ބިޒްނަސް ސެންޓަރ ކޯޕަރޭޝަނުން ހިންގަމުން އަންނަ އެސްއެމްއީ ހަބަކީ ރާއްޖޭގައި މީގެކުރިން ނެތް ތަފާތު ކޮންސެޕްޓެކެވެ. މި ހަބުގެ އެންމެ މުހިންމު އެއް ބޭނުމަކީ ކުދި ވިޔަފާރިތަކާއި މެދު ފަންތީގެ ވިޔަފާރިތަކަށް ފުރުޞަތުތައް ފަހިކޮށްދީ އެމީހުންގެ އުފެއްދުންތަކަށް މާކެޓް ހޯދަދީ އެ ވިޔަފާރިތައް އެހެން ހަރުފަތަކަށް ގެންދިއުމެވެ.
އެސްއެމްއީ ހަބް ރަސްމީކޮށް ހުޅުވާފައިވަނީ މިދިޔަ ޑިސެމްބަރ މަހުގެ 15 ވަނަ ދުވަހުއެވެ. މިހާރު ޚިދުމަތް ދެމުން އަންނަނީ މި ހަބްގެ އެންމެ ތިރީ އަދި ފުރަތަމަ ފަންގިފިލާއެވެ.
މިތަނުގެ އެންމެ ތިރީގައި ހުންނާނީ ކެފޭއަކާއި، ގަހާއި، ދިވެހި ލިޔުންތެރިންގެ ފޮތްތައް ވިއްކާ ތަންތަނެވެ. އަދި އެންމެ ފުރަތަމަ ފަންގިފިލާ ޚާއްސަކޮށްފައި ވަނީ ކާބޯތަކެތި ތައްޔާރުކުރާ ފަރާތްތަކަށެވެ. މިފަންގިލާގައި ޒަމާނީ ފެންވަރަށް ތަރައްޤިކޮށްފައިވާ 19 ކިއޮސްކް ހުރިއިރު، ކޮންމެ ކިއޮސްކެއްގައިވެސް ދިވެހި ވިޔަފާރިވެރިން ދަނީ ހަރަކާތްތެރިވަމުންނެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ބީސީސީގެ ޗީފް ކޮމާޝަލް އޮފިސަރ ސާމިޙް އާދަމް ވިދާޅުވީ، ބީސީސީން ވިޔަފާރިތަކަށް ކިއޮސްކް ދިނުމަށްފަހު އެ ވިޔަފާރިތައް ދޫކޮށްލަނީ ނޫންކަމަށެވެ. އޭގެ ބަދަލުގައި އެޕްލިކޭޝަނާ ހިސާބުން ފެށިގެން، އެ ވިޔަފާރިވެރިއެއްގެ އަތުގައި ހިފައިގެން ބީސީސީ ކުރިއަށްދާކަމަށް ސާމިޙް ވިދާޅުވިއެވެ. ޝައުގުވެރިކަން ހުރެގެން އަންނަ ފަރާތަކީ ވިޔަފާރި ރަޖިސްޓްރޭޝަން ނެތް ފަރާތެއްނަމަ ވިޔަފާރި ރަޖިސްޓްރޭޝަންގެ މަސައްކަތްތަކަށްވެސް ބީސީސީން އެހީތެރިވަމުން އަންނަކަމަށް އޭނާ ވިދާޅުވިއެވެ.
ސާމިޙް ވިދާޅުވީ، އެސްއެމްއީ ހަބްގެ އެންމެ ތިރީ އަދި ފުރަތަމަ ފަންގިފިލާގައި މިހާރުވެސް 80 އާއި ގާތްކުރާ ޢަދަދެއްގެ ވިޔަފާރިތަކަށް ފުރުޞަތު ދެވިފައިވާކަމަށެވެ. އަދި 2 ވަނަ ފަންގިފިލާ ނިމި މުޅި އެސްއެމްއީ ހަބް ހުޅުވިގެން އަންނައިރު 100އަށްވުރެ ގިނަ ވިޔަފާރިތަކަށް ފުރުޞަތު ދެވިގެން އަންނާނެކަމަށްވެސް އޭނާ ވިދާޅުވިއެވެ.
“ގްރައުންޑް އެންޑް ފަސްޓް ފްލޯ ޑިސެމްބަރ 15 ވަނަ ދުވަހުން ފެށިގެން ހުޅުވާލައިގެން އަޅުގަނޑުމެން މިއުޅެނީ. ގްރައުންޑް އެންޑް ފަސްޓް ފްލޯގައި މިހާރު ގާތްގަނޑަކަށް އަދަދުން ދަންނަވާކަމުގައި ވަންޏާ 80 އާއި ގާތްކުރާ ޢަދަދަކަށް ވިޔަފާރިތަކަށް ފުރުޞަތު ދެވިއްޖެ. ދެވަނަ ފްލޯ ދުރުނޫން މުސްތަޤްބަލެއްގައި ހުޅުވޭނެ. އެތަނުގެ ފިނިޝިންގެ މަސައްކަތް މިހާރު އެ ކުރިއަށްދަނީ. މުޅިތަން އެއްކޮށް ނިމިގެން ހުޅުވިގެންދާއިރު އަޅުގަނޑުމެން ގަބޫލުކުރާ ގޮތުގައި ގާތްގަނޑަކަށް 100 އަށްވުރެ ގިނަ ކުދި ވިޔަފާރިތަކަކަށް މިތަނުން ފުރުޞަތުތައް ފަހިވެގެންދާނެ.” ސާމިޙް ވިދާޅުވިއެވެ.
ބީސީސީން މިހާރު ތައްޔާރުވަމުން އަންނަނީ އެސްއެމްއީ ހަބްގެ 2 ވަނަ ފަންގިފިލާ ހުޅުވުމަށެވެ. ސާމިޙް ވިދާޅުވީ، 2 ވަނަ ފަންގިފިލާގައި ޖުމްލަ 10 ކިއޮސްކްގެ ތެރެއިން 3 ކިއޮސްކް ޚާއްސަކުރަނީ އަންނައުނު ވިއްކާ ވިޔަފާރިތަކަށްކަމަށެވެ. އަދި ބާކީހުރި 7 ކިއޮސްކް ޚާއްޞަކުރަނީ އާރޓް އެންޑް ކްރާފްޓް، އެސެސަރީޒް އަދި ރީތިވުމަށް ބޭނުންކުރާ ސާމާނު ވިއްކުމަށްކަމަށެވެ 2 ވަނަ ފަންގިފިލާ ނިމިގެންދާއިރު މިނީ ސިނަމާއަކާއި، ސެލޫނާއި، ކުރެހުންތެރިންނަށް ޚާއްޞަ އާރޓް ގެލަރީއެއްގެ އިތުރުން ގޭމިން އޭރިއާއަކާއި އަދި ސްޓެމް އެޑިއުކޭޝަނަށް ޚާއްސަ ސަރަހައްދެއް ހުންނާނެކަމަށް އޭނާ ވިދާޅުވިއެވެ.
”މި ކިއޮސްކްތައް ވަރަށް ބޮޑަށް ފަރުމާކޮށްފައި މިހުރީ ދިވެހި އުފެެއްދުންތައް ވިއްކުމަށްޓަކައި. އެހެންވީމަ މިތަންތަނުން އަޅުގަނޑުމެން މި ފުރުޞަތު ހުޅުވާލާފައިވަނީވެސް ދިވެހި އުފެއްދުންތައް ވިއްކާ ފަރާތްތަތަކަށް އެކަނި. އެސްއެމްއީ ހަބް ފަރުމާކޮށްފައި މިހުރީ ކޮމިއުނިޓީ ސްޕޭސްއެއްގެ ގޮތުގައި.” ސާމިޙް ވިދާޅުވިއެވެ.
ބީސީސީން މިހާރު ވަނީ އަންނައުނު ވިއްކަން ބޭނުންވާ ވިޔަފާރިތަކާއި، އާރޓް އެންޑް ކްރާފްޓް ވިޔަފާރިތަކާއި، ސެލޫން އަދި ސްޓެމް އެޑިއުކޭޝަން ސަރަހައްދު ހިންގަން ބޭނުންވާ ފަރާތްތަކަށް އެ ފުރުޞަތު ހުޅުވާލާފައެވެ.
އެސްއެމްއީ ހަބްގެ ފުރަތަމަ ފަންގިފިލާގައި ކާބޯތަކެތީގެ ވިޔަފާރިކުރާ ވިޔަފާރިވެރިން ބުނީ އެތަނުގައި އެމީހުންގެ ވިޔަފާރި ރަނގަޅު ކަމަށެވެ. އަދި 2 ވަނަ ފަންގިފިލާ ހުޅުވިގެން އަންނައިރު ވިޔަފާރި މިއަށްވުރެ އިތުރަށް ރަނގަޅުވެގެންދާނެކަމަށް ގަބޫލުކުރެވޭކަމަށް ވިޔަފާރިވެރިން ވަނީ ބުނެފައެވެ.
“މިކޮޅުގައި އެބަހުޅުވާ ސެކަންޑް ފްލޯ. ސެކަންޑް ފްލޯގައި އެބައިން ގޭމިން، ތިއޭޓަރ އެއް. އެހެންވީމަ އަހަރެމެންގެ ވިޔަފާރިއަށް އިތުރަށް ފައިދާ ވެގެންދާނެ. އެއީ ގިނަ މީހުން އެތަނަށް އަންނައިރު ކޮންމެ މީހެއްވެސް ކާއެއްޗެހި ބޭނުންވާނެ. ދެން މިތަނުން ކާއެއްޗެހި ލިބޭކަމަށްވަންޏާ އެއީ އަދި އިތުރު ބޯނަސް ޕޮއިންޓެއް.” އެސްއެސްއީ ހަބުގައި ވިޔަފާރިކުރާ ވިޔަފާރިވެރިއެއް ބުންޏެވެ.
އެސްއެމްއީ ހަބްގެ 2 ވަނަ ފަންގިފިލާގައި ކިއޮސްކް ބޭނުންވާ ވިޔަފާރިތަކުގެ ހުންނަންޖެހޭ ޝަރުތުތަކުގެ ތެރޭގައި ދިވެހި ރައްޔިތެއްކަމުގައިވުމާއި، 18 އަހަރު ވެފައިވާ މީހަކަށް ވުމާއި، އެސްއެމްއީއެއްގެ ގޮތުގައި ރަޖިސްޓްރީވެފައިވުމުގެ އިތުރުން އެސްއެމްއީ ހަބުން ކިއޮސްކެއް ލިބިފައިވާ ފަރާތަކަށް ނުވުން ހިމެނެއެވެ.
ބީސީސީން ބުނީ، އެސްއެމްއީ ހަބްގައި ވިޔަފާރިކުރަނީ ކުދި ވިޔަފާރިތަކަކަށް ވުމުގެ ސަބަބުން ކިއޮސްކްތައް ދޫކުރުމުގައި ބަލަނީ ވީހާވެސް ބޮޑަށް ފޯރާއަގެއްގައި ކިއޮސްކްތައް ދޫކުރުމަށްކަމަށެވެ. މިތަނުން ފުރުސޞާތު ދޭނީ މުޅިންވެސް ދިވެހި އުފެއްދުންތައް ވިއްކާ ވިޔަފާރިތަކަށެވެ.