މިއަހަރުގެ އޭޕްރީލް މަހު ގްރީން ޓެކުހުގެ ގޮތުގައި ދައުލަތައް 94.9 މިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީގެ ގްރީން ފަންޑު ރިޕޯޓުން ދައްކާގޮތުން މިދިޔަ އަހަރު ނިމުނުއިރު ގްރީން ފަންޑުގައި ބާކީހުރި އަދަދާއި މިއަހަރުގެ ފުރަތަމަ 4 މަސްދުވަހު ގްރީޓް ޓެކްސްގެ ގޮތުގައި ލިބުނު އާމްދަނީއާއެކު ގްރީން ފަންޑުގައި މިހާރު 912 މިލިއަން ރުފިޔާ އެބަހުއްޓެވެ.
ފިނޭންސް މިނިސްޓްރީން ޢާއްމުކުރައްވައިފައިވާ ތަފާސްހިސާބުތަކުން ދައްކާގޮތުން މިދިޔަ އޭޕްރީލްމަހު ގްރީން ޓެކްސްގެ ގޮތުގައި ދައުލަތަށް 94.9 މިލިއަން ރުފިޔާ ލިބިފައިވެއެވެ. މީގެތެރެއިން އެންމެ ބޮޑު ޢަދަދެއް ލިބިފައިވަނީ ރިސޯޓްތަކުންނެވެ. އެއީ 85.5 މިލިއަން ރުފިޔާއެވެ. ހޮޓެލްތަކުން 1.3 މިލިއަން ރުފިޔާ، އަދި ގެސްޓްހައުސްތަކުން ލިބިފައިވަނީ 5.6 މިލިއަން ރުފިޔާއެވެ. މީގެއިތުރުން ސަފާރީތަކުން 2.3 މިލިއަން ރުފިޔާ ލިބިފައިވާކަމަށް ގްރީން ފަންޑު ރިޕޯޓުން ދައްކައެވެ.
އޭޕްރީލް މަހު ގްރީން ޓެކުހުގެ ގޮތުގައި އެންމެ ބޮޑު ޢަދަދެއް ލިބިފައިވަނީ ކ. އަތޮޅުންނެވެ. އެއީ 33.3 މިލިއަން ރުފިޔާއެވެ. 2 ވަނައަށް އެންމެ ބޮޑު އާމްދަނީއެއް ލިބުނީ އދ. އަތޮޅުންނެވެ. އެއީ 6.9 މިލިއަން ރުފިޔާއެވެ. އަދި 3 ވަނައިގައި 6.5 މިލިއަން ރުފިޔާއާއެކު އުޅެނީ އއ. އަތޮޅެވެ.
މިއަހަރުގެ ފުރަތަމަ 4 މަސްދުވަހު ގްރީން ޓެކުހުގެ ގޮތުގައި ލިބިފައިވާ އަދަދު:
* ޖަނަވަރީ - 100.7 މިލިއަން ރުފިޔާ
* ފެބުރުވަރީ - 91.8 މިލިއަން ރުފިޔާ
* މާރިޗް - 105.4 މިލިއަން ރުފިޔާ
* އެޕްރީލް - 94.9 މިލިއަން ރުފިޔާ
މިއަހަރުގެ ފުރަތަމަ 4 މަސްދުވަހު ގްރީން ފަންޑުން ކޮށްފައިވާ ހޭދަ
* ޖަނަވަރީ - 75.5 މިލިއަން ރުފިޔާ
* ފެބްރުވަރީ - 66.0 މިލިއަން ރުފިޔާ
* މާރިޗް - 77.4 މިލިއަން ރުފިޔާ
* އެޕްރީލް - 35.8 މިލިއަން ރުފިޔާ
ރާއްޖޭގައި ގްރީން ޓެކްސް ނަގަމުން އަަންނަނީ އިންޓަގްރޭޓަޑް ޓޫރިސްޓް ރިސޯޓުތަކާއި، ރިސޯޓު ހޮޓާތަކާއި، ޓޫރިސްޓު އުޅަނދުތަކުގައި ތިބޭ ޓޫރިސްޓުންގެ އަތުން ކޮންމެ ދުވަހަކަށް، މީހަކަށް 6 އެމެރިކާ ޑޮލަރުގެ ރޭޓުންނެވެ.
މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރިއަށްވުރެ ގިނަ ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 6 އެމެރިކާ ޑޮލަރު، އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 3 ޑޮލަރުގެ ރޭޓުންނެވެ.