ސަލްޓަންޕާކްގައި ހުރި ކަޅުވަކަރު މިސްކިތް ގދ. ތިނަދުއަށް ބަދަލުކުރެއްވުމަށް ސަރުކާރުން ނިންމަވައިފިއެވެ. ކަޅުވަކަރު މިސްކިތް ބަދަލުކުރެއްވުމަށް ކުރިން ނިންމަވާފައިވަނީ ހުޅުމާލޭގެ ދެވަނަ ފިޔަވަހީގެ ދަށުން ތަރައްޤީކުރައްވާ ހެރިޓޭޖް އައިލެންޑަށެވެ.
ކަޅުވަކަރު މިސްކިތުގައި ނަމާދުކުރުން މިއަހަރުގެ ޖެނުއަރީ ފުރަތަމަދުވަހުން ހުއްޓާލާފައިވާއިރު މިސްކިތް މިހާރު ހުރީ ރޫޅާލެއްވުމަށްޓަކައި ވަށައި ފެންސްޖައްސަވައި ބަންދުކޮށްފައެވެ. ހެރިޓޭޖް ޑިޕާޓްމެންޓުން ވިދާޅުވީ ކަޅުވަކަރު މިސްކިތް މިހާރު ބަދަލުކުރުމަށް ނިންމާފައިވަނީ ތިނަދޫ ހުކުރުމިސްކިތު ގޯތިތެރެއަށްކަމަށެވެ. ތިނަދޫ ހުކުރުމިސްކިތު ގޯތިތެރެއަކީ ދާދިފަހުން އެސަރަޙައްދު ކޮނުމުގެ މަސައްކަތެއްގެ ތެރެއިން އާޘާރީ ބިނާއެއްގެ އަސަރުތައް ފެނިފައިވާ ސަރަޙައްދެކެވެ.
މި އާޘާރީ ތަރާގަނޑު ހިމެނޭ ސަރަޙައްދު މިހާރު ވަނީ އާޘާރީ ތަނެއްގެ ގޮތުގައި ތަރައްޤީކުރެއްވުމަށް ސަރުކާރުން ނިންމަވާފައެވެ. ހެރިޓޭޖް ޑިޕާޓްމެންޓުން ވިދާޅުވީ ކަޅުވަކަރު މިސްކިތް ތިނަދުއަށް ބަދަލުކުރައްވައި ބަހައްޓަވާނީ ހުކުރުމިސްކިތު ގޯތިތެރޭގައި، ތަރާގަނޑުގެ އެއްފަރާތެއްގައިކަމަށެވެ. ކަޅުވަކަރު މިސްކިތަކީ ރޫޅައި ރޭވޭގޮތަށް ހަދާފައިވާ މިސްކިތެކެވެ. މީގެ ކުރިންވެސް މި މިސްކިތް ރޫޅާލައިގެން އެހެންތަންތަނަށް ބަދަލުކޮށްފައިވާކަން ފާހަގަކުރެވެއެވެ.