މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ޗައިނާ ފަތުރުވެރިންގެ މެދުގައި ރާއްޖެ އިޝްތިހާރުކުރުމަށް ޙާއްޞަ ކެންޕެއިނެއް ފަށައިފިއެވެ. މިއީ ވެއިބޯ އަދި ވީޗެޓްގައި ކުރިއަށްގެންދާ ސޯސަލް މީޑިއާ ކެންޕެއިނެކެވެ.
މި ކެމްޕޭނަކީ ޗައިނާގައި ބޯޑަރު އަލުން ހުޅުވާލުމާއި ގުޅިގެން ސޯޝަލް މީޑިއާގައި ރާއްޖެ އިޝްތިހާރުކުރުމަށް ކުރިއަށްގެންދާ ކެންޕެއިނެކެވެ. މީގެ އިތުރުން ޗައިނާގެ ދަތުރުވެރިން ދިވެހިރާއްޖެއަށް ދަތުރުކުރަން ޝޢުގުވެރިކަން އިތުރުކުރުމަކީވެސް މި ކެންޕެއިންގެ އެއް މަޤްސަދެވެ.
ސޯޝަލް މީޑިއާއަކީ ޗައިނާ މާކެޓަށް ވަރަށް މުހިއްމު މީޑިއަމްއެކެވެ. ޗައިނާ މާކެޓްގައި ދިވެހިރާއްޖެ އިޝްތިހާރުކޮށް ރާއްޖޭގެ މަޤުބޫލުކަން އިތުރުކުރުމަށްޓަކައި ކޮވިޑް19 ގެ ލޮކްޑައުން ތެރޭގައިވެސް މިކެމްޕެއިން ވަނީ ކާމިޔާބު ކަމާއެކު ކުރިއަށްގެންގޮސްފައިވެއެވެ.
ދިވެހިރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި ތަޖުރިބާތަކާއި ސެގްމަންޓްތައް އިޝްތިހާރުކުރުކޮށް ރާއްޖޭގެ މަޢުލޫމާތާއި ޕޯސްޓްތައް ވެއިބޯ އަދި ވީޗެޓްގައި ޕޯސްޓްކުރުމަށް ހަމަޖެހިފައިވާކަމަށް އެމްއެމްޕީއާރުސީން ބުނެއެވެ. މި ކެމްޕެއިން ޗައިނާ މާކެޓުގެ 1.4 މިލިއަން މީހުންނާ ހަމައަށް ފޯރާނެ ކަމަށް އެމްއެމްޕީއާރުސީން ލަފާކުރެއެވެ.
ވީޗެޓަކީ މަހަކު 1.15 ބިލިއަން މީހުން ބޭނުންކުރާ ޗައިނާގެ އެންމެ ބޮޑު ސޯޝަލް މީޑިއާ ޕްލެޓްފޯމެވެ. އަދި ވެއިބޯއަކީ މަހަކު 530 މިލިއަން މީހުން ބޭނުންކުރާ ޗައިނާގައި 2 ވަނައަށް އެންމެ ބޮޑު ސޯޝަލް މީޑިއާ ޕްލެޓްފޯމްއެވެ. އަދި މި ޕްލެޓްފޯމްތަކަކީ ޗައިނާގައި އެންމެ ނުފޫޒުގަދަ 2 ޕްލެޓްފޯމްއެވެ.
މިއަހަރު ޗައިނާއިން ދިވެހިރާއްޖެއަށް އައި ފުރަތަމަ ޑައިރެކްޓް ފްލައިޓްގެ ޚަބަރު ވެގެންދިޔައީ ވެއިބޯގައި ޓްރެންޑިންގ ޓޮޕިކަކަށެވެ. މީގެކުރިންވެސް އެމްއެމްޕީއާރުސީން މި 2 ޕްލެޓްފޯމްއާއިއެކު ހިންގި ކެމްޕެނަކީ ވަރަށް ކާމިޔާބު ކެންޕެއިނެކެވެ.
ޗައިނާ މާކެޓަކީ 2020 ވަނަ އަހަރުގެ ކުރިން ދިވެހިރާއްޖެ އަށް އެންމެ ގިނައިން ފަތުރުވެރިން ދަތުރުކުރި މާކެޓެވެ. 2019 ވަނަ އަހަރު ޗައިނާއިން ރާއްޖެއަށް 284،029 ފަތުރުވެރިން ވަނީ ޒިޔާރަތްކޮށްފައެވެ. ކޮވިޑް19 ގެ ބަލިމަޑުކަމުގެ ދުވަސްވަރު ޗައިނާގެ ބޯޑަރުތައް ބަންދުކުރުމުން ޗައިނާއިން ރާއްޖެ އަންނަ ފަތުރުވެރިންގެ ޢަދަދު ވަރަށް ބޮޑަށް ދަށްވިއެވެ.
ބޯޑަރުތައް އަލުން ހުޅުވި ރާއްޖެއަށް ޗައިނާ ފަތުރުވެރިން އަލުން އަންނަން ފެށީ މިދިޔަ ޖަނަވަރީ މަހުގެ 18 ވަނަ ދުވަހުއެވެ. ޗައިނާއަކީ މިހާރު ރާއްޖެއަށް 6 ވަނައަށް އެންމެ ގިނަ ފަތުރުވެރިން ޒިޔާރަތްކުރާ ޤައުމެވެ. އެގޮތުން އަހަރުގެ މިހާތަނަށް ޗައިނާއިން ރާއްޖެއަށް 33،601 ފަތުރުވެރިން ވަނީ އައިސްފައެވެ.