ތިލަމާލެ ބްރިޖްގެ މަސައްކަތް ހުއްޓުމެއް ނެތި ކުރިއަށްދާކަމަށާއި، ވިލިމާލެ ފަޅިން ކަނޑުގައި ޖަގާ ތަނބުތަކުގެ މަސައްކަތްވެސް މިހާރު ފަށައިގެން ކުރިއަށްދާ ކަމަށް ޕްލޭނިން މިނިސްޓްރީން ވިދާޅުވެއްޖެއެވެ.
ބްރިޖްގެ މަސައްކަތުގައި މިވަގުތު ކުރިއަށްދަނީ، މާލެއިން ވިލިނގިއްޔަށް ގުޅާލާ ސްކޯޕްގައި ހިމެނޭ މަސައްކަތްތަކެވެ.
މި މަސައްކަތް ކުރިއަށްގެންދަނީ އިންޑިއާގެ އެފްކޮންސް ކުންފުންޏާ ހަވާލުކޮށްގެންނެވެ. ގްރޭޓަރ މާލެ ކަނެކްޓިވިޓީ ޕްރޮޖެކްޓްގެ ދަށުން މާލެ-ވިލިމާލެ-ގުޅީފަޅު އަދި ތިލަފުށި ގުޅާލާނެއެވެ.
ބްރިޖްގެ މަސައްކަތް ކުރިއަށްދާގޮތާއި ގުޅޭ މަޢުލޫމާތު ޕީއެސްއެމް ނިއުސްއާ ހިއްސާކުރައްވަމުން، ޕްލޭނިން މިނިސްޓްރީގެ ފަރާތުން މިޕްރޮޖެކްޓާއި ހަވާލުވެ ހުންނެވި ޕްރޮޖެކްޓް މެނޭޖަރ މުޙައްމަދު ޖިނާން ވިދާޅުވީ، ކަނޑުގައި ޖަހާ ޖުމްލަ 8 ތަނބެއްގެ ޕައިލިން މަސައްކަތް ކުރިއަށްދާކަމަށެވެ.
މީގެތެރޭގައި ހިމެނެނީ ވިލިމާލެ ފަޅިން މަސައްކަތް ކުރިއަށްދާ 6 ތަނބާއި، މާލެ ފަޅިން ޖަހާ 2 ތަނބުގެ ޕައިލިން މަސައްކަތެވެ.
ބްރިޖްގެ މަސައްކަތުގައި ޕްރީފެބްރިކޭޓެޑް ގިނަ މަސައްކަތްތަކެއް ހިމެނެއެވެ. ޖިނާން ވިދާޅުވީ ބްރިޖް ގުޅާލާ ސުޕަރ ސްޓްރަކްޗަރ މަސައްކަތްތައް މާލޭގައި ކުރިއަށްދާކަމަށެވެ.
ބްރިޖްގެ މަސައްކަތަށް އެންމެ ފުރަތަމަ ރާއްޖެ އައި މައި އެއް އުޅަނދު "ރުމައިލާ" މިހާރު ވަނީ ރާއްޖެއިން ފުރާފައެވެ. ޕްލޭނިން މިނިސްޓްރީން ވިދާޅުވީ އެ އުޅަނދު ގޮސްފައިވަނީ، އެއުޅަނދު ބޭނުންކޮށްގެން ކުރާ މަސައްކަތްތައް ނިމުމުންކަމަށެވެ. އަދި ޕްރޮޖެޓްގެ ކޮންޓްރެކްޓަރު ރާއްޖެއަށް މޮބިލައިޒް ކުރަމުންދަނީ އެ ވަގުތަކަށް ބޭނުންވާ ވަސީލަތްތައްކަމަށް މިނިސްޓްރީން ވިދާޅުވެއެވެ.
ޖިނާން ވިދާޅުވީ ކުރިއަށްހުރި މަސައްކަތްތަކަށް ބޭނުންވާ އުޅަނދުތައް ރާއްޖެއަށް އަންނަމުންދާނެކަމަށާއި، ބޭނުންވާ ސާމާނާއި ވަސީލަތްތައް ގެންނަމުންދަނީ، އެ ވަގުތަކަށް ބޭނުންވާ މަސައްކަތްތަކަށް ބަލައިގެންކަމަށެވެ.
އުޅަނދު ދިޔަ ނަމަވެސް މަސައްކަތް ނުހުއްޓޭކަމަށާއި، ޕްރޮޖެކްޓްގެ މަސައްކަތް ބާރަށް ކުރިއަށްދާ ކަމަށް ޕްލޭނިން މިނިސްޓްރީން ވިދާޅުވެއެވެ.
މިހާރު މަސައްކަތްތައް ކުރިއަށްދާގޮތަށް ބަލާއިރު ފޭސް އެކެއްގައި ހިމެނޭ، މާލެއިން ގުޅީފަޅާއި ހަމައަށް ގުޅާލުމުގެ މަސައްކަތް މިއަހަރުގެ ޑިސެމްބަރަށް ނިމޭނެ ކަމަށްވެސް ޕްލޭނިން މިނިސްޓްރީން ވިދާޅުވެއެވެ.
ތިލަފުއްޓާއި ހަމައަށް ބްރިޖް ގުޅާލުމުގެ މަސައްކަތް 2024 ވަނަ އަހަރުގެ މެދާއި ހަމައަށް ނިންމުމަށް ސަރުކާރުން ވަނީ ޢަމާޒު ހިފާފައެވެ.
މި މަޝްރޫއުގެ ދަށުން ހަދާ 3 ބުރިޖާއި، ކޯސްވޭ އަދި މަގުތަކުގެ ނެޓްވޯކުގެ ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ، ކޮންމެ ރަށަކަށް އަރާ ފޭބުމަށް އިންޓަރޗޭންޖް ޕޮއިންޓްތަކާއި، ޕާކިން ސަރަހައްދުތައްވެސް ހުންނާނެއެވެ.
މުޅި މި މަޝްރޫޢަށް 500 މިލިއަން ޑޮލަރު ހޭދަވާނެއެވެ. އެއީ 7 ބިލިއަނަށްވުރެ ގިނަ ރުފިޔާއެވެ. މިމަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. އަދި ދިވެހި ސަރުކާރުންވެސް މި މަޝްރޫޢަށް ޚަރަދުކުރުމަށްވެސް ވަނީ ހަމަޖެހިފައެވެ.