މި އަހަރުގެ މާޗު މަހު މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އަށް ޖުމްލަ 206 މައްސަލަ ރިޕޯޓުކޮށްފައިވާ ކަމަށް ތަފާސްހިސާބުތަކުން ދައްކައިފިއެވެ.
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ޢާންމުކުރައްވާފައިވާ ތަފާސްހިސާބުތަކުން ދައްކާގޮތުން މިދިޔަ މާރޗްމަހު އެމިނިސްޓްރީއަށް ހުށަހެޅިފައިވާ މައްސަލަތަކުގެ ބޮޑުބައި ޙިއްޞާކުރަނީ ކުޑަކުދިންނަށް ކުރާ އެކިބާވަތުގެ އަނިޔާގެ މައްސަލަތަކެވެ. އެހެންނަމަވެސް ފެބުރުއަރީ މަހަށްވުރެ މާރޗުމަހު ހުށަހެޅުނު މައްސަލަތައް ނިސްބަތުން މަދުކަން ތަފާސްހިސާބުތަކުން ފާހަގަކުރެވެއެވެ.
އެގޮތުން މިދިޔަ ފެބްރުއަރީ މަހު ޖުމްލަ 284 މައްސަލަ ރިޕޯޓުކޮށްފައިވާއިރު އޭގެ ތެރޭގައި ކުޑަކުދިއްނަށް ކުރާ އެކި ބާވަތުގެ އަނިޔާ 148 މައްސަލަ ހިމެނެއެވެ. އަދި މާރޗު މަހު ޖުމްލަ 206 މައްސަލަ ރިޕޯޓްކޮށްފައިވާއިރު އޭގެތެރޭގައި ހިމެނެނީ ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 98 މައްސަލައެވެ.
މާރޗްމަހު ރިޕޯޓްކޮށްފައިވާ ކުޑަކުދިންނާ ގުޅޭ މައްސަލަތަކުގެ ތެރޭގައި އެންމެ ގިނައިން ރިޕޯޓްކޮށްފައިވަނީ އިހުމާލުގެ މައްސަލަތަކެއެވެ. އެގޮތުން މާރޗްމަހު އިހުމާލުވެގެން 29 މައްސަލައެއް ރިޕޯޓްކޮށްފައިވާއިރު ފެބްރުއަރީމަހު އިހުމާލުގެ 42 މައްސަލަ ވަނީ ރިޕޯޓްކޮށްފައެވެ.
މީގެ އިތުރަށް މާރޗްމަހު ޖިސްމާނީ ހާނިއްކައިގެ 28 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 14 މައްސަލަ، ޖިންސީ ހާނިއްކައިގެ 13 މައްސަލަ، ނަފްސާނީ ހާނިއްކައިގެ 9 މައްސަލަ، އެހެން ކުދިންގެ ފަރާތުން ގަނާ ލިބުން އަދި ފުރައްސާރައިގެ ޝިކާރައަކަށްވުމުގެ 3 މައްސަލަ އަދި ބިރުދެއްކުމުގެ ގޮތުން ކުރެވޭ ކަންކަމުގެ (ބްލެކްމެއި ކުރުން) 1 މައްސަލަ ހިމެނޭ ކަމަށް މިނިސްޓަރީގެ ތަފާސްހިސާބުތަކުން ދައްކައެވެ. ކުޑަކުދިންގެ ޙައްޤުތަކާ ގުޅުންހުރި 4 މައްސަލައެއްވެސް ހުށަހަޅާފައިވެއެވެ. އޭގެތެރޭގައި ކުދިން ސްކޫލަށް ނުފޮނުވުމުގެ 3 މައްސަލަ އާއި ޞިއްޙީ ފަރުވާއަށް ހުރަސްއެޅުން / ނުދިނުނުމުގެ 1 މައްސަލަ ހިމެނެއެވެ.
މީގެ އިތުރުން މަރޗްމަހު ހުށަހަޅާފައިވާ އެހެން މައްސަލަތަކުގެ ތެރޭގައި ނުކުޅެދުންތެރިކަން ހުންނަ މީހުންނާ އަޅާލުމާއި އެހީތެރިކަން ބޭނުންވެގެން ހުށަހަޅާފައިވާ 18 މައްސަލައާއި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން ހުށަހެޅި 7 މައްސަލައެއް ހިމެނެއެވެ. އަދި އިޖުތިމާޢީ އެހީތެރިކަން ފޯރުކޮށްދިނުމާއި ދުޅަހެޔޮކަން ކަށަވަރުކުރުމަށް ބޯހިޔާވަހިކަން ފޯރުކޮށްދިނުމުގެ ކުޅަދާނަކަން ނެތުމުގެ މައްސަލައެއްވެސް ހުށަހަޅާފައިވެއެވެ.
ކުޑަކުދިންގެ އަޚުލާޤާއި ގުޅިގެން ހުށަހެޅުނު މައްސަލަތައް
ކުޑަކުދިންގެ އަޚުލާޤާއި ގުޅުން ހުރި 16 މައްސަލައެއް ހުށަހަޅާފައިވެއެވެ. މީގެ ތެރޭގައި:
* ސްކޫލަށް ދާން ބޭނުން ނުވުމުގެ 8 މައްސަލަ
* ސުލޫކީ މައްސަލައިގެ 3 މައްސަލަ
* ގެއިން ނިކުމެގެން ދިއުމުގެ 2 މައްސަލަ
* ރުޅި އިސްކުރުން ނުވަތަ ރުޅިގަދަވެ އުޅުމުގެ 2 މައްސަލަ
* ފުރައްސާރަކުރުމުގެ 1 މައްސަލަ
ޖެންޑަރ މިނިސްޓްރީގެ ތަފާސްހިސާބުތައް ދައްކާގޮތުން މާރޗު މަހު ދައުލަތަށް އަލަށް 3 ކުއްޖަކު ނަންގަވާފައިވެއެވެ. މީގެ އިތުރުން 2 ކުއްޖަކު ފޮސްޓަރ ކޮށް، 1 ކުއްޖަކު އާއިލާއަށް ރީއިންޓަރގްރޭޓް ކުރެވިފައިވާކަމަށް ތަފާސްހިސާބުން ދައްކައެވެ. އެހެންކަމުން މަރޗްމަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމުލަ ޢަދަދަކީ 186 އެވެ.
ދައުލަތުގެ ބެލުމުގެ ދަށުގައި ތިބި ގިނަ ދުވަސްވެފައިވާ ކުދިން އަނބުރާ މުޖުތަމަޢަށް ގެނައުމަށް ޚާއްޞަ މަސައްކަތްތަކެއް ކުރަންޖެހޭ ކަމަށް ޖެންޑަރ މިނިސްޓްރީން ވެސް ވަނީ ވިދާޅުވެފައެވެ. އެގޮތުން އެކުދިންނަށް ވަޒީފާގެ ފުރުޞަތުތައް ހޯދައިދިނުމާއި ކުދިންނަށް ބޭނުންވާ ހުނަރު އިތުރުކުރުމުގެ އެކި ޕްރޮގްރާމްތައް ކަމާގުޅޭ އިދާރާތަކާ ގުޅިގެން ކުރިއަށްގެންދާކަން ޖެންޑަރ މިނިސްޓްރީން ފާހަގަކުރައްވައެވެ.