މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރު.ސީން ދެކުނު އެފްރިކާގައި ރާއްޖެ އިޝްތިހާރުކުރުމަށް މާކެޓިން ހަރަކާތެއް ފަށައިފިއެވެ. މި ހަރަކާތް 4 މަސްދުވަހަށް ކުރިއަށްދާނެއެވެ. މި ހަރަކާތް ކުރިއަށްގެންދަނީ ތޮމްޕްސަންސް ހޮލިޑޭސްއާއިއެކުގައެވެ.
މި ކެމްޕޭންގެ ތެރެއިން ޑިޖިޓަލް މީޑިއާ، ސޯސަލް މީޑިއާ، އައުޓްޑޯ އިޝްތިހާރުތައް އަދި ބީޓުބީ އިވެންޓްތަކުގައި ތަފާތު ގިނަ ހަރަކާތްތައް ކުރިއަށްދާނެކަމަށް އެމް.އެމް.ޕީ.އާރު.ސީން ބުނެއެވެ.
މި ކެމްޕެއިންގެ އެންމެ މުހިންމު އެއް ބޭނުމަކީ ދިގު މައްދަތުގައި ޗުއްޓީ ހޭދަކުރަން އަންނަ ފަތުރުވެރިންގެ މެދުގައި ރާއްޖޭގެ މަޤުބޫލުކަން އިތުރުކޮށް ރާއްޖެ އަންނަ ފަތުރުވެރިންގެ ޢަދަދު އިތުރުކުރުމެވެ.
ތޮމްޕްސަންސް ހޮލިޑޭސްއަކީ ދެކުނު އެފްރިކާގެ އެންމެ މަޤުބޫލު އެއް ޓުއަރ އޮޕަރޭޓަރެވެ. 40 ވުރެ ގިނަ އަހަރުގެ ތަޖުރިބާ ލިބިފައިވާ ތޮމްޕްސަންސް ހޮލިޑޭސްއަކީ ދުނިޔޭގެ އެންމެ މަޝްހޫރު މަންޒިލްތަކަށް ހޮލިޑޭ ޕެކޭޖް ވިއްކާ ކުންފުންޏެކެވ. މީގެ ތެރޭގައި ދިވެހިރާއްޖެވެސް ހިމެނެއެވެ. ތޮމްޕްސަންސް ހޮލިޑޭސް ފަދަ މަޤުބޫލު ބްރޭންޑަކާއެކު ކުރިއަށްގެންދާ ކެމްޕޭނެއްގެ ސަބަބުން ދެކުނު އެފްރިކާގެ މާކެޓުގައި ދިވެހިރާއްޖެ ބްރޭންޑް އިތުރަށް ހަރުދަނާކުރެވޭނެކަމަށް އެމް.އެމް.ޕީ.އާރު.ސީން ބުނެއެވެ.
މި ކެމްޕެއިންގެ ދަށުން ޖުމްލަ 18 ހަރަކާތެއް ކުރިއަށް ގެންދާނެއެވެ. މީގެ ތެރޭގައި ޓްރެވަލް އޭޖެންޓް އިންސެންޓިވް ޕްރޮގްރާމެއް ވެސް ހިމެނެއެވެ. މިއީ އެޖެންޓުން ދިވެހިރާއްޖެއަށް ބުކިންގ ވިއްކުމަށް ހިތްވަރު ދިނުމުގެ ގޮތުން ހިންގާ ޕްރޮގްރާމެކެވެ.
2021 ވަނަ އަހަރު ދެކުނު އެފްރިކާއިން ދިވެހިރާއްޖެއަށް 16,347 ފަތުރުވެރިން ޒިޔާރަތްކޮށްފައިވާއިރު، 2022 ވަނަ 14,840 ފަތުރުވެރިން ދެކުނު އެފްރިކާއިން ރާއްޖެއަށް ޒިޔާރަތްކޮށްފައިވެއެވެ. މި އަހަރުގެ ފުރަތަމަ 3 މަހު މި މާކެޓުން 1973 ފަތުރުވެރިން ދިވެހިރާއްޖެއަށް ޒިޔާރަތްކުރިއެވެ.
2021 ވަނަ އަހަރު މި މާކެޓުން ރާއްޖެއަށް ޒިޔާރަތްކުރި އަދަދު ޕެންޑަމިކްގެ ކުރީގެ އަދަދުތަކާ އަޅާބަލާއިރު އިތުރުވެފައިވެއެވެ.