ގައުމީ ދާރުލްއާސާރު ޒަމާނީ ފެންވަރަކަށް ތަރައްގީކުރުމުގެ މަސައްކަތް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ފަށްޓަވައިފިއެވެ.
ބީއެމްްއެލްގެ އެހީއާއެކު ކުރިއަށްގެންދަވާ މި މަޝްރޫއުގެ އަމަލީ މަސައްކަތް ބަޔަކާއި ހަވާލުކުރުމަށް މިއަދު ވަނީ ރަސްމިއްޔާތެއް ބާއްވާފައެވެ.
ގައުމީ ދާރުލްއާސާރު ޒަމާނީ ފެންވަރަކަށް ތަރައްގީކުރުމުގެ މަސައްކަތް ހަވާލުކޮށްފައިވަނީ ދިވެހި ކުންފުންޏެއްކަމަށްވާ ޑައިނޯ ކޮންސްޓްރަކްޝަން ޕްރައިވެޓް ލިމިޓެޑާއި ހަވާލްކޮށްފިއެވެ.
މިިކަމާއި ގުޅޭ އެއްބަސްވުމުގައި ސަގާފީ ތަރިކަ ރައްކާތެރިކުރާ ގައުމީ މަރުކަޒުން ސޮއިކުރައްވާފައިވަނީ މިނިސްޓްރީގެ އޮފް އާޓްސް ކަލްޗަރ އެންޑް ހެރިޓޭޖްގެ ނައިބު އަހްމަދުﷲ ޖަމީލްއެވެ. އަދި ޑައިނޯ ކޮންސްޓަރަކްޝަންގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓާރ މުހައްމަދު އަލީއެވެ.
މި އެއެއްބަސްވުމުގެ ދަށުން ގައުމީ ދާރުލްއާސާރުގެ ޝޯ ކޭސްތައް ތައްޔާރުކުރުމާއި މަލްޓި މީޑިއާ ރޫމް ސެޓްއަޕް ކުރުމާއި މިއުޒިކް ޑިސްޕްލޭ ސަރަހައްދުގައި ފްލޯ ރަނަރ އެޅުމާއި ފާރުގައި ކުލަލުން ހިމެނެއެވެ.
ސަގާފީ ތަރިކަ ރައްކާތެރިކުރާ ގައުމީ މަރުކަޒުން ވިދާޅުވީ މި މަޝްރޫއުގައި ތައްޔާރުކުރުމަށް ހަމަޖެހިފައިވާ 19 ޝޯ ކޭސްއަކީ ޒަމާނީ ފެންވަރުގެ ބައިނަލްއަގްވާމި އެކި އެކި މިއުޒިއަމްތަކުގައިވެސް ހުންނަ ފަދަ ޝޯކޭސްތަކެއެވެ.
މި މަޝްރޫއުގެ ދަށުން ދާރުލާސާރުގައި އަލަށް ގާއިމްކުރާ މަލްޓިމީޑިއާ ރޫމްއަކީ ތަނަށް ޒިޔާރަތްކުރާ ފަރާތްތަކަށް ދިވެހިންގެ ތާރީހާއި ގުޅޭ ވީޑިއޯ ޕްރެޒެންޓޭޝަން ދިނުމާއި ދަރިވަރުންނަށް މައުލޫމާތު ސެޝަންތައް ހިންގުމަށް ގާއިމްކުރާ ތަނެއްކަމަށް އެ މަރުކަޒުން ވިދާޅުވެއެވެ.
ސަގާފީ ތަރިކަ ރައްކާތެރިކުރާ ގައުމީ މަރުކަޒުން ވިދާޅުވީ މިއީ ބޭންކް އޮފް މޯލްޑިވްސް، ބީއެމްއެލްގެ ސީއެސްއާރުގެ ދަށުން ގައުމީ ދާރުލްއާސާރު ތަރައްގީ ކުރުމަށް ހިންގޭ މަޝްރޫއެއްކަމަށެވެ.
މި މަޝްރޫއަށް 2.18 މިލިޔަން ރުފިޔާ ހަރަދުވާނެކަމަށާއި އަދި ބީއެމްއެލްއިން އެހީގެ ގޮތުގައި 2 މިލިއަން ރުފިޔާ ހަމަޖައްސާފައިވާކަމަށް އެ މަރުކަޒުން ވިދާޅުވެއެވެ.
ގައުމީ ދާރުލްއާސާރު ޒަމާނީ ފެންވަރަކަށް ތަރައްގީކުރުމުގެ މަސައްކަތް ހަވާލުކުރުމަށް ބޭއްވެވި ރަސްމިއްޔާތުގައި މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖްގެ ޔުމްނާ މައުމޫނާއި އެ ވުޒާރާގެ އިސްބޭފުޅުން ވަނީ ބައިވެރިވެވަޑައިގެންނެވިއެވެ.
ބީއެމްއެލްގެ 40 ވަނަ އަހަރީ ދުވަހާއި ގުޅުވައިގެން އެކި ދާއިރާތަކަށް އެހީވުމުގެ ތަފާތު، ގިނަ ޕްރޮޖެކްޓްތަކެއް ވަނީ ފަށާފައެވެ. އެގޮތުން ސަޤާފަތާއި ތަރިކައިގެ ރައްކާތެރިކުރުމުގެ މި ޕްރޮޖެކްޓަކީ މީގެދަށުން ހިންގާ ޕްރޮކެކްޓެކެވެ.
ދިވެހިރާއްޖޭގެ ޤައުމީ ދާރުލްއާސާރަކީ ދިވެހިރާއްޖޭގެ ތާރީޚާއި ތަރިކައާއި ސަޤާފަތާއި ބެހޭ ހުރިހާ މަޢުލޫމާތެއް އެއް ފުރާޅެއްގެ ދަށުން ލިބޭނެ ފުރުޞަތު ފަހިކޮށްދީފައިވާ ތަނެކެވެ. އެންމެ އެވޭލާ ޒަމާނުގެ ތާރީޚުން ފެށިގެން، ރާއްޖެއަށް އަންނަމުންދިޔަ ބަދަލުތަކާއި، ތަރައްޤީގެ މަރުޙަލާތަކާއި، ރަސްރަސްކަލުންގެ ރަސްކަމުގެ ދައުރުތަކާއި ރާއްޖޭގައި ފާހަގަކޮށްފައިވާ ޚާއްސަ ކަންތައްތަކުގެ މަޢުލޫމާތުވެސް ދާރުލްއާސާރުގައި ރައްކާކޮށްފައިވެއެވެ. އަދި އެކި ދުވަސްވަރު ދިވެހިންގެ ދިރިއުޅުން ދައްކުވައިދިން ވަރަށް ގިނަ ތަކެތި ފެންނަންހުރީ މި ދާރުލް އާސާރުގައެވެ. ދިވެހިންގެ ސަޤާފަތާއި ތަރިކަ އަދި ފަންނުވެރިކަން ދައްކުވަދޭ ތަކެތި ހިމެނެއެެވެ.