ދެކުނު ކޮރެއާގައި ރާއްޖެ އިޝްތިހާރުކުރުމަށް ރޯޑްޝޯތަކެއް

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ދެކުނު ކޮރެއާގައި ރޯޑް ޝޯތަކެއް ފަށައިފިއެވެ. މިސިލްސިލާގެ އެންމެ ފުރަތަމަ ރޯޑް ޝޯ ބާއްވާފައިވަނީ މިމަހުގެ 21 ވަނަ ދުވަހު ދެކުނު ކޮރެއާގެ ސޯލްގައެވެ. އަދި މިމަހުގެ 23 ގައި ދެކުނު ކޮރެއާގެ ބުސާންގައިވެސް ރޯޑް ޝޯއެއް އޮންނާނެއެވެ.

އެމްއެމްޕީއާރުސީން ބުނީ މި ރޯޑް ޝޯގެ މަޤްސަދަކީ ދެކުނު ކޮރެއާގެ އޮޕަރޭޓަރުންނާއި އެޖެންޓުންނާއި ގުޅުން އުފައްދައި، ވިޔަފާރީގެ ގުޅުންތައް އިތުރަށް ބަދަހިކޮށް ދެކުނު ކޮރެއާގެ ފަތުރުވެރިންނަށް އެންމެ ކަމުދާ މަންޒިލެއްގެ ގޮތުގައި ރާއްޖެ ޕްރޮމޯޓްކުރުންކަމަށެވެ.

އެމްއެމްޕީއާރުސީއާއިއެކު ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ 11 ކުންފުންޏަކުން ވަނީ މި ރޯޑް ޝޯ ސިލްސިލާގައި ބައިވެރިވެފައެވެ. އެމްއެމްޕީއާރުސީން ބުނީ މި ރޯޑް ޝޯގައި ފަތުރުވެރިކަމުގެ ސިނާއަތުގައި މަސައްކަތްކުރާ ގިނަ ކުންފުނިތަކަކުން ބައިވެރިވުމަކީ ދެކުނު ކޮރެއާގެ ފަތުރުވެރިންގެ ބޭނުންތަކަށް ރާއްޖޭގެ ފަތުރުވެރިކަމުގެ ސިނާއަތުން އިސްކަންދޭ މިންވަރު ހާމަކޮށްދޭ ކަމެއްކަމަށެވެ.

ސޯލްގައި ކުރިއަށްދިޔަ ރޯޑް ޝޯގައި ވަނީ ރެފެލްއެއް ކުރިއަށްގެންގޮސްފައެވެ. މި ރެފްލްއިން ހޮވުނު ނަސީބުވެރި 2 ފަރާތަކަށް ވަނީ ރާއްޖޭގައި ހިލޭ ޗުއްޓީ ހޭދަކުރުމުގެ ފުރުސަތު ދީފައެވެ. އަދި މިމަހުގެ 23 ގައި ބުސާންގައި ކުރިއަށްދާ ރޯޑް ޝޯގައިވެސް 2 ފަރާތަކަށް ދިވެހިރާއްޖޭގައި ހިލޭ ޗުއްޓީ ހޭދަކުރުމުގެ ރެފްލްއެއް ބާއްވާނެކަމަށް އެމްއެމްޕީއާރުސީން ބުނެއެވެ.

މި ރޯޑް ޝޯތަކުގައި ދިވެހިރާއްޖޭގެ ކެއުން ރަހަބަލާ ރާއްޖޭގެ ލިޔެލާޖެހުންފަދަ އަތްތެރި މަސައްކަތްތައް ބަލާލުމުގެ ފުރުސަތު ވަނީ ފަހިކޮށްދީފައެވެ.

އެމްއެމްޕީއާރުސީން ބުނީ ދެކުނު ކޮރެއާގައި މި ރޯޑް ޝޯ ބޭއްވުމުގެ އެންމެ މުހިންމު އެއް ބޭނުމަކީ ރާއްޖޭގެ އެންމެ މުހިންމު އެއް ސޯސް މާކެޓެއްގެ ގޮތުގައި ދެކުނު ކޮރެއާ ދެމެހެއްޓުމާއި، އެ ޤައުމުގެ ޓްރެވެލް އެޖެންޓުންނާއި އިންޑަސްޓްރީގެ ތަފާތު ފަރާތްތަކާއިއެކު އޮތް ގުޅުން އިތުރަށް ވަރުގަދަކޮށް އައު ގުޅުންތައް ދެމެހެއްޓުންކަމަށެވެ.

ދެކުނު ކޮރެއާއަކީ ރާއްޖެއަށް މުހިންމު މާކެޓެކެވެ. ކޯވިޑްގެ ކުރިން 2019 ވަނަ އަހަރު ދެކުނު ކޮރެއާއަކީ ރާއްޖެއަށް 11 ވަނައަށް އެންމެ ގިނަ ފަތުރުވެރިން އައި ޤައުމެވެ. މިދިޔަ އަހަރު 35،948 ފަތުރުވެރިންނާއިއެކު އެ ޤައުމަކީ ރާއްޖެއަށް 9 ވަނައަށް އެންމެ ގިނަ ފަތުރުވެރިން އައި ޤައުމެވެ. އަދި މިއަހަރުގެ މެއި މަހުގެ 13 ގެ ނިޔަލަށް ސައުތު ކޮރެއާއިން ރާއްޖެއަށް 13،335 ފަތުރުވެރިން ވަނީ އައިސްފައެވެ.