ކ. ގުރައިދޫއިން މޫދު ކުޅިވަރުގެ ވިޔަފާރިއަށް ބިން ދޫކުރަން ހުޅުވާލައިފިއެވެ. ގުރައިދޫ ކައުންސިލުން ކޮށްފައިވާ އިޢުލާނެއްގައި ވަނީ ގުރައިދޫއިން 4 ބިމެއް މޫދު ކުޅިވަރުގެ ވިޔަފާރިއަށް ދޫކުރަން ހުޅުވާލާފައެވެ.
ގުރައިދޫ ކައުންސިލުން ވިދާޅުވީ، ބީލަމުގައި ބައިވެރިވާން ބޭނުންވާ ފަރާތްތަކުން މިމަހުގެ 22 ވަނަ ދުވަހުގެ ކުރިން އެ ކައުންސިލުގެ މެއިލް މެދުވެރިކޮށް ރަޖިސްޓްރީ ކުރަންޖެހޭނެކަމަށެވެ. ބީލަމުގައި ރަޖިސްޓްރީވެވޭނީ 10000 ރުފިޔާގެ ފީއެއް ދައްކާ ފަރާތްތަކަށެވެ.
އަންދާސީ ހިސާބު ހުށަހެޅުން އޮންނާނީ، ޖުލައި 3 ވާ ހޯމަ ދުވަހުގެ 09:00 ގައި ކ. ގުރައިދޫ ކައުންސިލްގެ އިދާރާގައެވެ. ރަޖިސްޓަރ ނުކުރައްވާ ފަރާތްތަކާއި ބިޑް ހުށަހެޅުމަށް ގަޑިއަށް ހާޒިރު ނުވާ ފަރާތްތަކަށް އަންދާސީ ހިސާބު ހުށަހެޅުމުގެ ފުރުސަތު ނޯންނާނެކަމަށް ކައުންސިލުން ވިދާޅުވެއެވެ.
ގުރައިދޫއިން މޫދު ކުޅިވަރަށް ބިން ދޫކުރަނީ 10 އަހަރަށެވެ. ބިން ކުއްޔަށް ދޭނީ ވިޔަފާރީގެ ޤާނޫނުގެ ދަށުން ރަޖިސްޓްރީކޮށްފައިވާ ވިޔަފާރިތަކަށްކަމަށް އެ ކައުންސިލުން ވަނީ ބުނެފައެވެ.
ގުރައިދޫއަކީ ލޯކަލް ޓޫރިޒަމް ފުޅާވަމުން އަންނަ ރަށެކެވެ. ގިނަ އަދަދެއްގެ ފަތުރުވެރިންނާއި އަދި ދިވެހިންވެސް ޗުއްޓީ ހޭދަކޮށްލުމަށް ދާރަށަކަށް ގުރައިދޫ މިހާރު ވަނީ ވެފައެވެ. މިއާއިއެކު މޫދު ކުޅިވަރަކީ ޑިމާންޑް ބޮޑު އަދި ކުރިމަގު އޮތް ވިޔަފާރިއެކެވެ.