މަގުމަތި ސާފުކޮށް ބެލެހެއްޓުމަކީވެސް އަޅުކަމެއް، ވަރަށް ބޮޑު ޒީނަތެއް: ޚުޠުބާ

މަގުމަތި ސާފުކޮށް ބެލެހެއްޓުމަކީވެސް އަޅުކަމެއްކަމަށާއި، އެއީ ވަރަށް ބޮޑު ޒީނަތެއްކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ. މިއަދުގެ ހުކުރު ޚުޠުބާގައި ވަނީ މުސްލިމުންގެ ޢާންމު ދިރިއުޅުމުގައާއި، ކުރާ ކޮންމެ ކަމެއްގައި ސާފުތާހިރުކަމަށް އިސްކަންދިނުމަށް އިސްލާމްދީން ބާރުއަޅަކަން ހަނދާންކޮށްދެއްވާފައެވެ.

މިއަދުގެ ހުކުރު ޚުޠުބާ ޚާއްޞަކޮށްފައިވަނީ "އިސްލާމްދީނަކީ ސާފްތާހިރުކަމުގެ ދީން" މި މަޢުޟޫއަށެވެ. ރާއްޖޭގެ އެކި ކަންކޮޅުތަކުގައި މިއަދު ދެއްވި ހުކުރު ޚުޠުބާގައި ވަނީ، މުސްލިމުންގެ އާންމު ހާލަތްތަކުގަޔާއި، އަމިއްލަ ދިރިއުޅުމުގަޔާއި، އަޅުކަން އަދާކުރުމުގަޔާއި، ވެށި ބެލެހެއްޓުމުގައި ސާފުތާހިރުކަމަށް އިސްލާމްދީން ބާރުއަޅަކަން ހަނދާންކޮށްދެއްވާފައެވެ. ސާފުތާހިރުކަމުގެ މުހިންމުކަން ފާހަގަކުރައްވާ ޚުޠުބާގައި ވިދާޅުވީ އިސްލާމް ދީނުގައި ވަރަށް މަތިވެރި އަސާސްތަކެއް ކަނޑައަޅުއްވާފައިވާކަމަށެވެ. އޭގެ ތެރޭގައި އިންސާނާގެ މުޅި ދިރިއުޅުމަށް ބޭނުންވާނެ ހަމަތަކާއި އުސޫލުތައް ހިމެނިގެން ވާކަމަށާއި، އޭގެ ތެރެއިން އެންމެ ފާހަގަކޮށްލެވޭ އެއް ސިފައަކީ އިސްލާމް ދީނުގައި ލައްވާފައިވާ ސާފުތާހިރުކަންކަމަށް ވިދާޅުވިއެވެ.

ހުކުރު ޚުޠުބާގައި ވިދާޅުވީ ކޮންމެ މުސްލުމަކުވެސް އަދާ ކުރަންޖެހޭ އަޅުކަން ސައްޙަވަނީ ދެ ހަދަސުން ޠާހިރުވެ ސާފުތާހިރުކަންމަތީ ހުރެ ސާފުތާހިރު ތަނެއްގައި ހުރެ އަޅުކަން އަދާ ކުރުމުންކަމަށެވެ. ނަމާދު ކުރުމާއި، ޠަވާފް ކުރުމަށް ނަޖިހުން ޠާހިރުވުމާއި، ހިނައިގަތުން ފަދަ ކަންކަމީ އިސްލާމް ދީނިގައި ޝަރުޢުކުރައްވާފައިވާ ކަންކަމައެވެ. އެގޮތުން ސާފްތާހިރުކަމަކީ އީމާންކަމުގެ އެއްބައިކަންވެސް ޚުޠުބާގައ ހަނދާންކޮށްދެއްވިއެވެ.

މާތް ﷲއަށްޓަކައި މުސްލިމުން އަދާ ކުރަންޖެހޭ އަޅުކަމުގައި ސާފުތާހިރުވެ ހުރުމަކީ ޝަރުއު ކުރެވިގެން ކަމެއްކަމަށް ހުކުރު ޚުޠުބާގައި ވަނީ ވިދާޅުވެފައެވެ. އަދި އަޅުކަމަކީ އިންސާނާއަށް ރޫހާނީ ސާފުތާހިރުކަމެއް ގެނެސްދޭ ކަމެއްކަމަށާއި، ބޭރުފުށުން ހަށިގަނޑައި ފޭރާމާއި އަޅުކަން ކުރާ ތަން ނަޖިހުން ތާހިރުކޮށް އަޅުކަން ކުރުމަކީ ލާޒިމެއްކަމުގައި ހުކުރު ޚުޠުބާގައި ވަނީ ވިދާޅުވެފައެވެ.

"މުސްލިމް އަޚުއްނޭއެވެ. ފަރުދީ ސާފްތާހިރުކަން ނުވަތަ ޝަހުސީ ސާފްތާހިރުކަމަކީވެސް އިސްލާމްދީން ވަރަށް ބޮޑަށް ބާރު އަޅުއްވާފައިވާކަމެކެއެވެ. މި ގޮތުން ނިޔަފަތި ކެނޑުމާއި ކިހިލި ފަތްދަށުން އިސްތަށި އުފުރުމާއި މަތިމަސް ކުރު ކުރުންފަދަ ކަމަކީ ސަހުސީ ސާފުތާހިރުކަމުގެ ތެރޭގައިވާ ކަމެކެވެ." ހުކުރު ޚުޠުބާގައި ވިދާޅުވިއެވެ.

ހުކުރު ޚުޠުބާގައި ވަނީ މަގުމަތީގެ ސާފުތާހިރުކަމުގެ މައްޗައްވެސް އަލިއަޅުއްވާލއްވާފައެވެ. އެގޮތުން ތިމާގެ ހަށިގަނޑާއި ފޭރާމާއި ދިރިއުޅޭ ވެށީގެ ސާފުތާހިރުކަމަކީ އަޅުކަން ގަބޫލުވުމާއި، ﷲ ރުއްސެވުމާއި އެކި އެކި ބަލިމަޑުކަމުން ރައްކާތެރިވުމުގެ ވަޞީލަތެއްކަމަށް ޚުޠުބާގައި ވިދާޅުވިއެވެ. އަދި ސާފުތާހިރުކަމަކީ މާތްﷲއާއި އެކަލާންގެ ރަސޫލާ އަމުރުކުރައްވާފައިވާ ކަމެއްކަމަށްވެސް ޚުޠުބާގައި ވިދާޅުވިއެވެ.

ޚުޠުބާގައި ވިދާޅުވީ އިސްލާމްދީނުގައި ސާފުތާހިރުކަމުގެ ދާއިރާ ވަރަށް ފުޅާކަމަށެއެވެ. އެގޮތުން މަގުމަތި ސާފުކޮށް ބެލެހެއްޓުމަކީވެސް އަޅުކަމެއްކަމަށާއި، އެއީ ވަރަށް ބޮޑު ޒީނަތެއްކަމުގައި ޚުޠުބާގައި ވަނީ ވިދާޅުވެފައެވެ. އެގޮތުން މަގުމަތީގެ ސާފުތާހިރުކަމަކީ އެތައް ބަލިތަކުން މުޖްތަމައު ރައްކާތެރިކޮށްދޭ ކަމެއްކަމަށާއި، އަދި މަގުމަތިން ކުނި ބުނި ނަގާ ސާފު ކުރުމަކީ އީމާންކަމުގެ ތެރެއިންވާ ކަމެއްކަމަށްވެސް ޚުޠުބާގައި ޚަޠީބް ވިދާޅުވިއެވެ.