އެގްރޯ ނޭޝަނަލް ކޯޕަރޭޝަން، އެގްރޯނެޓުން ދަނޑުވެރިކަމުގެ ބާވަތްތައް އުފުލުމަށް 2 ބޯޓު ބަނުމަށް ކުންފުންޏަކާއި ޙަވާލުކޮށްފިއެވެ. އެގްރޯނެޓުން ބަންނަ ބޯޓުތަކަކީ އެގްރޯގެ މަސައްކަތްތަކަށް އިތުރު ފަސޭހަތަކެއް ގެނެސް، ދަނޑުވެރިންގެ އުފެއްދުންތައް އަވަސްކަމާއި ފަސޭހަކަމާއެކު އެއްތަނުން އަނެއްތަނަށް އުފުލަން ބަންނަ ބޯޓުތަކެކެވެ.
އެގްރޯނެޓުން މިބޯޓުބަނުމުގެ މަސައްކަތް ހަވާލުކޮށްފައިވަނީ ފިކްސްއިން މެރިން ޕްރައިވެޓް ލިމިޓެޑާއެވެ. މިއެއްބަސްވުމުގެ ދަށުން އެގްރޯނެޓުން ބަންނަ 2 ބޯޓުގެ މަސައްކަތްވެސް އެ ކުންފުންޏާއި ވަނީ ހަވާލުކޮށްފައެވެ. އެއީ 65 ފޫޓުގެ ބޯޓަކާއި 45 ފޫޓުގެ ބޯޓެކެވެ.
މިބޯޓަކީ ޖަޕާނު ސަރުކާރުގެ އެހީގައި ޔޫއެންޑީޕީގެ ޕީޑީއެސްއޭއީގެ ދަށުން ބަންނަ ބޯޓުތަކެކެވެ. މިބޯޓް ފަރުމާކުރީ މޯލްޑިވްސް ޕޮލިސް ސަރވިސަސްގެ މެރިން ޕޮލިސްއިންނެވެ. މިމަސައްކަތައް އިކޮނޮމިކް މިނިސްޓްރީއާއި އަދި އެގްރިކަލްޗަރ މިނިސްޓްރީގެ ފަރާތުން އެހީތެރިކަން ލިބިފައިވާ ކަމަށް އެގްރޯނެޓުން ބުނެއެވެ.
މިބޯޓު އޮޕަރޭޓް ކުރާއިރު މުވައްޒަފުން ތަމްރީން ކުރުމާއި ސަލާމަތީ ކަންކަން ބެލެހެއްޓުމުގައި މޯލްޑިވްސް ޕޮލިސްގެ މެރިން ޕޮލިސްގެ އެހީތެރިކަން ލިބެމުންދާނެ ކަމަށް އެގްރޯނެޓުން ބުނެއެވެ. އެގްރޯނެޓުން ބުނީ، އެ ކުންފުނިން ބަންނަ ބޯޓުތަކަކީ ދަނޑުވެރިންނާއި ކޮންސިއުމަރުން ގުޅުވައިދޭ ފައިދާހުރި އަދި ދެމެހެއްޓެނިވި ދަތުރުފަތުރުގެ ނިޒާމެއް ތައާރަފްކުރުމަށް ކުރަމުންދާ މަސައްކަތުގެ ފެށުންކަމަށެވެ.
މި މަޝްރޫޢުގެ މަޤްޞަދަކީ ދަނޑުވެރިކަމުގެ އުފެއްދުންތަކަށް ދެމެހެއްޓެނިވި، ފައިދާހުރި، އިތުބާރުހުރި، އަދި ވަގުތުން ދަތުރުފަތުރު ކުރުމުގެ ނިޒާމެއް ޤާއިމުކުރުމެވެ. މިބޯޓުތަކުގެ ސަބަބުން ދަނޑުވެރިންގެ ބާވަތްތައް ތާޒާކަމާއެކު ވަގުތުން ރާއްޖޭގެ އެކި މާރުކޭޓްތަކަށް ފޯރުކޮށްދެވޭނެ ކަމުގެ ބޮޑު ޔަގީންކަމެއް ލިބިގެންދާނެ ކަމަށް އެގްރޯނެޓުން ބުނެއެވެ.
އެގްރިބޯޓް އަކީ ސީދާ ދަނޑުވެރިކަމުގެ ބޭނުމަށް ފަރުމާކޮށްފައިވާ ބޯޓުތަކެކެވެ. މި ބޯޓްތައް ފަރުމާކޮށްފައިވަނީ ރާއްޖޭގައި ދިމާވާ ގޮންޖެހުންތަކާއެކު ބޭނުންކުރެވޭ ގޮތަށް މޫސުމީ ބަދަލުތަކާއި އެކުވެސް ގަދަ ކަނޑުތަކުގައި ދުއްވޭގޮތަށް އަދި ބަނދަރަށް ލެފުމުގައިވެސް ފަސޭހަވާނެ ގޮތަށް ކަމަށް އެގްރޯނެޓުން މައުލޫމާތުދެއެވެ.
މިބޯޓުގައި ދަނޑުވެރިކަމުގެ ބާވަތްތައް ރައްކާކުރުމާއި، ސޯލާ ޕަވަރޑް ކޯލްޑް އެންޑް ޑްރައި ސްޓޯރޭޖް ފެސިލިޓީތަކާއި، ކްރޫއަށް އަރާމުކޮށްލަން ތިބެވޭ ކޮޓަރިތައް ވަނީ ފަރުމާކޮށްފައެވެ. މި ބޯޓު ފަރުމާކޮށްފައިވަނީ އިރުގެ ހަކަތައިން ކޯލްޑްސްޓޯރޭޖް ބޭނުން ކުރެވޭގޮތަށް ތިމާވެއްޓާއި އެންމެ ރައްޓެހި ގޮތައް ކަމަށް އެގްރޯނެޓުން ބުނެއެވެ.