މިދިޔަމަހު އެމްޕީއެލްއިން ދުވާލެއްގެ މައްޗަށް 147 ކޮންޓެއިނަރ ކްލިއަރކުރި!
-
ޖޫންމަހު ދުވާލެއްގެ މައްޗަށް 147 ކޮންޓެއިނަރ ވަނީ ކްލިއަރކޮށްފައި
-
މިއީ މެއި މަހާއި އަޅަބަލާއިރު %14 ދަށް އަދަދެއް.
-
މީގެތެރޭގައި 20 ފޫޓު އަދި 40 ފޫޓުގެ ކޮންޓެއިނަރ ހިމެނޭ.
މޯލްޑިވްސް ޕޯރޓްސް ލިމިޑެޓް، އެމްޕީއެލްއިން މިދިޔަ ޖޫން މަހުގެ ތެރޭގައި 4400 ކޮންޓެއިނަރގެ މުދާ ކްލިއަރކޮށްފައިވާކަމަށް އެ ކުންފުނީގެ ތަފާސްހިސާބުތަކުން ދައްކައިފިއެވެ.
އެމްޕީއެލްގެ ތަފާސްހިސާބުތައް ދައްކާގޮތުން މިދިޔަ ޖޫންމަހުގެ ތެރޭގައި ދުވާލެއްގެ މައްޗަށް 147 ކޮންޓެއިނަރ ވަނީ ކްލިއަރކޮށްފައެވެ. މިއީ މެއި މަހާއި އަޅަބަލާއިރު %14 ދަށް ޢަދަދެކެވެ. މެއި މަހު އެވްރެޖްކޮށް ދުވާލެއްގެ މައްޗަށް 170 ކޮންޓެއިނަރ ކްލިއަރ ކޮށްފައިވާކަމަށް އެމްޕީއެލްގެ ތަފާސް ހިސާބުތަކުން ދައްކައެވެ.
އެމްޕީއެލްއިން ބުނީ ޖޫން މަހުގެ ތެރޭގައި އެ ކުންފުނިން 4400 ކޮންޓެއިނަރ ކްލިއަރކޮށްފައިވާއިރު މީގެތެރޭގައި 20 ފޫޓުގެ 2680 ކޮންޓެއިނަރއާއި، 40 ފޫޓުގެ 1780 ކޮންޓެއިނަރ ހިމެނޭކަމަށެވެ.
ނިމުނު ޖޫން މަހުގެ ތެރޭގައި މާލެ ވިޔަފާރި ބަނދަރަށް ކޮންޓެއިނަރ އުފުލާ 16 ބޯޓު އައިސްފައިވާއިރު އެހެނިހެން މުދާ އުފުލާ 17 ބޯޓު އައިސްފައިވާކަމަށް އެމްޕީއެލްގެ ތަފާސްހިސާބުތަކުން ދައްކައެވެ.
އެމްޕީއެލްގެ ބުނީ މާލެ ވިޔަފާރި ބަނދަރަށް ކްލިއަރކުރި ކާބޯތަކެތީގެ ބާވަތްތަކަށް ބަލާއިރު އެންމެ ގިނައިން ކްލިއަރކޮށްފައިވަނީ ދޮންކެޔޮ، ކަރާ، ބަރަބޯ، ޓޮމާޓޯ، ފިޔާ، އަލުވި އަދި ބިސް ކަމަށެވެ. މިތަކެތި ރާއްޖެ ގެނެސްފައިވާ އަދަދަށް ބަލާއިރު 8938 ޓަނުގެ ދޮންކެޔޮ، 20554 ޓަނުގެ ކަރާ، 2409 ޓަނުގެ ބަރަބޯ، 12457 ޓަނުގެ ޓޮމާޓޯ އަދި 54681 ކޭސް ބިސް ރާއްޖެ ގެނެސްފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.