މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރު ކަމަށް ބޭފުޅަކު އައްޔަންކުރުމަށްޓަކައި، ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މަޖިލީހަށް ފޮނުއްވި ބޭފުޅުންގެ ތެރެއިން ދެ ބޭފުޅަކަށް ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީން ރުހުންދީފިއެވެ.
އެ ނަންތައް ދިރާސާކުރުމުގެ ތެރެއިން އެ ބޭފުޅުންނަށް ޤާނޫނު އެނގިވަޑައިގަންނަވާ މިންވަރު ބެލުމުގެ ޓެސްޓުގެ އިތުރުން ކޮމިޓީން އެ ބޭފުޅުންނާ އިންޓަވިއުކުރުމަށްފަހު، ނެގި ވޯޓުން ޝިހާމް މުޙައްމަދު ވަހީދާއި، ޞަފާ ޝަފީޤުގެ ތެރެއިން ބޭފުޅަކު ބްރޯޑްކޮމްއަށް އައްޔަންކުރަން މަޖިލީހުން ރުހުންދޭން ފެންނަ ކަމަށް ފާސްކޮށް ކޮމިޓީން ވަނީ އެ މައްސަލަ މަޖިލީހުގެ ތަޅުމަށް ފޮނުވާފައެވެ.
ކޮމިޓީން މި ދެ ބޭފުޅުންގެ ނަންވެސް ފާސްކުރީ އެ ވަގުތު ކޮމިޓީގައި ތިއްބެވި 9 މެންބަރުންގެ އިއްތިފާގުންނެވެ. ކޮމެޓީ މަރުހަލާއަށްފަހު، މި ދެ ބޭފުޅުންގެ ތެރެއިން ބްރޯޑްކޮމަށް އައްޔަންކުރާނެ މެންބަރެއްގެ ނަން ފާސްކުރާނީ މަޖިލިސް ތަޅުމުންނެވެ.
ބްރޯޑްކޮމްގެ މެމްބަރު އަމްޖަދު އިބްރާހީމްގެ މެންބަރުކަމުގެ މުއްދަތު މާރިޗު 15 ގެ ނިޔަލަށް ހަމަވާތީ، އެ މަގާމަށް މެންބަރަކު އައްޔަންކުރުމަށް ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ 4 ބޭފުޅެއްގެ ނަން މަޖިލީހަށް ފޮނުވިއެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، އަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމްއެވެ.