ވަގުތުން ޕޭމަންޓް ހަދާލެވޭ އައިޕީއެސް، އަންނަމަހު ބޭނުންކުރަން ފަށަނީ

ރައްކާތެރި އަދި އަވަސް މާލީ މުއާމަލާތްތަކެއް ހިންގުމަށް ތަރައްޤީކޮށްފައިވާ އިންސްޓަންޓް ޕޭމަންޓް ސިސްޓަމް އަންނަމަހު ބޭނުންކުރަން ފަށާނެކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ގަވަރުނަރު އަލީ ހާޝިމް ވިދާޅުވެއްޖެއެވެ.

އެމްއެމްއޭގެ ގަވަރުނަރު އަލީ ހާޝިމް މިހެން ވިދާޅުވީ އިންސްޓަންޓް ޕޭމަންޓް ސިސްޓަމް، އައިޕީއެސްގައި ބައިވެރިވާ 3 ބެންކަކާއެކު އެމްއެމްއޭއިން އެކަމާއި ގުޅޭ އެއްބަސްވުމުގައި ސޮއިކުރެއްވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އިންސްޓަންޓް ޕޭމަންޓް ސިސްޓަމް، އައިޕީއެސްއަކީ \ބެންކު އެކައުންޓް މެދުވެރިކޮށް އެހެން ބެންކެއެްގެ އެކައުންޓްތަކަށްވެސް ވަގުތުން ފައިސާ ފޮނުވޭނެ ފަސޭހަ ޒަމާނީ ޚިދުމަތެކެވެ.

ފަސޭހަ، އަވަސް، އަދި ރައްކާތެރި ޕޭމަންޓް ޚިދުމަތެއް ޤާއިމްކުުރުމުގެ ގޮތުން ބޭނުންކުރަން ފަށާ އިންސްޓަންޓް ޕޭމަންޓް ސިސްޓަމް، އައިޕީއެސްގައި ފުރަތަމަ ބައިވެރި 3 ބެންކަކީ ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް އަދި ސްޓޭޓް ބޭންކް އޮފް އިންޑިޔާއެވެ.

ބެންކުތަކާއެކު މިިކަމާއި ގުޅޭ އެއްބަސްވުމުގައި ސޮއިކުރެއްވުމަށް ބޭއްވި ރަސްމިއްޔާތުގައި އެމްއެމްްއޭގެ ގަވަރުނަރު އަލީ ހާޝިމް ވިދާޅުވީ އައިޕީއެސް ބޭނުންކުރަން ފެށިގެން މިދަނީ އެމްއެމްއޭއާއި ބޭންކުތަކުން ގުޅިގެން ކުރި މަސައްކަތުންކަމަށެވެ. މިވަގުތު 3 ބޭންކަކާއިއެކު އެމްއެމްއޭއިން ސޮއިކުރިނަމަވެސް މުސްތަޤްބަލުގައި އިތުރު ބޭންކުތައްވެސް މި ސިސްޓަމް ބޭނުންކުރަން ފަށާނެކަމަށް މަރުކަޒީ ބޭންކުގެ ގަވަރުނަރު ވިދާޅުވިއެވެ.

ގަވަރުނަރު ވިދާޅުވީ އެމްއެމްއޭގެ އަމާޒަކީ އަންނަމަހު މި ސިސްޓަމް ރަސްމީކޮށް ބޭނުންކުރަން ފެށުންކަމަށެވެ.

"މިއަދު އަޅުގަނޑުމެންނާއިއެކު 3 ބޭންކެއް މި ސޮއިކުރީ. ޕައިލެޓް ޓެސްޓިން ފޭސިންއެއް މިހާރު އަޅުގަނޑުމެން މި ކުރިއަށްގެންދަނީ. އޮގަސްޓްގައި އަޅުގަނޑުމެން މި ސިސްޓަމް ފުލީ ލޯންޗްކުރާއިރު އެހެން ބޭންކުތައްވެސް އަޅުގަނޑުމެންނާއި ޖޮއިން ކުރާނެ.” ހާޝިމް ވިދާޅުވިއެވެ.

ބެންކުތަކާއެކު އެމްއެމްއޭއިން ސޮއިކުރި އެއްބަސްވުމަކީ މިސިސްޓަމްގައި ބައިވެރިވުމުގެ ސަބަބުން ލިބިދޭ ހައްޤުތަކާއި އުފުލަންޖެހޭ އިލްތިޒާމްތަކާއި ގުޅޭގޮތުން ޤާއިމްކުރި އެއްބަސްވުމެއްކަަމަށެވެ،

އެމްއެމްއޭއިން ބުނީ އަޖުމަ ބެލުމަށް ފުރަތަމަ ކުރިއަށްގެންދާ މަސައްކަތްތަކަށްފަހު އަވަސް މުސްތަޤްބަލެއްގައި، ބޭންކްތަކާއިއެކު އައިޕީއެސްގެ ޚިދުމަތްތައް އާންމުންނަށް ތަޢާރަފްކުރުމަށްޓަކައި ވާންޖެހޭ އެންމެފަހުގެ ތައްޔާރީތައްވެސް ފަށާނެކަމަށެވެ.

ޤައުމީ ޕޭމަންޓް ސިސްޓަމެއް ޤާއިމު ކުރުމުގެ މައިގަނޑު މަޤުސަދަކީ ރާއްޖޭގެ ކޮންމެ ރަށެއްގައި ދިރިއުޅޭ ނުވަތަ ކޮންމެ ބޭންކެއްގައި އެކައުންޓް ހުޅުވާފައިވާ ކޮންމެ ރައްޔިތަކަށްވެސް މި ސިސްޓަމް މެދުވެރިކޮށް ވަގުތުން ފައިސާ ފޮނުވައި، ލިބިގަތުމުގެ މަގު ފަހިކޮށްދިނުންކަމަށް އެމްއެމްއޭއިން ބުނެއެވެ.

މި ސިސްޓަމް ވުޖޫދަށް އައުމާއެކު ރާއްޖޭގެ ޕޭމަންޓް ސިނާއަތަށް އިންގިލާބީ ބަދަލުތަކެއް އަންނާނެ ކަމަށާއި އަދި ތަފާތު ޒަމާނީ އަދި ޑިޖިޓަލް ޕޭމަންޓު ޚިދުމަތްތައް ތައާރަފުކުރުމަށް ފުރުސަތު ހުޅުވިގެންދާނެކަމަށް އެމްއެމްއޭއިން ހާމަކުރެއެވެ.

މި ސިސްޓަމަކީ މާލީ ނިޒާމާއި ބީރައްޓެހި ފަރާތްތަކަށާއި، ބޭންކް އެކައުންޓެއް ނެތް ފަރާތްތަކާއި، އަދި ރާއްޖޭގެ ކޮންމެ ބޭންކެއްގައި އެކައުންޓް ހުޅުވާފައިވީނަމަވެސް، މި ސިސްޓަމް މެދުވެރިކޮށް ހިނގާ ކޮންމެ މުއާމަލާތެއްގެ ފަސޭހަތައް އެއްހަމައެއްގައި ލިބިދިނުމަށް މަގު ފަހިވާގޮތަށް ފަރުމާކޮށްފައިިވާ ސިސްޓަމެކެވެ.

އެމްއެމްއޭއިން ބުނީ އައިޕީއެސް ތައާރަފްކުރާ ފުރަތަމަ މަރުހަލާގައި އިސްކަން ދެނީ އެެތެރޭގެ މާލީ މުއާމަލާތްތަކަށެވެ. ނަމަވެސް، ދެވަނަ ފިޔަވަހީގައި އެހެން ގައުމުތަކުގެ ނެޝަނަލް ޕޭމަންޓު ސިސްޓަމްތަކާއި ގުޅި، ބޭރު ގައުމުތަކާއެކު ވަގުތުން ފައިސާގެ މުއާމަލާތްތައް ހިންގުމުގެ މަގު ފަހިވެގެންދާނެކަމަށްވެސް އެމްއެމްއޭއިން ވިދާޅުވެއެވެ.