އެލައިޑް އިންޝުއަރެންސްގެ ކޮމިއުނިޓީ ފަންޑް އަދި އެޑިއުކޭޝަން ފަންޑަށް ޝައުގުވެރިވާ ފަރާތްތަކުން ފޯމު ހުށައެޅުމަށް ހުޅުވާލައިފިއެވެ. މިއީ އެ ކުންފުނީގެ ޢިޖްތިމާއީ ޒިންމާ "ޕްރިމިއަމް ފޯ ގުޑް" ގެ ދަށުން ތަޢާރަފުކޮށްފައިވާ ޕްރޮގްރާމެކެވެ.
"އެލައިޑް ކޮމިއުނިޓީ ފަންޑް" އަކީ 6 ދާއިރާއެއް ހިމެނޭގޮތަށް މުޖުތަމަޢުއަށް މަންފާ ކުރުވަނިވި ޚިޔާލުތައް ޙަޤީޤަތަކަށް ހެދުމުގެ ބާރުވެރިކަން އަތޮޅުތަކުގައި ޙަރަކާތްތެރިވާ ޖަމްޢިއްޔާތަކަށް ލިބިދޭ ފަންޑިންގ ޕްރޮގްރާމެކެވެ. އެގޮތުން ޞިއްޙީ ދުޅަހެޔޮކަން، އިޖުތިމާޢީ ޚިދުމަތް، ތިމާވެށި ރައްކާތެރިކުރުން، އަންހެނުންނާއި ކުޑަކުދިންގެ ޙައްޤުތައް، ތަޢުލީމާއި ތާރީޚުގެ ރޮނގުން ހެޔޮ ބަދަލުތަކެއް ގެނައުމަށް ހިންގިދާނެ ޕްރޮޖެކްޓްތަކަށް ކުރިމަތިލުމަށް ވަނީ ހުޅުވާލާފައެވެ.
އެލައިޑުން ބުނީ އޮގަސްޓް 15 ގެ ކުރިން މި ފުރުޞަތަށް އެދި ހުށައެޅޭނެކަމަށެވެ. އެންމެ ރަނގަޅު ޚިޔާލު ހުށައަޅާ 4 ފަރާތަކަށް 50،000 ރުފިޔާގެ ފައިސާގެ އެހީ ދިނުމަށް ވަނީ ނިންމާފައެވެ.
އެލައިޑް އެޑިޔުކޭޝަން ފަންޑަކީ ތަޢުލީމީ ނިޒާމް ހަރުދަނާ ކުރުމަށްޓަކައި، ދަރިވަރުންނާއި ޓީޗަރުންނަށް މަންފާކުރުވަނިވި ޚިޔާލުތަކަށް ހިތްވަރުދޭ ފަންޑިންގ ޕްރޮގްރާމެކެވެ. މިފުރުޞަތަށް 15 އޮގަސްޓް ގެ ކުރިން ހުށައެޅޭނެއެވެ. އެންމެ ރަނގަޅު ޚިޔާލު ހުށައަޅާ 8 ފަރާތަކަށް 25،000 ރުފިޔާގެ ފައިސާގެ އެހީ ދިނުމަށް ހަމަޖެހިފައިވާކަމަށް އެލައިޑުން ބުނެއެވެ.
އެލައިޑުން ފާހަގަކުރާ ގޮތުގައި މިފަދަ ފަންޑިންގ ޕްރޮގްރާމްތަކަކީ ވަރަށް އުއްމީދާއެކު އެލައިޑުން ފަށާފައިވާ މަސައްކަތެކެވެ. އެގޮތުން ނިމިދިޔަ އަހަރުގެ ތަޖުރިބާއަށް ބަލާ، މިފަހަރުގެ ވެސް އަމާޒަކީ ރާއްޖޭގެ ހުރިހާ ކަންކޮޅުތަކެއްގައި ތިއްބަވާ ފަރާތްތަކަށް އެމުޖުތަމަޢެއްގައި ފާހަގަވެފައި ހުރި ކަންކަން ރަނގަޅުކުރުމަށް މާލީގޮތުން ކުރިމަތިވާ ހުރަސްތައް ނައްތާލެވޭނެ މަގެއް ފޯރުކޮށްދިނުމެވެ. އެހެންކަމުން މި ޕްރޮގްރާމްތައް މެދުވެރިކޮށް ރައްޔިތުން ބާރުވެރިވެ ދުޅަހެޔޮ މުޖްތަމަޢުތަކެއް އުފަންވާ މަންޒަރު ފެނިގެން ދިޔުމަކީ މިޕްރޮގްރާމް ކުރިޔަށްގެންދިޔުމަށް ލިބުނު ހިތްވަރެއް ކަމުގައި އެލައިޑުން ފާހަގަކުރެއެވެ.