މިދިޔަ އަހަރުގެ ކާމިޔާބީއަށް ބެލުމަށްފަހު، މިއަހަރުގެ ފިނި މޫސުމުގައިވެސް ރާއްޖެއަށް ދަތުރުތައް ދަތުރުފެށުމަށް އިޓަލީގެ ޤައުމީ އެއަރލައިން، އިޓަލިއާ ޓްރާންސްޕޯޓޯ އެއިރޯ އެއަރވޭސް (އައިޓީއޭ އެއަރވޭސް) އިން ނިންމައިފިއެވެ.
މި ދަތުރުތައް ކުރާނީ މިއަހަރުގެ ޑިސެމްބަރ 16 އިން އަންނަ އަހަރުގެ މާރޗް މަހުގެ 25 ވަނަ ދުވަހުގެ ނިޔަލަށެވެ. މި ދަތުރުތައް އޮންނާނީ އިޓަލީގެ ފިއުމިސީނޯ އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ.
އައިޓީއޭ އެއަރވޭސްއިން ބުނީ މިދިޔަ އަހަރުގެ ފިނި މޫސުމުގައި އެ އެއަރލައިނުން ރާއްޖެއަށް ކުރި ދަތުރުތަކަށްވެސް ބޮޑު ތަރުޙީބެއް ލިބިފައިވާކަމަށެވެ. އެހެންކަމުން މިއަހަރުވެސް ދަތުރުތައް ބޭއްވުމަށް ނިންމީކަމަށް އެ އެއަރލައިނުން ބުންޏެވެ.
ފިނިމޫސުމާއި ދިމާކޮށް އިޓަލީއައި ރާއްޖެއާއި ދެމެދު ކުރާ މި ދަތުރުތައް ހަފްތާއަކު 2 ދުވަހު އޮންނާނެއެވެ. މި ދަތުރުތަކުގައި ޓިކެޓް ބުކް ކުރުމުގެ ފުރުޞަތުވެސް އެ އެއަރލައިނުން މިހާރު ވަނީ ހުޅުވާލާފައެވެ. އައިޓީއޭ އެއަރވޭސްއިން މިހާރުވެސް އަންނަނީ ދުނިޔޭގެ 12 ސަރަޙައްދަކަށް ދަތުރުކުރަމުންނެވެ.
އިޓަލީއަކީ ރާއްޖެއަށް ގިނަ ޢަދަދަކަށް ފަތުރުވެރިން އަންނަ ޤައުމެކެވެ. މިއަހަރުގެ މިހާތަނަށް އިޓަލީ ހިމެނެނީ ރާއްޖެއަށް 4 ވަނައަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް އިޓަލީން ރާއްޖެއަށް 55،594 ފަތުރުވެރިން ވަނީ އައިސްފައެވެ. މިދިޔަ އަހަރު އިޓަލީން ރާއްޖެއަށް 97،627 ފަތުރުވެރިން އައިސް އެ ޤައުމު ހިމެނެނީ އެއަހަރު ރާއްޖެއަށް 5 ވަނައަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ.