މޯލްޑިވްސް ކަރެކްޝަނަލް ސަރވިސްގެ ހެޑް އޮފީސް، ޕަބްލިކް ސާވިސް މީޑިއާގެ މާފަންނުގައި ހުންނަ ރޭޑިއޯ ބިލްޑިންގްއަށް ބަދަލު ކުރުމުގެ މަސައްކަތް ކުރަމުން އަންނަކަމަށް އެ ސާރވިސްއިން ވިދާޅުވެއްޖެއެވެ.
ކަރެކްޝަނަލް ސާވިސްގެ މީޑިއާ އޮފިޝަލް ވިދާޅުވީ، ކަރެކްޝަނަލް ސާވިސްގެ ހެޑް އޮފީސް ރޭޑިއޯ ބިލްޑިންގއަށް ބަދަލުކުރަން ނިންމެވީ، އެ އޮފީސް ހިންގި ޣާޒީ ބިލްޑިންގ ތަޅާލާ، އެތަނުގައި ޕާކިން ޒޯނެއް ޤާއިމްކުރުމަށް ޕްލޭނިން މިނިސްޓްރީން ނިންމުވުމުން ކަމަށެއެވެ. ކަރެކްޝަންގެ ހެޑް އޮފީސް ބަދަލު ކުރުމުގެ މަސައްކަތް ކުރަމުންދާއިރު، އެ އިދާރާއިން ދެމުން ގެންދާ ޚިދުމަތަކަށް ބުރުއަރައި ކޮންމެވެސް ވަރެެއްގެ ލަސްވުމެއް އައުމަކީ އެކަށީގެންވާ ކަމެއްކަމަށް ކަރެކްޝަނަލް ސާރވިސްއިން ވިދާޅުވިއެވެ.
ޣާޒީ ބިލްޑިންގ ތަޅާލުމަށް ނިންމީ، އެ ޢިމާރާތް ބޭނުން ނުކުރެވޭ ވަރަށް ބައުވެ ހަލާކުވެފައިވާތީއެވެ. އަދި އެ ޢިމާރާތަކީ މިހާރު ބޭނުންކުރުމަށް އެކަށީގެންވާ އެންމެ ރައްކާތެރި ޢިމާރާތެއްނޫންކަމަށް ކަމަ ގުޅުންހުރި އިދާރާތަކުން ނިންމެވުމާއި ގުޅިގެންނެވެ.
ޣާޒީ ބިލްޑިން ތަޅާލައި އެތަނުގައި ޕާކިން ޒޯނެއް ތަރައްޤީކުރުމަށް ނިންމެވީ، މާލޭގައި ޕާކިންގއަށް މިހާރު ދިމާވެފައިވާ މައްސަލައަށް ލުޔެއް ހޯދުމުގެގޮތުންކަމަށްް ޕްލޭނިން މިނިސްޓްރީން ވިދާޅުވިއެވެ. އަދި އަމާޒަކީ ޣާޒީ ބިލްޑިންގ ތަޅާލުމަށްފަހު ވީ އެންމެ އަވަހަކަށް އެތަނުގައި ޕާކިންގ ޒޯނެއް ހެދުންކަމަށްވެސް އެ މިނިސްޓްރީން ވިދާޅުވިއެވެ.
ޕާކިންގެ މައްސަލަ މާލޭގައި ބޮޑުވެފައި ވާއިރު، ސަރުކާރު އޮފީސްތައް ހިންގި ހުރަވީ ބިލްޑިން ވެސް މިދިޔަ އަހަރު ވަނީ ތަޅާލައިފައެވެ. އެ އިމާރާތް ވެސް ތަޅާލީ ބާއުވެ ބޭނުންކުރުން ރައްކާތެރި ނުވުމުންނެވެ. އަދި އެ ޢިމާރާތް ތަޅާލުމަށް ފަހު، އެ ބިމުގައިވެސް ވަނީ ޕާކިން ޒޯނެއް ތަރައްޤީކޮށްފައެވެ.