މިއަހަރުގެ ބޯޓިން އެވޯޑް 33 ގިންތިއަކުން ކުރިމަތިލާން ހުޅުވާލައިފި

މިއަހަރުގެ މޯލްޑިވްސް ބޯޓިން އެވޯޑަށް ކުރިމަތިލުމުގެ ފުރުޞަތު ހުޅުވާލައިފިއެވެ. މި އެވޯޑް ދެމުން އަންނަނީ ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްއިންނެވެ.

މޯލްޑިވްސް ބޯޓިންގ އެވޯޑަކީ، ފަތުރުވެރިކަމުގެ ސިނާޢަތުގައި ހަރަކާތްތެރިވާ ސަފާރީތަކަށް ޚާއްސަ ކޮށްދެވޭ އެވޯޑެކެވެ. އެވޯޑް ދިނުމުގެ މަޤްސަދަކީ އެފަރާތްތަކުން ކުރާ މަސައްކަތްތަކުގެ އަގުވަޒަންކުރުންކަމަށް ނޭޝަނަލް ބޯޓިން އެސޯސިއޭޝަނުން ބުނެއެވެ.

މިއަހަރުގެ ބޯޓިން އެވޯޑަށް ކުރިމަތިލުމުގެ ފުރުޞަތު ހުޅުވާލާފައިވަނީ މިމަހުގެ 10ވަނަ ދުވަހުއެވެ. އަދި އެވޯޑަށް ކުރިމަތިލުމުގެ ފުރުޞަތު އޯގަސްޓް މަހުގެ 10 ވަނަ ދުވަހުގެ ނިޔަލަށް އޮންނާނެއެވެ. ބޯޓިން އެސޯސިއޭޝަނުން ބުނީ އެވޯޑް ހަފްލާ އޮންނާނީ ޑިސެމްބަރ މަހުގެ ތެރޭގައި ކަމަށެވެ.

މިއަހަރުގެ ބޯޓިން އެވޯޑް 33 ގިންތިއަކުން ހުޅުވާލައިގެން ދިނުމަށް ހަމަޖެހިފައިވާކަމަށް ބޯޓިން އެސޯސިއޭޝަނުން ބުނެއެވެ. މީގެތެރޭގައި ލިވަރބޯޑްތަކާއި ސަފާރީތަކަށްދޭ އެވޯޑްގެ އިތުރުން މި ދާއިރާގައި މަސައްކަތްކުރާ ފަރާތްތަކަށްދޭ އެވޯޑްވެސް ހިމެނެއެވެ. އެގޮތުން ކެޕްޓަން، ޝެފް، ކްރޫ މެންބަރ، އިންޖީނިއަރ، ކްރޫޒް މެނޭޖަރ، އޮޕަރޭޝަން ސްޓާފް ފަދަ އެވޯޑް ހިމެނެއެވެ.

ނޭޝަނަލް ބޯޓިން އެސޯސިއޭޝަނުން އިންތިޒާމްކޮށްގެން ބާއްވާ މި އެވޯޑަކީ 2016 ވަނަ އަހަރުން ފެށިގެން ދެމުންއަންނަ އެވޯޑެކެވެ.