ކެންސަރު ދެނެގަތުމަށް ހަދާ ޕެޓް ސްކޭން އޭޑީކޭއިިން ތައާރަފުކޮށްފި

ކެންސަރު ދެނެގަތުމަށް ހަދާ ޕެޓް ސްކޭންގެ ޚިދުމަތް އޭޑީކޭ ހޮސްޕިޓަލުން ރާއްޖޭގައި އަލަށް ތައާރަފްކޮށް މިއަދު އެޚިދުމަތް ދޭން ފަށައިފިއެވެ.

ޕެޓް ސްކޭނަކީ ކެންސަރު ދެނެގަތުމުގެ އިތުރުން، ހަށިގަނޑަށް އެ ބަލި ފެތުރުފައި ހުރި މިންވަރު ބެލޭނެ ސްކޭނެކެވެ. އަދި ހިތާއި ސިކުނޑީގެ ބަލިތައް ދެނެގަތުމުގައި ވެސް ޕެޓް ސީޓީ ސްކޭން ބޭނުންކުރެވޭނެއެވެ.

މި ޚިދުމަތް ދިނުމަށް ހާއްސަކޮށްގެން އޭޑީކޭއިން ވަނީ ޚާއްސަ ޑިޕާޓްމެންޓެއް ގާއިމް ކޮށްފައެވެ. މިޑިޕާޓްމަންޓްގައި އެކަމަށް ބޭނުންކުރާ ބޭހާއި އެހެނިހެން ތަކެތި ގެންގުޅޭނެ ނިޒާމެއް ވެސް ވަނީ ގާއިމްކޮށްފައެވެ.

ޕެޓް ސްކޭންގެ ޚިދުމަތް ތައާރަފްކުރުމަށްފަހު އޭޑީކޭގައި ނޫސްވެރިންނަށް މައުލޫމާތު ދެއްވަމުން އެ ހޮސްޕިޓަލުގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ އޭޑީކޭ ހޮސްޕިޓަލުން ރާއްޖޭގެ ސިއްހީ ޚިދުމަތް ކުރިއެރުވުމަށް ކުރާ މަސައްކަތް ފުޅާކޮށް އާ ޚިދުމަތްތައް ގާއިމްކޮށް އައު ވަސީލައްތައް ގެނެސް މި ޒަމާނާ އެއްގޮތައް ސިއްހީ ނިޒާމް ބައްޓަން ކުރުމަކީ ޚާއްސަ އިސްކަމެއް ދޭ ކަމަށެވެ. އެގޮތުން މިތައާރަފް ކުރެވުނު ޚިދުމަތާއެކު ރާއްޖެއިން ބޭރަށް ޕެޓް ސްކޭން ހެދުމަށް ދާންޖެހޭ ދިއުން ނިމުމަކަށް އަންނާނެ ކަމަށް ގަބޫލު ކުރައްވާ ކަމަށް އަފްއާލް ވިދާޅުވިއެވެ.

ޕެޓް ސްކޭން ޚިދުމަތް ފެށުމަށް ގިނަ ގޮންޖެހުންތައް ކުރިމަތިވިކަން ފާހަގަކުރައްވާ އަފްއާލް ވިދާޅުވީ މިޚިދުމަތް ފެށުމައް ރާއްޖޭގައި އާ ގައިޑްލައިންތައް ހަދަން ޖެހުނުކަމަށެވެ. އެއީ ޚާއްސަ ގޮތެއްގައި ނިއުކްލިޔާ އިންޖެކްޝަނެއް އެތެރެކުރަން ޖެހުމާއި އެ ބޭހަކީ ގިނަދުވަހު ރައްކާކޮށްފައި ނުބެހެއްޓޭ އެއްޗަކަށްވުން ކަމަށެވެ. މިޚިދުމަތް ދޭން ބޭނުންވާ ބޭހާއި އެހެނިހެން ސާމާނު އެތެރެކުރަނީ އިންޑިއާއިން ކަމަށް އަފްއާލް ވިދާޅުވިއެވެ.

"މިކަން ހަމައެކަނި ރާއްޖޭގައި ހަމަޖެހުމަކުން ވެސް ނުފުދޭ. އަޅުގަނޑުމެން އެބަ ޖެހޭ ރާއްޖެއިން ބޭރުން އިމްޕޯޓުކުރާ ފަރާތްތަކުން ވެސް އެކިއެކި ހުއްދަތައް ނަގަން. އެގޮތުން އަޅުގަނޑުމެންގެ މަސައްކަތްތައް ބައްޓަން ކޮށްފައި ވަނީ އިންޑިއާގައި އެކަން ކުރާ ގޮތަށް،" އަފްއާލް ވިދާޅުވިއެވެ.

މިޚިދުމަތާ ގުޅޭގޮތުން ވާހަކަ ދައްކަވަމުން އޭޑީކޭގެ ޗީފް މެޑިކަލް އޮފިސަރު އަދި ކުޑަކުދިންގެ ޚާއްސަ ޑޮކްޓަރު ޑރ. އަބްދުﷲ ނިޔާފް ވިދާޅުވީ މައިގަނޑު ގޮތެއްގައި އެންމެ ފުޅާ ދާއިރާއެއްގައި މި ޓެސްޓު ހަދަނީ ކެންސަރު ދެނެގަތުން އަދި ކެންސަރު ފެތުރިފައި ހުރި މިންވަރު ދެނެގަތުމަށާއި ފަރުވާ އަކަށް ފަހު ކެންސަރު ނައްތާލުމަށް ކުރި މަސައްކަތް ކާމިޔާބު ވެފައި ހުރިތޯ ބެލުމަށް ކަމަށެއެވެ.

ނިޔާފް ވިދާޅުވީ މިޚިދުމަތް ހަމަ އެކަނި ދެވޭނީ ކެންސަރު ބައްޔަށް ނޫންކަމަށެއެވެ. މިޚިދުމަތަކީ ބައެއް ކަހަލަ ނާރުގެ ބަލިތަކަށާއި ހަކުރު ބަލި ފަދަ ބަލިތައް ބެލުމަށް ވެސް ހެދޭނެ ޓެސްޓެއް ކަމަށް ނިޔާފް ވިދާޅުވިއެވެ.

ނިޔާފް ވިދާޅުވީ ބަލިމީހާއަށް ނިއުކްލިއާ ޓްރޭސާ މެޓީރިއަލް ދޭނެ މިންގަނޑު ކަނޑައަޅާނީ ސިއްހީ ކަންތައްތަކަށް ބެލުމަށް ފަހު ކަމަށެވެ. އަދި ޕެޓް ސްކޭން ޚިދުމަތް ހޯދަން ބޭނުންވާ ފަރާތްތަކުން އެޕޮއިންޓުމެންޓް ހެދުމުން ކަނޑައެޅޭ ވަކި ދުވަހެއްގައި ނިޔުކްލިއާ ފިޒިޝަނަކަށް ދައްކަން ޖެހޭނެ ކަމަށެވެ.

ޕެޓް ސްކޭންގެ ޚިދުމަތަށް މިވަގުތު ނަގަން ނިންމާފައިވަނީ 7،500ރ. އާއި 8،500ރ. އާ ދެމެދުގެ އަގެކެވެ. ނަމަވެސް އާސަންދަ އާއި އެންސްޕާ މެދުވެރިކޮށް އެއަގު ކުޑަ ކުރެވޭނެ ގޮތެއް ހޯދުމަށް މަޝްވަރާ ކުރަމުންދާ ކަމަށް އޭޑީކޭއިން ހާމަކުރެއެވެ.