ބޭންކް އޮފް މޯލްޑިވްސް، ބީއެމްއެލްއިން ވިޔަފާރިތަކަށް ވާރު ކާޑު ދޫކުރުން މެދުކަނޑާލަން ނިންމައިފިއެވެ. ވާރު ކާޑަކީ ޓެކުހާގުޅޭ މުޢާމަލާތްތަކަށް ޚާއްޞަ ކާޑެކެވެ.
ބީއެމްއެލްއިން ބުނީ ވާރު ކާޑުގެ ބަދަލުގައި ދެން ދޫކުރާނީ ބިޒްނަސް ޑެބިޓްކާޑު ކަމަށެވެ. އެ ބޭންކުން ބުނީ ވާރު ކާޑު، މާސްޓަރކާޑު ބިޒްނަސް ޑެބިޓްކާޑަށް ބަދަލުކުރަން ނިންމާފައިވަނީ އެ ބޭންކްގެ ސްޓްރެޓެޖީގެ ދަށުން ކަމަށެވެ. އެގޮތުން އަންނަ މަހުގެ 5 ވަނަ ދުވަހުން ފެށިގެން ވާރު ކާޑު ދޫކުރުމާއި، ބަލައިގަތުން ހުއްޓާލާނެކަމަށް ބީއެމްއެލްއިން ބުނެއެވެ.
މިއީ ވިޔަފާރިތަކަށް ވެސް ފަސޭހަވާނެ ކަމެއްކަމަށް ބީއެމްއެލުން ބުނެއެވެ. ސަބަބަކީ ވާރު ކާޑުން ކުރިން ކުރެވެނީ ވިޔަފާރިތަކުން ކުރާ ޓެކުހާގުޅޭ މުއާމަލާތްތައް އެކަނިކަމަށްވާތީއެވެ. ނަމަވެސް މާސްޓަރކާޑު ބިޒްނަސް ޑެބިޓް ކާޑުން ވިޔަފާރީގެ އެހެނިހެން ކަންކަންވެސް ކުރެވޭނެނެއެވެ. އެގޮތުން ޔޫޓިލިޓީ ބިލުތައްވެސް ދެއްކޭނެއެވެ.
ބީއެމްއެލްއިން ބުނާ ގޮތުގައި މި ކާރޑަކީ ދުނިޔޭގެ ކޮންމެ ތަނެއްގައި ހުރެގެންވެސް ފަސޭހަކަމާއެކު ބޭނުންކުރެވޭނެ ކާޑެކެވެ. މި ކާޑު ބޭނުންކޮށްގެން ދުވާލެއްގެ މައްޗަށް އޭޓީއެމްއިން 25،000 ރުފިޔާ ނުވަތަ 1600 ޑޮލަރު ނެގޭނެއެވެ.