މި ރޯދަމަހު މަގުމަތީގައި ހިނގާ އެކްސިޑެންޓްތައް އިތުރުވެފައިވާކަމަށް މޯލްޑިވްސް ޕޮލިސް ސާރވިސްއިން ހާމަކުރައްވައިފިއެވެ.
މި ރޯދަމަހުގެ މިހާތަނަށް ހިނގި އެކްސިޑެންޓްތަކުގެ ރަސްމީ ތަފާސް ހިސާބުތައް ހާމަކޮށްފައި ނުވިޔަސް، ފުލުހުން ވިދާޅުވީ އެހެން އަހަރުތަކުގެ ރޯދަމަހާއި އަޅާބަލާއިރު މި ރޯދަމަހު މަގުމަތީގެ އެކްސިޑެންޓްތައް އިތުރުކަން ފާހަގަވެފައިވާކަމަށެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މޯލްޑިވްސް ޕޮލިސް ސާރވިސްގެ ޗީފް އިންސްޕެކްޓަރ އޮފް ޕޮލިސް އަހުމަދު ފަސީހު ވިދާޅުވީ މި ރޯދަމަހު އެންމެ ގިނައިން އެކްސިޑެންޓްތައް ހިނގާފައިވަނީ ވެހިކަލްތައް މަގުމަތީގައި އެންމެ ގިނަވާ ވަގުތުތަކުގައިކަމަށެވެ. އެގޮތުން އޮފީސްތަކަށް މީހުން ދާ ވަގުތުތަކުގައާއި، ހަވީރު ފިނިބުރުޖަހަން މީހުން ނިކުންނަ ވަގުތުގެ އިތުރުން ރޭގަނޑުގެ އިރާކޮޅުގެ ވަގުތު އެކްސިޑެންޓްތައް އިތުރުކަން ފާހަގަކުރެވިފައިވާކަމަށް ފަސީހް ވިދާޅުވިއެވެ.
ފަސީހު ވިދާޅުވީ އެކްސިޑެންޓްތައް ގިނައިން ހިނގާފައިވަނީ ފަރުވާކުޑަކުރުމުގެ އަމަލެއްގެ ސަބަބުންކަމަށެެވެ.
"ބްރިޖް ހައިވޭގައި ހިނގާފައިވާ އެކްސިޑެންތަކަށް ބާލާއިރު އެންމެ ގިނައިން އެކްސިޑެންޓް ހިނގާފައިވަނީ އެއް އުޅަނދު އަނެއް އުޅަދާއާއި ދެމެދު ބަހައްޓަން ޖެހޭ ދުރުމިން ނުބެހެއްޓުމުގެ ސަބަބުން، އެކަތި އަނެއްކައްޗާއި މުޑިއަރައިގެން" ފަސީހު ވިދާޅުވިއެވެ.
މާލެ އަދި ހުޅުމާލޭގެ މަގުތަކަކީ ބާރު ބޮޑު މަގުތަކެއްކަން ފާހަގަކުރައްވާ ފަސީހު ވިދާޅުވީ ރަށު ތެރޭގައި ގިނަ އެކްސިޑެންޓްތައް ހިނގާފައިވަނީ ކޮންޓްރޯލްނުވާހާ ބާރު ސްޕީޑްގައި ވެހިކަލް ދުއްވުމުގެ ސަބަބުންނާއި، ޔޫޓާން ނަގަން އުޅުމުން ނުވަތަ ބަލަންޖެހޭ ވަރަށް ނުބަލާ ގޯޅި އަޅަން އުޅުމުގެ ތެރޭގައިކަމަށެވެ.
ރާއްޖެ މިއަދު ޕްރޮގްރާމްގައި ވާހަކަދައްކަވަމުން ސަބް އިންސްޕެކްޓަރ ޕޮލިސް އިބްރާހިމް ޒާހިރު ވިދާޅުވީ ހިނގާ ބިނގާވެ އުޅޭ ފަރާއްތަކުންވެސް މަގު ހުރަސް ކުރުމުގައި މިހާރަށް ވުރެ ބޮޑަށް ސަމާލުކަން ދޭންޖެހޭކަމަށެވެ. އެގޮތުން މަގު ހުރަސް ކުރާ ފަރާތްތަކަށް ކަފިހި ހުރަސް ހާއްސަކޮށްފައި އޮންނައިރުވެސް، އެ ނޫން ދިމާތަކުން މަގު ހުރަސް ކުރާކަން ފާހަގަވެފައިވާކަމަށް އެނާ ވިދާޅުވިއެވެ.
ޒާހިރު ވިދާޅުވީ ކަފިހި ހުރަހުން މަގު ހުރަސްކުރާއިރުވެސް ކުއްލިއަކަށް މަގަށް ނިކުތުމުގެ ބަދަލުގައި ކަފިހި ހުރަސް ކައިރީގައި ކުޑަކޮށް މަޑުކޮށްލުމަށްފަހު މަގު ހުރަސްކުރަން ހިނގައިގަތުން މުހިއްމުކަމަށެވެ. އެކަމުގެ ސަބަބުން ދުއްވާފައިވާ އަންނަ އުޅަނދަށްވެސް މީހަކު މަގު ހުރަސްކުރަން އުޅޭކަން ފާހަގަވެ، އުޅަނދުތައް މަޑުކުރަން ފަސޭހަވާނޭކަން ޒާހިރު ފާހަގަކުރެއްވިއެވެ.
ކޮންމެ ރޯދަމަހަކީވެސް މަގުތައް އިތުރަށް ހަލަބޮލިވެ، ބާޒާރު ކުރުމަށާއި، މިސްކިތްތަކަށާއި، ފިނި ބުރުޖެހުމަށްވެސް ގިނަ ބަޔަކު ނިކުންނަ މަހެކެވެ. މިއާއެކު އަހަރުގެ އެހެން މަސްތަކާއި އަޅާބަލާއިރު މަގުތަކުގެ ކާރޫބާރު ބޮޑުވެ، ބައެއް މީޙުންނަށް އެކަމުގެ ތަކްލީފާއި ކުރިމަތިލާންޖެހެއެވެ. އެކަންކަން ހައްލުކުރަން ކޮންމެ ރޯދަމަހަކާއި ދިމާކޮށް ފުލުހުން ހާއްސަ މަސައްކަތްތަކެއް ކުރަމުންދެއެވެ. އެގޮތުން މި ރޯދަމަހުވެސް މުދާ އުފުލުމަށާއި އެކި ބޭނުންތަކަށް މަގުމަތީގައި ދުއްވާ އުޅަނދުތަކަށާއި، ހިނގާ ބިގާވެ އުޅޭ މީހުންނަށް ފަސޭހައިން މަގު ބޭނުން ކުރެވޭނެ ގޮތްތަކެއް ފަހި ކުރުމަށް ފުލުހުން ވަނީ މާލޭގެ ޓްރެފިކް ފްލޯއަށް ބޮޑެތި ބަދަލުތަކެއް ގެނެސް، ޕްލޭނެއް އެކުލަވާލާފައެވެ.
ފުލުހުން އެކުލަވާލާފައިވާ ޕްލޭންގެ ދަށުން ބައެއް ގޯޅިތަކާއި ބައެއް މަގުތަކަށް ހަތަރު ފުރޮޅުލީ އުޅަނދުތަކަށް ނުވަދެވޭ ގޮތަށް ބައެއް ވަގުތުތަކުގައި ބަންދުކުރާނެއެވެ. މީގެއިތުރުން ރޯދަމަހު މާލޭގައި ޓްރެފިކް އެންމެ ބާރު ބޮޑުވާ ސަރަހައްދުތަކުގައި ޓްރެފިކް މެނޭޖްކުރުމަށް ފުލުހުން ދަނީ ހަރަކާތްތެރިވަމުންނެވެ.