ބުރާސްފަތި ދުވަހުން ފެށިގެން ރާއްޖެއަށް ވިއްސާރަކުރާނެ ކަމަށާއި، އަދި މިހާރު އާދަޔާ ޚިލާފަށް ހޫނުވަމުންދާ ދިއުން ދަށަށް ދާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައިފިއެވެ.
ކޮންމެ އަހަރަކުވެސް ރާއްޖެއަށް އެންމެ ހޫނުގަދަ ވަނީ ފެބްރުއަރީމަހުން ފެށިިގެން ޖޫންމަހާ ދެމެދުއެވެ. ވޭތުވެދިޔަ އަހަރުތަކަށް ބަލާއިރު މިދުވަސްވަރު ހޫނުމިން އަހަރުން އަހަރަށް ވަނީ މަތިވެފައެވެ.
ތަފާސް ހިސާބުތައް ދައްކާގޮތުން މި އެޕްރީލްމަސް ވެފައިވަނީ ރާއްޖޭގެ ތާރީޚުގައިވެސް މިހާތަނަށް އެންމެ ހޫނު ގަދަވި ދުވަސްވަރަށެވެ. ހޫނު ގަދަވުމުގެ ސަބަބުން ކަރަންޓާ އެއްވަރަށް ފެންވެސް ބޭނުންކުރާ މިންވަރު އިތުރުވެގެން ވަނީ ގޮސްފައެވެ. އަދި ވާރޭ ނުވެހި ގިނަ ދުވަސްތަކެއްވުމުގެ ސަބަބުން ބައެއް ރައްރަށުގައި ބޯފެން ލިބުން ދަތިވެ، ފެން ފޯރުކޮށްދިނުމަށް ރަށްރަށުން ވަނީ ކަމާބެހޭ އިދާރާތަކުގައި އެދިފައެވެ.
ރާއްޖޭގެ ބައެއް ސަރަޙައްދުތަކުގެ ހޫނުމިން ވަރަށް ބޮޑަށް މައްޗަށް ދިޔުމާއި ކަރަންޓް ބޭނުންކުރި މިންވަރުވެސް ވަނީ ރެކޯޑް މިންވަރަށް އުފުލިފައެވެ. އަދި އެކަމާ ގުޅިގެން ސްޓެލްކޯއިން ވަނީ ކަރަންޓު ބޭނުން ކުރުމުގައި ސަމާލުކަންދިނުމަށް އިލްތިމާސްކޮށްފައެވެ.
ހޫނު ގަދަ ދުވަސްތަކަކަށްފަހު ކުރިއަށް އޮތީ ވިއްސާރަ މޫސުންކަމަށް މެޓް އޮފީހުން ވިދާޅުވެއެވެ. އެގޮތުން އަންނަ ބުރާސްފަތި ދުވަހުން ފެށިގެން ރާއްޖޭގެ މޫސުން ބަދަލުވެ ވިއްސާރަވާނެކަމަށް މޫސުމާބެހޭ އިދާރާއިން ލަފާކުރައްވައެވެ. އަދި ބުރާސްފަތިދުވަހުގެ ފަހުން ހޫނުމިން ދަށަށްދާން ފަށާނެކަމަށްވެސް މެޓް އޮފީހުން ލަފާކުރައްވައެވެ.
ދުނިޔޭގެ ފިނި ހޫނުމިނަކީ އެތައް ދިރުމެއްގެ ދިރިތިބުމާ ގުޅިފައިވާކަމެކެވެ. ފިނިގަދަވެގެން އަދި ހޫނުގަދަވުމުގެ ސަބަބުން އިންސާނުންނާއި އެތައް ދިރޭތަކެއްޗަކަށް އަސަރުކޮށް، ބައެއް ޤައުމުތަކުގައި މީހުން މަރުވެފައިވެއެވެ.
މީގެއިތުރުން ބައެއް ޤައުމުތަކުގައި ހޫނު ގަދަވުމުގެ ސަބަބުން ކަރަންޓު ބޭނުންކުރާ މިންވަރު އިތުރުވުމުން، ބައެއް ގަޑިތަކުގައި ކަރަންޓްގެ ޚިދުމަތް މެދުކަނޑާލާފައިވެސް އެބަހުއްޓެވެ. ރާއްޖެއަށް އެފަދަ ޙާލަތެއް ކުރިމަތިވިޔަނުދިނުމަށް ކަރަންޓު ބޭނުންކުރުމުގައި ސަމާލުކަން ދެއްވުމަށް ކަމާބެހޭ ފަރާތްތަކުން ވަނީ އިލްތިމާސް ކުރައްވާފައެވެ.