ގދ. ތިނަދޫ ޑރ. ޢަބްދުއްޞަމަދު މެމޯރިއަލް ހޮސްޕިޓަލަށް މާދަމާއަކީ ތާރީޚީ ދުވަހެކެވެ. އެ ހޮސްޕިޓަލުން ހިދުމަތްހޯދާ ބަލިމީހުންނަށް މުހިންމު 2 ޚިދުމަތެއްކަމަށްވާ ލެޕްރޯސްކޮޕިކް ސާޖަރީ އަދި އެޑްވާންސް ވޫންޑް ކެއަރގެ ޚިދުމަތް މާދަމާ ފެށުމަށް ވަނީ ތައްޔާރުވެފައެވެ.
7500 މީހުންގެ އާބާދީއެއް އޮންނަ ތިނަދޫގައި ޤާއިމްކޮށްފައިވާ ޑރ. ޢަބްދުއްސަމަދު މެމޯރިއަލް ހޮސްޕިޓަލްގެ ޚިދުމަތް ފެށީ 2000 ވަނަ އަހަރުއެވެ. ތިނަދޫގެ ބޮޑު އާބާދީގެ އިތުރުން، އެ ސަރަޙައްދުގެ ގިނަ ރަށްތަކެއްގެ ރައްޔިތުންވެސް ސިއްޙީ ޚިދުމަތަށް ބަރޯސާވަނީ ޑރ.ޢަބްދުއްޞަމަދު މެމޯރިއަލް ހޮސްޕިޓަލަށެވެ. ޑރ. ޢަބްދުއްޞަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްޤީކުރެއްވުމުގެ މަސައްކަތް މިހާރު ސަރުކާރުން ދަނީ ކުރައްވަމުންނެވެ.
ޑރ. ޢަބްދުއްޞަމަދު މެމޯރިއަލް ހޮސްޕިޓަލްގެ ޚިދުމަތުގެ ފެންވަރު ރަނގަޅުކޮށް ތަރައްޤީކުރުމަށް ސަރުކާރުން ކުރައްވާ މަސައްކަތުގެ ދަށުން މާދަމާއަކީ އެ ހޮސްޕިޓަލަށާއި، އެ ހޮސްޕިޓަލުން ޚިދުމަތް ހޯދާ މީހުންނަށް ޚާއްޞަ ދުވަހެކެވެ. ލެޕްރޯސްކޮޕިކް ސާޖަރީގެ ޚިދުމަތާއެކު އެޑްވާންސް ވޫންޑް ކެއާގެ ހިދުމަތްވެސް މާދަމާ މި ހޮސްޕިޓަލްގައި ފަށާނެއެވެ. އެގޮތުން އެ ހޮސްޕިޓަލްގައި މާދަމާ ފަށާ ލެޕްރޯސްކޮޕިކް ސާޖަރީއަކީ ކެފުމުގެ ބަދަލުގައި ބަނޑުގައި ކުދި ލޯވަޅުތަކެއް އަޅައިގެން ހަދާ ސާޖަރީއެކެވެ. ކެމަރާއާއި ކުދިކުދި ތަފާތު އާލާތްތަކެއް ބޭނުންކޮށްގެން ހަދާ މިފަދަ ސާޖަރީތަކާއި ގުޅިގެން ބަލި މީހާ އުފުލަންޖެހޭ ވޭން ކުޑަވެ، ފަސޭހަވުންވެސް އަވަސްވެއެވެ.
އެޑްވާންސް ވޫންޑް ކެއަރގެ ޚިދުމަތަކީ ފަސޭހަ ނުވެ ގިނަ ދުވަސްވެފައި ހުންނަ ފާރުގަނޑުތައް ޒަމާނީ ވަޞީލަތްތައް ބޭނުންކޮށްގެން އަވަހަށް ފަސޭހަކުރުމުގެ ފަރުވާއެކެވެ. އެޑްވާންސް ވޫންޑް ކެއަރގެ ޚިދުމަތް ދިނުމަށް ޚާއްޞަ ކްލިނިކެއްވެސް އެ ހޮސްޕިޓަލްގައި މިހާރު ވަނީ ޤާއިމްކޮށްފައެވެ. މީގެއިތުރުން ކެމެރާ ލައްވައިގެން ކުރަންޖެހޭ އަންހެނުންގެ ޚާއްޞަ އޮޕަރޭޝަންތަކާއި ހުޅުތެރެއަށް ކެމެރާ ލައްވައިގެން ކުރަމުންދާ ކަށީގެ އޮޕަރޭޝަންތައް ފެށުމަށްވެސް ހޮސްޕިޓަލުން ދަނީ ތައްޔާރުވަމުންނެވެ.
މި ޚިދުމަތާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އައިޖީއެމްއެޗްގެ ޑިޕާޓްމަންޓް އޮފް ޖެނެރަލް ސަރޖަރީ ޔުނިޓްގެ ހެޑް، ޑރ.ޢަބްދުﷲ އުބައިދު ވިދާޅުވީ، މި 2 ޚިދުމަތާއިއެކު ހޮސްޕިޓަލުން ޚިދުމަތް ހޯދަން އަންނަ ބަލިމީހުންނަށް ވަރަށް ބޮޑު ފަސޭހަތަކެއް ލިބިގެންދާނެކަމަށެވެ.
ލަޕަރޮސްކޮޕިކް ސަރޖަރީގެ އެންމެ ބޮޑު ފައިދާއަކީ ބަނޑު ފަޅާ ނުލާ ސަރޖަރީ ކުރުމުގެ ސަބަބުން ޕޭޝަންޓްގެ ރިކަވަރީއަށް ވަރަށް ބޮޑު ލުއެއް ލިބިގެންދިއުންކަން ޑޮކްޓަރ ފާހަގަކުރެއްވިއެވެ. މީގެ ސަބަބުން ބަލިމީހާގެ އަތުންދާ ޚަރަދު ކުޑަވެ ހޮސްޕިޓަލްގައި ހޭދަކުރަންޖެހޭ މުއްދަތުވެސް ވަރަށް ބޮޑަށް ކުޑަވެގެންދާނެކަމަށް ޑޮކްޓަރ އުބައިދު ވިދާޅުވިއެވެ.
"އަޅުގަނޑު ދަންނަވާނީ މިއީ ހަމަ ވަރަށް ބޭނުންތެރި ކޮންމެހެން ކުރަންޖެހޭ އަޕްގްރޭޑިންއެކޭ. އެހެންނޫންނަމަ މިކޮޅުގައި އޮޕަރޭޝަން ކުރާކަށް އެއްވެސް މީހަކު ނޭދޭނެ. ބަނޑުފަޅާ ނުލައި ނުވަތަ ކުޑަކުޑަ ލޯވަޅެއް އަޅައިގެން ކުރެވެން އޮތް އޮޕަރޭޝަނެއް ބަނޑު ހުޅުވާލައިގެން ކުރާކަށް ބޭނުމެއް ނުވާނެ ދެއްތޯ. އެހެންވީމަ މި ޚިދުމަތަކީ ކޮންމެހެން ކުރަންޖެހޭ ޚިދުމަތެއް. ސަބަބަކީ މިގޮތައް އަޕްގްރޭޑް ނުކޮށެއް އަޅުގަނޑުމެންނަށް މިތަނުގައި ޑޮކްޓަރުންވެސް ނުބޭއްތިއްބޭނެ. އަދި ޕޭޝަންޓުން އަޅުގަނޑުމެންނަށް ކުރާ ޓްރަސްޓްވެސް ބިލްޑެއް ނުކުރެވޭނެ." ޑޮކްޓަރ އުބައިދު ވިދާޅުވިއެވެ.
ލެޕްރޯސްކޮޕިކް ސާޖަރީގެ ޚިދުމަތް ފެށުމަށް ބޭނުންވާ ސާމާނު މިދިޔަ އަހަރުގެ ފަހުކޮޅު ތިނަދޫއަށް ގޮންގޮސް ވަނީ އިންސްޓޯލްކޮށްފައެވެ. މާދަމާ ހެނދުނު 2 ބަލިމީހުންގެ ލެޕްރޯސްކޮޕިކް ސާޖަރީ ޑރ. ޢަބްދުއްސަމަދު މެމޯރިއަލް ހޮސްޕިޓަލްގައި ކުރުމަށް ވަނީ ހަމަޖެހިފައެވެ. މި 2 ބަލިމީހުންގެ އިންވެސްޓިގޭޝަން ހަދައި ހުރިހައި ކަމެއް މިހާރު ނިމިފައިވާކަމަށް ޑޮކްޓަރ އުބައިދު ވިދާޅުވިއެވެ.
ޑރ.އަބްދުއްޞަމަދު މެމޯރިއަލް ހޮސްޕިޓަލުން މިހާރުވެސް އެކި ދާއިރާތަކުގެ ސްޕެޝަލިސްޓް ޑޮކްޓަރުންގެ ޚިދުމަތްދެމުން އަންނަނީ ދެމުންނެވެ. އެގޮތުން އަންހެނުންގެ ބަލިތަކާއި، ކުޑަކުދިންގެ ޚާއްސަ ބަލިތަކާއި، ކަށީގެ ބަލިތަކާއި، ހަމުގެ ބަލިތަކާއި، ކަރުންމަތީގެ ބަލިތައް އަދި ދަތުގެ ފަރުވާވެސް އެ ހޮސްޕިޓަލުން ލިބެއެވެ. މީގެއިތުރަށް އެކްސްރޭއާއި އެކި ކަހަލަ ޓެސްޓުތައް ހެދުމުގެ ޚިދުމަތްވެސް ލިބެއެވެ.
އެ ހޮސްޕިޓަލަށް ދިމާވެފައިވާ ޖާގައިގެ ދަތިކަމަށް ހައްލެއްގެނައުމުގެ ގޮތުން މުޅިން އައު ދެ އިމާރާތް ތަރައްޤީކުރުމަށް ނިންމައި، އޭގެތެރެއިން އެއް އިމާރާތުގެ މަސައްކަތް ނިންމައި، ވަނީ ހުޅުވާފައެވެ.
އަތޮޅުތަކުގެ ސިއްޙީ ޚިދުމަތް ފުޅާކުރުމަށް ފަށާފައިވާ ބޮޑެތި މަޝްރޫޢުތަކަކީ އެ ޚިދުމަތް ހޯދުމަށް މާލެއަށް ބަރޯސާވާންޖެހޭޖެހުން ކުޑަކުރުމަށް ސަރުކާރުން ފަށްޓަވާފައިވާ މަސައްކަތެކެވެ. އެގޮތުން އަތޮޅުތަކުގެ 5 ހޮސްޕިޓަލެއް ޒަމާނީ ޚިދުމަތްތަކާއެކު ޓަރޝަރީ ފެންވަރަށް ތަރައްޤީކުރުމަކީ ސަރުކާރުގެ ވަޢުދެކެވެ.