މި އަހަރުގެ މިހާތަނަށް ރާއްޖޭގެ 8 ރަށެއްގައި ހިނގާފައިވާ އަލިފާނުގެ އެކިއެކި ހާދިސާތަކުގައި ގެއްލުންލިބުނު 8 ގެއަކަށް އެހީތެރިކަން ފޯރުކޮށްދީފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ހާމަކޮށްފިއެވެ.
އެންޑީއެމްއޭއިން ހާމަކުރިގޮތުގައި، މިއަހަރުގެ މިހާތަނަށް ރާއްޖޭގެ 8 ރަށެއްގައި ހިނގާފައިވާ އަލިފާނުގެ ހާދިސާތަކުގައި 1،125،940.60 (އެއް މިލިއަން އެއްލައްކަ ފަންސަވީސްހާސް ނުވަސަތޭކަ ސާޅީސް ރުފިޔާ ފަސްދޮޅަސް ލާރި) ފޯރުކޮށްދީފައިވެއެވެ. މި ހާދިސާތަކުގައި 17 ފަރާތަކަށް ވަގުތީ ބޯހިޔާވަހިކަމާއި، އަންނައުނާއި، ކައްކާކެވޭނެ އިންތިޒާމްވެސް ހަމަޖައްސައިދީފައިވާ ކަމަށް އެންޑީއެމްއޭއިން މަޢުލޫމާތުދެއެވެ.
އެހީތެރިކަން ފޯރުކޮށްދީފައިވާ ރަށްތަކާއި އަދަދު:
- ރ. އުނގޫފާރު - 86630 ރުފިޔާ
- ސ. ފޭދޫ - 179400 ރުފިޔާ
- ހދ. މަކުނުދޫ - 160441 ރުފިޔާ
- ހދ. ނެއްލައިދޫ - 35655 ރުފިޔާ
- ސ. ހިތަދޫ - 191640 ރުފިޔާ
- ހއ. ފިއްލަދޫ - 227872 ރުފިޔާ
- ގދ. ގައްދޫ - 81281 ރުފިޔާ
- އއ. ތޮއްޑޫ - 163020 ރުފިޔާ
އެންޑީއެމްއޭއިން ބުނީ، ވޭތުވެދިޔަ 5 އަހަރަށް ބަލާއިރު އަލިފާނުގެ ހާދިސާތަކުގައި ގެދޮރަށް ބޮޑެތި ގެއްލުންތަކެއް ލިބިގެން އެ އޮތޯރިޓީއަށް ރިޕޯޓްކޮށްފައިވާ މިންވަރު އިތުރުވެފައިވާކަމަށެވެ.
ހުށައަޅާފައިވާ ހާދިސާތަކުގެ އަދަދު
- 2019 – 14 ހާދިސާ
- 2020 – 8 ހާދިސާ
- 2021 – 16 ހާދިސާ
- 2022 – 65 ހާދިސާ
- 2023 ޖޫންމަހުގެ ނިޔަލަށް - 31 ހާދިސާ
އެންޑީއެމްއޭއިން ބުނީ، ވޭތުވެދިޔަ 5 އަހަރު ހިނގާފައިވާ ހާދިސާތަކުގައި ގެއްލުން ލިބުނު ފަރާތްތަކަށް ”ކާރިސާތަކުގައި އެހީ ދިނުމުގައި ގެންގުޅޭ މިންގަނޑު“ ގެ ދަށުން 19،023،144.29 (ނަވާރަ މިލިއަން ތޭވީސްހާސް އެއްސަތޭކަ ސާޅީސް ހަތަރު ރުފިޔާ ނަވާވީސް ލާރި) އެހީގެ ގޮތުގައި ފޯރުކޮށްދީފައިވާކަމަށެވެ. އަދި އަލިފާނުގެ ހާދިސާތައް ހިނގައިގެން އަތޮޅުތަކުން ރިޕޯޓްކުރާ މިންވަރު އިތުރުވަމުން އަންނަކަމަށް އެ އޮތޯރިޓީން މައުލޫމާތުދެއެވެ.
އެންޑީއެމްއޭއިން ވަނީ އަލިފާނުގެ ހާދިސާތަކުން ރައްކާތެރިވުމަށް އަޅަންޖެހޭ ސަލާމަތީ ފިޔަވަޅުތައް އެޅުމާއި، ގޭސް އަދި ކަރަންޓް ބޭނުންކުރުމުގައި ރައްކާތެރިވުމާއި، ގޯތިގެދޮރާއި، އަގުބޮޑެތި މުދަލުގެ އިތުރުން ވިޔަފާރިތައް އިންޝުއަރެންސް ކުރުމަށް އިލްތިމާސްކޮށްފައެވެ.