މިއަހަރުގެ ފުރަތަމަ 5 މަސްދުވަހު ގްރީން ފަންޑުން 261 މިލިއަނަށްވުރެ ގިނަ ރުފިޔާ ހަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ގްރީން ފަންޑުން ރާއްޖޭގެ އެކި ރަށްރަށުގައި ކުރިއަށްދާ ތަރައްޤީގެ މަޝްރޫއުތަކަށް ދަނީ ހަރަދުކުރަމުންނެވެ. އޭގެތެރޭގައި ފެނާއި ނަރުދަމާގެ މަސައްކަތްތަކާއި، ގޮނޑުދޮށް ޙިމާޔަތްކުރުމުގެ މަސައްކަތްތަކުގެ އިތުރުން ކުނި މެނޭޖްކުރުމުގެ މަޝްރޫޢުތައް ހިމެނެއެވެ.
ގްރީން ފަންޑުގެ ގޮތުގައި މިއަހަރުގެ ފުރަތަމަ 5 މަސްދުވަހު ކޮށްފައިވާ ހޭދަ
* ޖަނަވަރީ - 74.5 މިލިއަން ރުފިޔާ
* ފެބްރުއަރީ - 66 މިލިއަން ރުފިޔާ
* މާރޗް - 77.4 މިލިއަން ރުފިޔާ
* އޭޕްރީލް - 35.8 މިލިއަން ރުފިޔާ
* މެއި - 7.4 މިލިއަން ރުފިޔާ
މިދިޔަ މެއި މަހު ގްރީން ފަންޑުން 27 މަޝްރޫއަކަށް ވަނީ ހަރަދުކޮށްފައެވެ. އޭގެތެރެއިން އެންމެ ބޮޑު އަދަދެއް ހޭދަކޮށްފައިވަނީ މާލެ ސަރަހައްދުގެ އެންވަޔަރަމަންޓް އިންޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫއަށެވެ. އެއީ 3.2 މިލިއަން ރުފިޔާއެވެ. 2 ވަނަ އަށް އެންމެ ބޮޑު ހޭދައެއް ކުރީ ނ. ޅޮހީ ވޯޓަރ ސަޕްލައި ސިސްޓަމްއަށެވެ. އެއީ 670،000 ރުފިޔާއެވެ.
ފިނޭންސް މިނިސްޓްރީގެ ގްރީން ފަންޑު ރިޕޯޓުން ދައްކާގޮތުން މިދިޔަ އަހަރު ނިމުނުއިރު ގްރީން ފަންޑުގައި ބާކީހުރި އަދަދާއި މިއަހަރުގެ ފުރަތަމަ 5 މަސްދުވަހު ގްރީޓް ޓެކްސްގެ ގޮތުގައި ލިބުނު އާމްދަނީއާއެކު ގްރީން ފަންޑުގައި މިހާރު 988 މިލިއަން ރުފިޔާ އެބަހުއްޓެވެ.
ފިނޭންސް މިނިސްޓްރީން ޢާއްމުކުރައްވައިފައިވާ ތަފާސްހިސާބުތަކުން ދައްކާގޮތުން މިދިޔަ އޭޕްރީލްމަހު ގްރީން ޓެކްސްގެ ގޮތުގައި ދައުލަތަށް 83 މިލިއަން ރުފިޔާ ލިބިފައިވެއެވެ. މީގެތެރެއިން އެންމެ ބޮޑު ޢަދަދެއް ލިބިފައިވަނީ ރިސޯޓްތަކުންނެވެ. އެއީ 74.6 މިލިއަން ރުފިޔާއެވެ. ހޮޓެލްތަކުން 1.1 މިލިއަން ރުފިޔާ، އަދި ގެސްޓްހައުސްތަކުން ލިބިފައިވަނީ 4.7 މިލިއަން ރުފިޔާއެވެ. މީގެއިތުރުން ސަފާރީތަކުން 2.5 މިލިއަން ރުފިޔާ ލިބިފައިވާކަމަށް ގްރީން ފަންޑު ރިޕޯޓުން ދައްކައެވެ.
ރާއްޖޭގައި ގްރީން ޓެކްސް ނަގަމުން އަަންނަނީ އިންޓަގްރޭޓަޑް ޓޫރިސްޓް ރިސޯޓުތަކާއި، ރިސޯޓު ހޮޓާތަކާއި، ޓޫރިސްޓު އުޅަނދުތަކުގައި ތިބޭ ޓޫރިސްޓުންގެ އަތުން ކޮންމެ ދުވަހަކަށް، މީހަކަށް 6 އެމެރިކާ ޑޮލަރުގެ ރޭޓުންނެވެ.
މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރިއަށްވުރެ ގިނަ ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 6 އެމެރިކާ ޑޮލަރު، އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 3 ޑޮލަރުގެ ރޭޓުންނެވެ.