މަންޓާ އެއަރގެ ފްލީޓަށް އިތުރު ސީޕްލޭނެއް ގެނެސްފިއެވެ. މި ސީޕްލޭން ރާއްޖެ އައީ އިއްޔެއެވެ.
މިސީޕްލޭން ރާއްޖެ އައީ ޔޫއެސްއޭއިން ފުރައިގެން 6 ދުވަހުންނެވެ. މި ސީޕްލޭނާއެކު މަންޓާ އެއަރގެ ސީޕްލޭން ފްލީޓްގެ އަދަދު ވަނީ 19 އަށް އިތުރުވެފައެވެ. މި ސީޕްލޭން ކުރިއަށް އޮތް 2 ހަފްތާގެ ތެރޭގައި އޮޕަރޭޝަންގައި ބޭނުންކުރެވޭނެ ކަމަށް މަންޓާއިން ބުނެއެވެ.
މަންޓާއިން ދަނީ ރާއްޖޭގެ ގިނަ ރިސޯޓްތަކަކަށް ސީޕްލޭންގެ ޚިދުމަތް ދެމުންނެވެ. އެތެރޭގެ އުދުހުންތަކަށް ބަލާއިރު ރާއްޖޭގެ 3 އެއަރޕޯޓަކަށް މަންޓާއިން ދަނީ ދަތުރުކުރަމުންނެވެ. އެއީ ހޯރަފުށި، ދަރަވަންދޫ އަދި ކުޑަހުވަދޫ އެއަރޕޯޓެވެ.
ޑޮމެސްޓިކް ދަތުރުތަކުގައި މަންޓާއިން މިހާރު 4 ބޯޓެއް ދަނީ ބޭނުންކުރަމުންނެވެ. އެއީ އޭޓީއާރުގެ 3 ބޯޓާއި، ބީޗް ކްރާފްޓްގެ 1 ބޯޓެވެ.
މަންޓާ އެއަރއިން އެކުންފުނީގެ ފުރަތަމަ ސީޕްލޭން ގެނައީ އޮކްޓޯބަރު 2019ގައެވެ. އެކުންފުނިން ރަސްމީކޮށް އެތެރޭގެ އުދުހުންތައް ފެށީ ފެބުރުއަރީ 2019ގައެވެ.