނައަށް އެންމެ ގިނައިން ފަތުރުވެރިން އަންނަ ޤައުމެވެ. އެގޮތުން އެ ޤައުމުން ރާއްޖެއަށް މިހާތަނަށް 121,046 ފަތުރުވެރިން އައިސްފައިވާކަމަށް ތަފާސްހިސާބުތަކުން ދައްކައެވެ.