އަމީނީ މަގު ހެދުން: ބިލަބޮންގއިން ފެށިގެން މާފަންނު ސްޓޭޑިއަމާއި ހަމައަށް މަސައްކަތް ހޮނިހިރު ދުވަހު ފަށަނީ

އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން އަންނަ ހޮނިހިރު ދުވަހު ބިލަންބޮންގ ސުކޫލްއިން ފެށިގެން މާފަންނު ސްޓޭޑިއަމާއި ހަމައަށް މަގު ބަންދުކޮށް، އެ ސަރަޙައްދުގެ މަސައްކަތް ފަށާނެކަމަށް ރޯޑް ޑިވަލަޕްމަންޓް ކޯޕަރޭޝަންގެ މެނޭޖިންގ ޑިރެކްޓަރު މޫސާ ޢަލީ މަނިކު ވިދާޅުވެއްޖެއެވެ.

މޫސާ އަލީ މަނިކު މިހެން ވިދާޅުވީ އަމީނީމަގުގެ އެންމެ ފަހުން ހަދާ ނިންމި ސެގްމެންޓްތަކުގައި ގަސް އިންދުމަށް ބޭއްވި ހަރަކާތުގެ ތެރެއިން މީޑިއާތަކަށް މަޢުލޫމާތުދެއްވަމުންނެވެ.

މޫސާ އަލީ މަނިކު ވިދާޅުވީ، އަމީނީ މަގުގެ ނުހެދި ބާކީ ހުރި ސެގްމަންޓްތަކުގެ ތެރެއިން ބިލަބޮންގް ސްކޫލުން ފެށިގެން މާފަންނު ސްޓޭޑިއަމާއި ހިސާބަށް ހިމެނޭ ސަރަޙައްދުގެ މަސައްކަތް އަންނަ ހޮނިހިރު ދުވަހު ފެށުމަށް އެކުންފުނިން މިހާރު ތައްޔާރުވަމުންދާކަމަށެވެ. އެގޮތުން އެ ސަރަޙައްދު ބަންދުކޮށް، މަގު ހެދުމަށްޓަކާ ގައުތައް ނަގާ، ސާފުކުރުމުގެ މަސައްކަތް ކުރާނެކަމަށް އޭނާ ވިދާޅުވިއެވެ. މި ސަރަޙައްދަކީ ގިނަ އޮފީސްތަކަކާއި ސުކޫލްތަކެއް ހިމެނޭ ސަރަޙައްދެއްކަމުން އެ ތަންތަނަށް ވަދެ ނިކުތުމުގެ ދަތިތަކެއް ކުރިމަތިވެދާނެކަމަށާއި، ހުރިހާ ރައްޔިތުންގެ ކިބައިން މި ކަމުގައި އެއްބާރުލުން ދެއްވުމަށް މޫސާ ޢަލީ މަނިކު ވަނީ އެދިވަޑައިގެންފައެވެ.

މޫސާ ޢަލީ މަނިކު ވިދާޅުވީ، މީގެ ކުރީގެ ސެގްމަންޓްތަކުގެ މަސައްކަތް ކުރަމުންދިޔައީ ވަރަށް ކުޑަ ސަރަޙައްދެއް ހިމެނޭހެންކަމުން، މަސައްކަތް ނިންމުމަށް ދިގު މުއްދަތެއްނަގާ ކަމަށާއި ތަފާތު ގޮންޖެހުންތަކާ މަސައްކަތް ފަށައިގަތްއިރު ކުރިމަތިވިކަމަށެވެ. އެކަންކަމުގެ ތަޖުރިބާގައި މިހާރު ބޮޑު ބައެއްގައި މި މަސައްކަތް ކުރަން ފެށުމުން މަސައްކަތުގެ ދުވެލި އަވަސްވެފައިވާކަން އޭނާ ފާހަގަކުރެއްވިއެވެ.

"އަޅުގަނޑުމެން ވީހާވެސް ބޮޑުބައެއް ރޫޅާލުމުގެ ބޭނުމަކީ މަސައްކަތް އަވަސް ކުރުން. އެނގިވަޑައިގަންނާނެ ގާތްގަނޑަކަށް 3 ސެގްމެންޓްގެ މަސައްކަތް އަޅުގަނޑުމެންނަށް ކުރިއަށް ދިޔައީ ބޮލޮކްވައިސްކޮށް އެތަންތަނުގެ މަސައްކަތް ކުރަން ހަދައިގެން އަޅުގަނޑުމެންނަށް ދޮޅުމަހުން 4 ސެގްމަންޓް މި ނިންމާލެވުނީ" މޫސާ ޢަލީ މަނިކު ވިދާޅުވިއެވެ.

އަމީނީމަގު ހެދުމުގެ މަސައްކަތުގެ ތެރެއިން މަގު ފެހިކުރުމަށްޓަކާ ގަސް އިންދުމުގެ މަސައްކަތްވެސް އެކުންފުނިން ކުރަމުންދާއިރު، މި ގަސްތަކަކީ އާރް.ޑީ.ސީގެ ނާސަރީގައި ހައްދާފައިވާ ގަސްތަކެކެވެ. މީގެ ތެރޭގައި ގޯލްޑެން ޝަވަރ އަދި މޫނިމާ ގަސް ހިމެނެއެވެ.

މި ގަސްތަކަކީ އަމީނީމަގުގައި އިންދުމަށް އެންމެ އެކަށީގެންވާ ގަސްތަކެއްކަމަށާއި، ފުރަތަމަ 3 ސެގްމަންޓުގައި ޖަހާފައި ހުރި ގަސްތައް މިހާރު ރަނގަޅަށް ހެދެން ފަށާފައިވާކަމަށް އާރް.ޑީ.ސީއިން ބުނެއެވެ. އަދި މި ތަޖުރިބާގެ އަލީގައި މުޅި އަމީނީ މަގުގައި ހިޔާ ދޭ ގަސްތައް އިންދުމުގެ މަސައްކަތް ކޮންމެ ސެގްމަންޓެއް ނިންމާލާފައި ކުރިއަށް ގެންދާނެކަމަށްވެސް އެކުންފުނިން ބުނެއެވެ.

އަމީނީމަގުގައި އެންމެ ފަހުން ތާރުއަޅާ ނިންމާލި 4،5،6،7 ގެ ސެގްމަންޓްގައި ގަސްއިންދުމުގެ މަސައްކަތް ފަށްޓަވައިދެއްވީ މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީންނެވެ.

އަމީނީ މަގުގައި ބާކީ ހިމެނޭނީ 6 ސެގްމަންޓްގެ މަސައްކަތެވެ. މި ސެގްމަންޓްތަކުގެ މަސައްކަތް ކުރިއަށްގެންދާނީ 3 ބަޔަކަށް ބަހާލައިގެނެވެ. އެގޮތުން މީގެ ފުރަތަމަ ބައިގައި ހިމެނޭ ބިލަބޮންގ ސުކޫލުން ވެށިގެން މާފަންނު ސްޓޭޑިއަމާހަމައަށް ހިމެނޭ ބައިގެ މަސައްކަތް އަންނަ ހޮނިހިރުދުވަހު ފަށާނެއެވެ. އެއަށްފަހު ޕްލޭނިން މިނިސްޓްރީއާ ހަމައަށް އަދި އޭގެ ފަހުން މަގުގެ ބާކީ ބައި އެއްކޮށް ނިންމާނެއެވެ.

މާލޭގެ ހުރިހާ އަވަށްތަކެއް ގުޅުވައިދޭ މައި އެއް މަގުކަމަށްވާ އަމީނީމަގު ތަރައްޤީކުރުމުގެ މަސައްކަތް ކުރިއަށްދަނީ ޖުމްލަ 13 ސެގްމަންޓަކަށް ބަހާލައިގެންނެވެ. އޭގެ ތެރެއިން މިހާރު މިވަނީ 7 ސެގްމަންޓްގެ މަސައްކަތް ނިންމާ އާމުންނަށް ބޭނުންކުރަން ހުޅުވާލާފައެވެ.

އަމީނީމަގު ޒަމާނީ ފެންވަރަށް ހެދުމުގެ މަޝްރޫޢުގައި 1.79 ކިލޯމީޓަރުގެ މަގުގެ ސަރަޙައްދު ތަރައްޤީކުރުން ހިމެނެއެވެ. މި މަސައްކަތް ސަރުކާރުން ރޯޑް ޑިވެލޮޕްމަންޓް ކުންފުންޏާ ޙަވާލުކުރެއްވީ 84.4 މިލިޔަން ރުފިޔާއަށެވެ.