ފާއިޒްގެ "ޖާރނީ" އާއެކު ރާއްޖޭގެ ހިތްގައިމު ތާރީޚާއި ސަޤާފަތް އެއްތާކުން ބަލާލުމުގެ ފުރުޞަތު

މަޝްޙޫރު ދިވެހި ކުރެހުންތެރިޔާ ޢަބްދުﷲ ފާއިޒްގެ ކުރެހުންތަކުގެ ސޯލޯ އެގްޒިބިޝަން، "ޖަރނީ" ހުޅުވައިފިއެވެ. ނޭޝެނަލް އާޓް ގެލެރީގައި ބޭއްވި ޙަފްލާއެއްގައި މި އެގްޒިބިޝަން ހުޅުވައިދެއްވީ ކުރިން ދައުލަތުގެ އެކި ވުޒާރާތަކުގެ ވަޒީރުކަން ކުރައްވާފައިވާ އަޙުމަދު މުޖުތަބާއެވެ.

މި މައުރަޒަކީ ރާއްޖޭގައި ފާހަގަކޮށްލެވޭ މަޝްހޫރު ކުރެހުންތެރިއެއް ކަމަށްވާ މަނާގެ ޢަބްދުﷲ ފާއިޒްގެ ހިތްގައިމު ކުރެހުންތަކެއް ހިމެނޭ މައުރަޒެކެވެ. ފާއިޒްއަކީ ދިވެހި ތާރީޚާއި ސަޤާފަތް ހިމެނޭގޮތަށް ކުރެހުންތައް އުފެއްދުމަށް ކުޅަދާނަ ބޭފުޅެކެއެވެ. އަދި ކުރެހުންތަކުގައި ބޭނުންކޮށްފައިވާ މައިގަނޑު މީޑިއަމްއަކީ އޮއިލް ކުލައެވެ. ފާއިޒްގެ މި ކުރެހުންތަކަކީ ދުނިޔޭގެ ފާހަގަކޮށްލެވޭ ކުރެހުންތެރިންގެވެސް މަޤުބޫލުކަން ހޯދާފައިވާ ސްޓައިލެއް ކަމަށްވާ އިންޕްރެޝަނިޒަމްއެވެ.

މި މައުރަޒުގައި ޑިސްޕްލޭކޮށްފައިވާ ހުރިހާ ކުރެހުމަކީވެސް ފައިޒްގެ އަމިއްލަ އަތުން ކުރަހާފައިވާ ކުރެހުންތަކެއެވެ. އަދި މީގައި ހިމެނޭ ގިނަ ކުރެހުންތަކަކީ ކަޅާއި ހުދުގެ ފޮޓޯތަކުން ފެންނަން ހުރި ރާއްޖޭގެ ތާރީޚާއި ސަޤާފަތް ދައްކުވައިދޭ ފާއިޒްގެ އަމިއްލަ ވަންތަގޮތަށް ކުރަހާފައިވާ ކުރެހުންތަކެއެވެ.

މި މައުރަޒާއެކު ރާއްޖޭގެ ތާރީޚާއި ސަޤާފަތާއި ގުޅުންހުރި ތަފާތު ގިނަ ކުރެހުންތަކެއް އެއްތަނަކުން ބަލާލުމުގެ ފުރުޞަތު އާއްމުންނަށް ލިބިގެންދާނެއެވެ. އެގޮތުން މި މައުރަޒުގައި 80 އާއި 100 އާއި ދެމެދުގެ ކުރެހުން ވަނީ ޑިސްޕްލޭ ކުރެވިފައެވެ. މި ކުރެހުންތައް ޑިސްޕްލޭކޮށްފައިވަނީ ދުނިޔޭގައިވެސް އާރޓް ގެލެރީތަކުގައި އަދި މައުރަޒުތަކުގައި ކުރެހުންތައް ޑިސްޕްލޭކޮށްފައިވާ ފެންވަރަށެއެވެ.

މި މައުރަޒު ވެގެންދާނީ ފަންނުވެރިކަމާއި އުފެއްދުންތެރިކަމަށް ލޯބި ކުރާ ފަރާތްތަކަށް ބަލާލަން ވަރަށް ހިތްގައިމު މައުރަޒަކަށް ކަމަށް ފާއިޒް ބުންޏެވެ. އަދި މިއީ ސުކޫލް ކުދިންނާއި ކުރެހުމުގެ ފަންނު ދަސްކުރަން ބޭނުންވާ ފަރާތްތަކަށްވެސް ވަރަށް ޝައުގުވެރިވާނެ މައުރަޒަކަށް ވެގެންދާނެކަމަށް އޭނާ ބުންޏެވެ.

މި މައުރަޒު މި މަހުގެ 28 ހަމައަށް ނޭޝަނަލް އާރޓް ގެލެރީގައި ކުރިއަށްދާނެއެވެ. އަދި މިއުރަޒު ބަލާލުމުގެ ފުރުޞަތު މިހާރު ވަނީ އާންމުންނަށް ހުޅުވާލާފައެވެ. މި މައުރަޒު ހުޅުވާފައި ހުންނާނީ ހެނދުނު 10:00 އިން ފެށިގެން ރޭގަނޑު 10:00 އަށެއެވެ. އަދި ހުކުރު ދުވަހު މެންދުރު ފަހު 16:00 އިން ފެށިގެން ރޭގަނޑު 11:00 އަށެއެވެ.

"ޖާރނީ" މި މައުރަޒު ހުޅުވުމުގެ ޙަފްލާގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނާއި، ހެރިޓޭޖް މިނިސްޓްރީއާއި އެން.ސީ.އޭގެ އިސްވެރިންނާއި، ރާއްޖެއަށް ބައެއް ޤައުމުތަކުން ކަނޑައަޅުއްވާފައިވާ ސަފީރުން އަދި ދިވެހި ކުރެހުންތެރިން ބައިވެރިވެވަޑައިގަތެވެ.