ފޮރިން މިނިސްޓަރ ޢަބްދުﷲ ޝާހިދު ސާރބިއާގެ ވެރިރަށް ބެލްގްރޭޑަށް ވަޑައިގެންފިއެވެ. ފޮރިން މިނިސްޓްރީން ވިދާޅުވީ ފޮރިން މިނިސްޓަރ ސާރބިއާއަށް ކުރައްވާ ދަތުރުފުޅަކީ މިމަހުގެ 8 އިން 10 އަކަށް ކުރައްވާ ރަސްމީ ދަތުރުފުޅެއްކަމަށެވެ. މި ދަތުރުފުޅުގައި ރާއްޖެއާއި ސާރބިއާއި ދެމެދު ރަސްމީ މަޝްވަރާތައް ބާއްވަވާ މުހިންމު ދާއިރާތަކުން އެއްބަސްވުންތަކެއްގައި ސޮއިކުރައްވާނެކަމަށް ފޮރިން މިނިސްޓްރީން ވިދާޅުވިއެވެ.
މިގޮތުން މިނިސްޓަރ ޝާހިދު، ސާރބިއާގެ ފަސްޓް ޑެޕިއުޓީ ޕްރައިމް މިނިސްޓަރ އަދި މިނިސްޓަރ އޮފް ފޮރިންގ އެފެއާޒް އިވިއްސާ ޑޭސިކްއާއި ބައްދަލުކުރައްވާނެކަމަށް ފޮރިން މިނިސްޓްރީން ވިދާޅުވިއެވެ. އަދި ފަސް އެއްބަސްވުމެއްގައި ސޮއިކުރައްވާނެކަމަށްވެސް ފޮރިން މިނިސްޓްރީން ވިދާޅުވިއެވެ.
ދެޤައުމުގެ ދެމެދު ޤާއިމްކުރާ އެއްބަސްވުންތަކުގެ ތެރޭގައި ވިސާ އެއްބަސްވުމަކާއި، ދެޤައުމުގެ ދެމެދު ވިޔަފާރިއާއި އިޤްތިޞާދު އަދި އިންވެސްޓްމަންޓްގެ ދާއިރާއިން އެއްބާރުލުން ދިނުމާ ގުޅޭ އެއްބަސްވުން ހިމެނެއެވެ. އަދި ވައިގެ ދަތުރުފަތުރުގެ ދާއިރާއާއި، ޑިޕްލޮމެޓިކް ދާއިރާއިން ތަޢުލީމުގެ ފުރުޞަތުތައް ރާއްޖެއަށް ފަހިކޮށްދިނުމުގެ އިތުރުން ކުޅިވަރުގެ ދާއިރާއިން ފުރުޞަތުތައް ފަހިކޮށްދިނުމާއި ގުޅޭ އެއްބަސްވުން ހިމެނެއެވެ.
މިނިސްޓަރ ޝާހިދު ވަނީ މިދިޔަ އަހަރުގެ ނޮވެމްބަރު މަހުވެސް ސާރބިއާއަށް ރަސްމީ ދަތުރުފުޅެއް ކުރައްވާފައެވެ.
ރާއްޖެއާއި ސާރބިއާ އާއި ދެމެދު ސިޔާސީ ގުޅުން ޤާއިމްކުރީ 1 މާރިޗް 1975 ވަނަ އަހަރުއެވެ.