އާސަހަރާ މިސްކިތް މަރާމާތުކޮށް ޖާގަ އިތުރުކުރުމަށް މާލެ ސިޓީ ކައުންސިލުން ނިންމަވައިފިއެވެ. އާސަހަރާއަކީ މާލޭގައި ޒަމާނުންސުރެއް މަރުވާ މީހުން ވަޅުލަން މާލޭގެ ހަތަރު އަވަށުގައި ބޭނުން ކުރި ޤަބުރުސްތާނުތައް ފުރި އެތަން ބޭނުން ނުކުރެވޭ ޙާލަތައް ދިޔުމުން މާލޭގައި މަރުވާ މީހުން ވަޅުލުމަށްޓަކައި ގާއިމް ކުރެވިގެން ދިޔަތަނެކެއެވެ. އާސަހަރާ ތަރައްޤީކުރިއިރު ކަށުކަމާ ކެމީގެ އެންމެހާ ކަންކަން ކުރެވޭނެ އިންތިޒާމު ޤާއިމްކުރިއެވެ. އަދި އެ ތަނުގައި މަސްޖިދުލް ތަޢާވުންގެ ނަމުގައި މިސްކިތެއް ބިނާކުރިއެވެ.
އާސަހަރާއަށް ދިމާވެފައިވާ ޖާގައިގެ ދަތިކަން ޙައްލުކުރުމަށް މާލެ ސިޓީ ކައުންސިލުން ނިންމެވީ އެ ކައުންސިލްގެ މެންބަރުންގެ ބައްދަލުވުމުގައެވެ. އެ ބައްދަލުވުމުގައި ވަނީ، އާސަހަރާގެ އަންހެނުން ނަމާދު ކުރާ ސަރަހައްދު ބޮޑު ކުރުމަށާއި، ސަރަހާއަށް ގޮސްތިބޭ މީހުން މަޑުކޮށްލާނެ "ވެއިޓިންގ އޭރިއާ" އެއް ތަރައްޤީކުރުމަށެވެ.
ސިޓީ ކައުންސިލުން ބޭއްވެވި ނޫސްވެރިންގެ ބައްދަލުވުމުގައި މާލޭސިޓީގެ މޭޔަރު ޑރ.މުޙައްމަދު މުޢިއްޒު ވިދާޅުވީ އާސަހަރާ މިސްކިތް މަރާމާތުކުރުމަށް ނިންމެވީ އާސަހަރާއަކީ މާލެ ސިޓީގައި ބޭނުން ކުރާ ހަމައެކަނި ސަހަރާކަމަށްވެފައި، އެ ސަހަރާ ފުރިފައިވުމުންކަމަށެވެ.
މޭޔަރު ވިދާޅުވީ، އާސަހަރާ މިސްކިތުގައި ނަމާދު ކުރުމަށް ޚާއްޞަ ކުރެވިފައިވާ ތަނުގެ ޖާގައިގެ ދަތިކަން އޮތްކަމުގެ ޝަކުވާ ލިބެމުން އަންނަކަމަށެވެ. އެހެންކަމުން އާސަހަރާ މަރާމާތުކޮށް ނިމޭއިރު، އަންހެނުން ނަމާދު ކުރުމަށް ބޭނުން ކުރާ ޖާގަ ބޮޑުކުރެވޭނެކަމަށް މޭޔަރު ވިދާޅުވިއެވެ. މީގެއިތުރުން އަންހެނަށް ޚާއްޞަ ވުޟޫ ކުރާތަންވެސް މަރާމާތުކޮށް ޖާގަ އިތުރުކުރުމަށް ނިންމާފައިވާކަމަށް މޭޔަރު ވިދާޅުވިއެވެ.
މާލެ ސިޓީގެ މޭޔަރު ވިދާޅުވީ، އާސަހަރާ ތެރޭގައި ޢާންމުން މަޑުކޮށްލައިގެން ތިބޭނެ ޖާގަނެތުމުމުގެ ޝަކުވާވެސް އެ ކައުންސިލަށް ލިބޭކަމަށެވެ. އެހެންކަމުން އާސަހަރާ މިސްކިތް މަރާމާތު ކުރާއިރު ޢާންމުން މަޑުކޮށްގެން ތިބޭނެ ސަރަހައްދެއް ރަނގަޅު ފެންވަރަކަށް ތަރައްޤީކުރައްވާނެކަމަށްވެސް މުޢިއްޒު ވިދާޅުވިއެވެ.
"ޢާންމުނަށް މަޑުކޮށްލައިގެން ތިބޭނެ ތަނެއް ނެތް ސަހަރާގައި. އެތަނުގައި ގާފޮޅުމަތީ ފާރުމަތީ ލެނގިލާގެން ތިބެން މިޖެހެނީ. އާއިލާއައް ދެރަ ނިކަމެތި ހިތާމަ ލިބޭ ވަގުތު މި އުޅެން ޖެހެނީ އެންމެ ދަތިހާލުގައި. އާއިލާއާއެކު މަޑުކޮށްލައިގެން ތިބޭނެ ޖާގައެއް ނެތް. އެހެންވީމަ އަޅުގަނޑުމެން މި ނިންމީ ސަހަރާ މަރާމާތު ކުރާއިރު ވެއިޓީން އޭރިއާއެއް ހަދަން. އަދި މަޑުކޮށްލާނެ ކުދި ކޮޓަރިތަކެއްވެސް ހުންނާނެ." މުއިއްޒު ވިދާޅުވިއެވެ.
މުއިއްޒު ވިދާޅުވީ އާސަހަރާ މަރާމާތު ކުރާއިރު، މަރުވާ މީހުން ވަޅުލާ ސަރަހައްދު ނުކޮންނާނެކަމަށެވެ. މޭޔަރު ވަނީ އާސަހަރާ ތަރައްޤީކުރާނެ ޑިޒައިިންގެ މަސައްކަތް ނިމިފައިވާކަމަށެވެ.