މޯލްޑިވްސް ޕޯޓްސް ލިމިޑެޓް، އެމްޕީއެލްއިން ވިއްކަން ހުޅުވާލި ބޮންޑުން މަސްދުވަހުގެ ތެރޭގައި 50 މިލިއަން ރުފިޔާ ލިބިއްޖެއެވެ.
މިއީ އެމްޕީއެލްއިން ފުރަތަމަ ފަހަރަށް ޕްރައިވެޓް މާކެޓްގައި ބޮންޑި ވިއްކަން ހުޅުވާލި ފަހަރެވެ. މި ބޮންޑަކީ ހަތް އަހަރުގެ ތެރޭގައި އަނބުރާ ދައްކަން ޖެހޭ ބޮންޑެކެވެ.
އެމްޕީއެލްއިން މި ބޮންޑު ވިއްކަން ހުޅުވާލީ މިދިޔަ އޭޕްރީލް 11 ވަނަ ދުވަހުއެވެ. އަދި އޯވަސަބްސްކްރައިބުވުމާއެކު މިމަހުގެ 19 ގައި ވަނީ އެ ބޮންޑަށް އިންވެސްޓް ކުރުމުގެ ފުރުސަތު ބަންދުކޮށްފައެވެ.
އެމްޕީއެލްއިން ވިއްކަނީ 200 މިލިއަން ރުފިޔާގެ ބޮންޑެވެ. މީގެ ދަށުން އެންމެ ފުރަތަމަ ވިއްކަން ހުޅުވާލީ 50 މިލިއަން ރުފިޔާގެ ބޮންޑެވެ. އެމްޕީއެލްއިން ބުނީ ވިއްކަން ހުޅުވާލި 50 މިލިއަން ރުފިޔާގެ ބޮންޑަށް މަހެއްހާ ދުވަހުގެ ތެރޭގައި ކަނޑައެޅި މިންވަރުގެ އިތުރަށް އިންވެސްޓަރުން ލިބިފައިވާކަމަށެވެ. މި ބޮންޑު ގަތް ފަރާތްތަކަށް އަހަރަކު ފައިދާގެ ގޮތުގައި 7 ޕަސެންޓު ލިބޭނެއެވެ.
އެ ކުންފުނީގެ އަމާޒަކީ ޖުލައި ފަހުކޮޅު އަނެއްކާވެސް ބޮންޑުގެ އިތުރު 50 މިލިއަން ރުފިޔާ ވިއްކަން ހުޅުވާލުމެވެ.
އެމްޕީއެލްއިން ބޮންޑު ވިއްކަން ހުޅުވާލީ، އެ ކުންފުނިން ކުރިއަށްގެންދާ ޕޯޓްގެ މަސައްކަތްތައް އިތުރަށް ފުޅާކުރުމަށް ފައިސާ ހޯދުމަށެވެ. އެމްޕީއެލްއަށް 2022 ވަނަ އަހަރު އާމްދަނީގެ ގޮތުގައި ޖުމްލަ 809 މިލިއަން ރުފިޔާ ލިބިފައިވާއިރު، މިއީ 2021 ވަނަ އަހަރާ އަޅާބަލާއިރު %15 ގެ ކުރިއެރުމެވެ.
ސާފު ފައިދާގެ ގޮތުގައި ޖުމްލަ 108.9 މިލިއަން ރުފިޔާ ލިބުނުއިރު، މިއީ 2021 އަޅާބަލާއިރު %43 ގެ ކުރިއެރުމެކެވެ. އެމްޕީއެލްއަށް 2022 ވަނަ އަހަރު ލިބުނު ފައިދާއިން ޑިވިޑެންޑްގެ ގޮތުގައި ސަރުކާރަށް 67.5 މިލިއަން ރުފިޔާ ދެއްކުމަށް އެ ކުންފުނީގެ ޑިރެކްޓަރުންގެ ބޯޑުން ވަނީ ފާސްކޮށްފައެވެ.