ރާއްޖޭގެ ފުރަތަމަ ސްމާޓް ސްޓޯރ އެސްޓީއޯއިން ހުޅުވައިފި

ރާއްޖޭގައި ހުޅުވި ފުރަތަމަ "ސްމާޓް ސްޓޯރ" ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއިން ހުޅުވައިފިއެވެ. މިއީ ކޭޝިއަރެއް އަދި ސޭލްސް މީހެއް ނެތި ވިޔަފާރިކުރެވޭނެ ފިހާރައެކެވެ.

އެސްޓީއޯ ސްމާޓް ސްޓޯރ ހުންނާނީ ހުޅުމާލޭގައި އެސްޓީއޯގެ ފިހާރަ ކުރިން ހުރި ތަނުގައެވެ. މިފިހާރަ ހުޅުވައިދެއްވީ ނައިބު ރައީސް ފައިސަލް ނަސީމްއެވެ.

މި ފިހާރައިގައި ނިއު އެމާޖިންގ 2 ޓެކްނޮލޮޖީއެއް ވަނީ ބޭނުންކޮށްފައެވެ. އެއީ އާޓިފިޝަލް އިންޓަލިޖެންސްގެ ވިޝަންއާއި، އައިއޯޓީ ބޭނުންކޮށްގެން ފިހާރައިގައި ކޭޝިއަރަކު ނެތި ކަސްޓަމަރު ވަދެ ޓްރާންސެކްޝަން ނިންމާފައި ނިކުމެގެންދާ ޕްރޮސެސްއެވެ.

މި ފިހާރައަށް ވަދެ ވިޔަފާރި ކުރެވޭނީ މިކަމަށް ޚާއްސަ އެޕްލިކޭޝަނެއް އަޅައިގެންނެވެ. މިއެޕްލިކޭޝަން، އެޕް ސްޓޯރ އާއި ޕްލޭ ސްޓޯރއިން ޑައުންލޯޑްކުރެވޭނެއެވެ. އަދި ފިހާރައިގެ ބޭރު ބިއްލޫރި ގަނޑުގައިވެސް ވަނީ ވިޔަފާރި ކުރެވޭނެ ގޮތް ދިވެހި ބަހާއި އިނގިރޭސިބަހުން އާންމުންނަށް އިނގޭނެ ގޮތައް ކިޔާދީފައެވެ.

އެޕަށް ވަދެ އެކައުންޓް ސެޓިން ހެދުމުން 3 ރުފިޔާ ކެނޑޭނެއެވެ. އަދި ފުރަތަމަ ކުރާ ވިޔަފާރިއާއިއެކު މި 3 ރުފިޔާ އަނބުރާ ކަސްޓަމަރުންނަށް ލިބޭނެކަމަށް އެސްޓީއޯއިން ބުނެއެވެ.

ފިހާރައަށް ވަދެވޭނީ ފޯނުން ކިއުއާރު ކޯޑު ސްކޭން ކޮށްގެންނެވެ. ކިއުއާރު ކޮންސެޕްޓް ބޭނުންކުރި ނަމަވެސް ފޭޝިއަލް ރިކޮގްނިޝަން ބޭނުންކުރަން ބޭނުންވާ ކަސްޓަމަރުންނަށް އެ ފުރުޞަތުވެސް ވަނީ ފަހިކޮށްދީފައެވެ. ފޭޝިއަލް ރިކޮގްނިޝަން ބޭނުންކުރަން ބޭނުންވާ މީހުން ކިއުއާރު ސްކޭންކުރާކަށް ނުޖެހޭނެއެވެ. ފިހާރައަށް ވަނުމާއެކު ފިހާރައަށް އެއީ ރެޖިސްޓާޑް ކަސްޓަމަރެއްކަން އެނގޭނެއެވެ.

ފިހާރައިން ނިކުންނައިރު ފައިސާ ދައްކާކަށް ނުވަތަ ޓްރާންސްފަރ ކުރާކަށް ނުޖެހޭނެއެވެ. ނިކުންނަ އިރު އެމީހަކު ނެގި މުދަލަކަށް އެޕްލިކޭޝަން މެދުވެރިކޮށް ފައިސާ ކެނޑޭނެއެވެ. އެހެންކަމުން މިފިހާރައަށް ދާއިރު ކޮންމެހެން ވޮލެޓް ގެންދާކަށް ނުޖެހޭނެއެވެ. އަދި ފޭޝިއަލް ރިކޮގްނިޝަން ހަދާފައިވާ ފަރާތްތަކަށް ފޯނު ނެތްނަމަވެސް ވިޔަފާރި ކުރެވޭނެއެވެ.

މި ފިހާރަ ހުޅުވުމުގެ ރަސްމިއްޔާތުގައި ވާހަކަދައްކަވަމުން އެސްޓީއޯގެ މެނޭޖިންގ ޑިރެކްޓަރ އަބްދުﷲ ސައީދު ވިދާޅުވީ، މި ފިހާރަ ހުޅުވުމާއިއެކު ތައާރަފްކުރެވިގެން މިދަނީ ރާއްޖެއަށް މުޅިން އައު ޓެކްނޮލޮޖީއެއްކަމަށެވެ. މި ސަރަހައްދުގައިވެސް މިފަދަ ފިހާރަތައް މަދުވުމުގެ ސަބަބުން މިއީ ރާއްޖެއަށް ލިބިގެންދިޔަ ވަރަށް ބޮޑު ކާމިޔާބީއެއްގެ ގޮތުގައި އޭނާ ފާހަގަކުރެއްވިއެވެ.

"މި ފިހާރަ ހުޅުވުމުގެ އެންމެ ބޮޑު ބޭނުމަކީ މި ތައާރަފްކުރާ ޓެކްނޮލޮޖީގެ ސަބަބުން ރާއްޖޭގެ ވިޔަފާރިވެރިންނަށާއި އަދި އާންމު ރައްޔިތުންނަށް އެތައް ފަސޭހަތަކެއް ލިބިގެންދިއުން. މިތަނުން ތަޖުރިބާ ކުރެވެމުންދާ ޓެކްނޮލޮޖީއަކީ ވިޔަފާރި ކުރައްވާ އެހެން ބޭފުޅުންނަށް އެކި ގޮތްގޮތައް ބޭނުންކުރެވޭނެ ޓެކްނޮލޮޖީއެއްކަމަށް އަޅުގަނޑު ދެކެނީ." ސައީދު ވިދާޅުވިއެވެ.

މި ފިހާރައިގައިވަނީ ރައްކާތެރިކަމުގެ ގިނަ ފިޔަވަޅުތައްވެސް އަޅާފައެވެ. އެގޮތުން ފިހާރައިގައި ހުންނާނީ ކެމެރާ ހަރުކޮށްފައެވެ. ކެމެރާތަކުން ކަސްޓަމަރުންގެ ހަރަކާތްތައް، ފެޓާން އަދި ކަސްޓަމަރު ނަގާ އައިޓަމް ދެނެގަންނާނެއެވެ. އަދި ޝެލްފް ތަކުގައިވެސް ހުންނާނީ ވެއިޓް ސެންސާރސް ހަރުކޮށްފައެވެ. އެހެންކަމުން ކަސްޓަމަރު އައިޓަމްތައް ނަގާ ޢަދަދު ސިސްޓަމަށް އިނގޭނެއެވެ.

ވިޔަފާރިކުރާ މީހާގެ ކާޑުގެ މަޢުލޫމާތު އެޕްލިކޭޝަނަށް ހުންނާނީ ސޭވްވެފައެވެ. އެހެންކަމުން ބޭނުންވާ ޕްރޮޑަކްޓެއް ހިފައިގެން ނިކުންނަތާ މަދުވެގެން 10 ނުވަތަ 15 ސިކުންތުގެ ތެރޭގައި ފައިސާ ރަސީދު ލިބޭނެއެވެ.

އެސްޓީއޯއިން ބުނީ ފިހާރައިގައި ހުރިހާ ޕްރޮޑަކްޓެއްގައިވެސް އަގު ފެންނަގޮތައް ޖަހާފައި ހުންނާނެ ކަމަށެވެ. މުދަލެއް ނަގައި އެ ބޭނުންކުރުމަށްފަހު އަލުން ޝެލްފަށް ލައިފިނަމަ އެއަށް ފައިސާ ކަނޑާނެއެވެ. ނަމަވެސް މުދަލެއް ނަގައި އެ މުދާ ފިހާރައިން ނިކުތުމުގެ ކުރިން ބަހައްޓައިފިނަމަ އެއަކަށް ފައިސާއެއް ނުކަނޑާނެއެވެ.

ކޮންޕިއުޓަރ ވިޝަންއިން %99 އެކިއުރޭޓްވީ ނަމަވެސް %1 ޕްރޮޑަކްޓް މިސްރީޑް ވުމުގެ ފުރުޞަތު އޮތުމާއިއެކު އެޙާލަތުގައި އެޕް މެދުވެރިކޮށް ރިފަންޑް ކުރުމުގެ ފުރުޞަތު ނުވަތަ ސަޕޯޓަރ ކޮންޓެކްޓް ކުރުމުގެ ފުރުޞަތު ކަސްޓަމަރުންނަށް ލިބިގެންދާނެ ކަމަށް އެސްޓީއޯއިން ބުނެއެވެ.