ރާއްޖެއަށް ކުނި އެތެރެކުރެވޭގޮތަށް ޤާނޫނުގައި އޮތް މާއްދާ ބަދަލުކޮށް، ކުނި އެތެރެ ކުރުމަކީ މަނާކަމެއްގެ ގޮތުގައި ކަނޑައެޅުމަށް، ކުނި މެނޭޖުކުރުމުގެ ޤާނޫނަށް އިޞްލާހު ހުށައަޅުއްވައިފިއެވެ. މި އިޞްލާހު ސަރުކާރުގެ ފަރާތުން ރައްޔިތުންގެ މަޖިލީހަށް ހުށައެޅުއްވީ މަޖިލީހުގެ ކޮމަންޑޫ ދާއިރާގެ މެންބަރު މުހައްމަދު ރާޝިދެވެ.
ރާއްޖޭގައި ފުރަތަމަ ފަހަރަށް ކުނި މެނޭޖުކުރުމުގެ ޤާނޫނެއް އެކުލަވާލާ ޢަމަލުކުރަން ފަށާފައިވަނީ މިދިޔަ ޑިސެމްބަރު މަހުގެ 18 ވަނަ ދުވަހުއެވެ. މިއީ ކުނި މެނޭޖުކުރުމުގެ މަސައްކަތްތައް ވަކި ނިޒާމެއްގެ ތެރެއިން ކުރިއަށްގެންދިއުމަށް މަގުފަހިކުރުމަށް އެކުލަވާލި ޤާނޫނެކެވެ. ޤާނޫނުގައި ކުނި މެނޭޖްގެކުރުމުގެ ޒިންމާތައް ބެހިފައިވާގޮތާއި، އަތޮޅު އަދި ރަށު ފެންވަރުގައި މަސައްކަތްތައް ކުރިއަށްގެންދާނެ ގޮތްތައްވެސް ބަޔާންކޮށްފައިވެއެވެ. އަދި ކުންޏަކީ މަންފާ ލިބޭނެ ކަމަކަށް ހެދުމަށް މަސައްކަތްކުރުމުގެ ޢަމާޒުވެސް މި ޤާނޫނުގައި ހިމެނެއެވެ.
ނަމަވެސް ޤާނޫނު ފާސްވެގެން އައިއިރު ޢާންމުން އަދި އެންވަޔަރަމަންޓް މިނިސްޓްރީގެވެސް އެންމެ ބޮޑު ކަންބޮޑުވުމެއް އޮތީ، މަޝްރޫޢުތައް ހިންގުމުގެ ބޭނުމަށް ރާއްޖެއަށް ކުނި އެތެރެކުރެވޭގޮތަށް އޮތް މާއްދާއެވެ. މި މާއްދާގައި ބުނެފައިވަނީ، ކުނިން ހަކަތަ އުފެއްދުންފަދަ މަޝްރޫޢުތައް ކުރިއަށްގެންދިއުމަށް، ރާއްޖެއަށް ކުނި އެތެރެކުރުމުގެ ހުއްދަ ދެވޭނެކަމަށެވެ. މިކަމާއި މެދު ރައްޔިތުންނާއި، މިނިސްޓްރީގެ ކަންބޮޑުވުން އޮތުމާއެކު، އެ މާއްދާއާއި ގުޅިގެން އަކުލަވާލަންޖެހޭ އުސޫލުތައްވެސް އެކުލަވާނުލުމަށް މިނިސްޓްރީއިން ނިންމެވިއެވެ. މިއާއެކު މިވަނީ އެ މާއްދާ އިޞްލާހު ކުރުމަށް ރައްޔިތުންގެ މަޖިލީހަށް ހުށައަޅުއްވާފައެވެ.
ސަރުކާރުގެ ފަރާތުން މަޖިލީހަށް އެ ބިލު ހުށައެޅުމުގެ ބޭނުމަކީ ދިވެހިރާއްޖޭއައް ކުނި އެތެރެކުރުމާ ގުޅޭގޮތުން ބަޔާންކުރާ އުސޫލުތައް ސަރުކާރުގެ ސިޔާސަތުތަކާއި އެއްގޮތްކުރުމެވެ. އަދި ދިވެހިރާއްޖެއަށް ކުނި އެތެރެކުރުމަކީ މަނާކަމެއްކަމުގައި ކަނޑައެޅުމާއި، ކުނި މެނޭޖްކުރުމުގެ ކަންކަން ދެމެހެއްޓެނިވި ގޮތެއްގައި ހިންގުމަކީވެސް މި ބިލު ހުށައެޅުއްވުމުގެ މަޤްޞަދެއްކަމަށް ބަޔާންކޮށްފައިވެއެވެ. މީގެ އިތުރުން ގާނޫނު ތަންފީޒު ކުރާ އިދާރާތައް ކަމުގައިވާ އެންވަޔަރަމަންޓް މިނިސްޓްރީއާއި ޔުޓިލިޓީ ރެގިއުލޭޓަރީ އޮތޯރަޓީއާއި އެންވަރްމަންޓަލް ޕްރޮޓެކްޝަން އެޖެންސީއިން އަދާކުރާ ދައުރު ސާފުކުރުންވެސް މި އިޞްލާހުގެ ބޭނުމެއްކަމަށް ބަޔާންކޮށްފައިވެއެވެ.
ކުނި މެނޭޖުކުރުމުގެ ޤާނޫނަށް ސަރުކާރުން ހުށައެޅުއްވި އިޞްލާހުތަކުގެ ތެރޭގައި، ކުނި މެނޭޖުކުރުމަށް ބޭނުންކުރެވޭ ވަސީލަތްތައް ޓެސްޓްކޮށް ސަރޓިފައިކުރާނެ ޤަވާއިދުތައް އެކުލަވާލުން ހިމެނެއެވެ. މީގެ އިތުރުން ކުނި މެނޭޖުކުރާ މަރުކަޒުތައް ޤާއިމްކުރާ ސަރަހައްދުތައް ކަނޑައެޅުމަށް ތިމާވެށީގެ ގޮތުންބަލަންޖެހޭ މިންގަނޑުތައް އެކުލަވާލާ އާންމުކުރުމާއި، ކުނި މެނޭޖުކުރުމުގެ ޤައުމީ މާސްޓަރ ޕްލޭން ތަންފިޒްކުރުންވެސް ސަރުކާރުން ހުށައެޅުއްވި އިޞްލާހުގައިވެއެވެ.
ކުނި މެނޭޖުކުރުމާއި ބެހޭ އައު ޤާނޫނާއެކު، ކުނިން ހަކަތަ އުފެއްދުމުގެ ބިޔަ މަޝްރޫޢުތަކެއް ފެށުމަށް ސަރުކާރުން އަންނަނީ ތައްޔާރުވަމުންނެވެ. އެގޮތުން އައްޑޫ ސިޓީއާއި، މާލެ ސަރަޙައްދުގެ ކުނި މެނޭޖްކުރުމަށް ތިލަފުށީގައި ހިންގާ ބޮޑު މަޝްރޫޢުގައިވެސް ކުނިން ހަކަތަ އުފެއްދުމުގެ މަޝްރޫޢު ހިމެނެއެވެ. ނަމަވެސް މި މަޝްރޫޢުތަކަކީ ރާއްޖޭގައި އުފައްދާ ކުނީގެ ކެޕޭސިޓީއަށް ރިޢާޔަތްކޮށް ކުރިއަށްގެންދާ މަޝްރޫޢުތަކެކެވެ.