ރިޔަލު ކަނދެއްގައި ރާއްޖެ ވަށާ ބުރުޖެހުމަށް ކުރާ ދަތުރުގައި އުފަން ރަށަށް ދެވުމުން ތަފާތު އިޙްޞާޞްތަކެއް ކުރެވިއްޖެކަމަށްކަމަށް އަބުދުލްޣަފޫރު އަލީ، ގައްބެ ބުނެފިއެވެ. ދަތުރުގެ 80 އިންސައްތަ ރާސްތާ ކަޑައްތުކޮށް އަމިއްލަ ރަށް ށ.ފޭދޫއަށް ދެވުމުން ވަރަށްބޮޑު ހިތްހަމަޖެހުމެއް ލިބިއްޖެކަމަށް ގައްބެ ބުންޏެވެ. ރަށުން އޭނާއަށް މަރުހަބާކިއުމަށް މާލޭގައި އުޅޭ އޭނާގެ އާއިލާގެ މެމްބަރުންނާއި، ރަށުގައި ދިރިއުޅޭ އާއިލާގެ މެމްބަރުން ވަރަށް ބޮޑަށް ތައްޔާރުވެ، މުޅި ރަށުގެ ރައްޔިތުންގެ ފަރާތުން ހޫނުމަރުހަބާއެއް ކިޔާފައިވާކަމަށް ގައްބެ ބުންޏެވެ.
" މާލޭގައި ތިބި އާއިލާގެ މެމްބަރުންނާއި، ރަށުގައި ތިބި އާއިލާ މީހުން މިކަމުގައި ވަރަށްބޮޑަށް ބައިވެރިވެފައޮތްކަން އިނގޭ. މުޅި ރަށުގެ ރައްޔިތުން ވަރަށް ތަފާތު މަރުހަބާއެއްކީ. ވަރަށް އެހެންކަހަލަ އިޙުސާޞެއްކުރެވުނީ. " ގައްބެ ބުންޏެވެ.
ހަތަރުވަރަކަށް އަހަރަށްފަހު ތާރީޚީ ދަތުރުގައި އުފަން ރަށަށް ދިއުމަށް ކުރި ދަތުރުގައި ރަށް ދުރުން ފެނުމުންވެސް ހުރިހާކަމެއް އަވަސްވެ، ވަރަށް އެހެންކަހަލަ އިހުސާސެއް ކުރެވުނުކަމަށް ގައްބެ ބުންޏެވެ. ރަށުން މަރުހަބާކީ ޤަބޫލުކުރަންވެސް ދަތިގޮތަކަށްކަމަށާއި، ޘަޤާފީ ހަޓްތައް ހަދައި، ރަތް ދޫލައިގެ މަރުހަބާއެއް ކިޔާފައިވާކަން ގައްބެ އުފަލާއެކު ފާހަގަކުރިއެވެ.
ގައްބެ ބުނީ ދަތުރުގެ މިހާ ހިސާބަށް އާދެވުމުން ﷲއަށް ހަމްދާއި ޝުކުރުކުރާކަމަށެވެ. އަދި އާއިލާއަށާއި، ރަށުގެ ރައްޔިތުންނަށްވެސް ޝުކުރުއަދާކުރާކަމަށެވެ. މިއީ ވިޒިޓް މޯލްޑިވްސް 2016 އާއި ގުޅިގެން ރާއްޖޭގެ ފަތުރުވެރިކަން އިޝްތިހާރުކުރުމަށް ހިންގާ ހަރަކާތުގައި ހިމެނޭ އިވެންޓެކެވެ. އެޓޯލް ސެއިލަރއިން މިދަތުރު ކުރިއަށްގެންދަނީ ޓޫރިޒަމް މިނިސްޓްރީއާއި ގުޅިގެންނެވެ.