މިފްކޯގެ ހިންގުމުގެ ނިޒާމު ހަރުދަނާކުރުމަށް، ރައްކާތެރިކަމާ އެކު ވިސްލްބްލޯ ކުރެވޭނެ ނިޒާމެއް ގާއިމްކޮށްފިއެވެ.
ވިސްލްބްލޯ ކުރާ ނިޒާމަކީ ކުންފުނީގެ މުދަލާއި، ފައިސާ އަދި އެހެނިހެން ވަސީލަތްތައް ބަލަހައްޓާ ބޭނުންކުރުމުގަޔާއި އޮޕަރޭޝަންތަކުގައި ކުންފުންޏަށް ގެއްލުންވާނެހެން އުސޫލުތަކާއި ހިލާފަށް އެތެރޭގައި ހިންގާ ކަންކަން ކުންފުނީގެ އިންޓާނަލް އޮޑިޓާއި ބޯޑަށް އެންގުމަށް ބޭނުންވާ ފަރާތްތަކަށް އެކަން ކުރުމަށް މަގުފަހިކޮށްދިނުމަށް އުފައްދާފައިވާ ނިޒާމެކެވެ.
މިފްކޯއިން ބުނީ އެ ކުންފުނީގައި މިހާރު ޤާއިމްކޮށްފައިވާ ވިސްލްބްލޯ ކުރާ ނިޒާމުގެ ތެރެއިން ކުންފުނީގެ މުވައްޒަފުންނާއި އާންމުންނަށްވެސް މައްސަލަ ހުށައެޅޭނެކަމަށެވެ. ވިސްލްބްލޯ ކުރާ ނިޒާމަށް އިތުބާރު ދެމެހެއްޓުމަށްޓަކައި މައްސަލަ ހުށައަޅާ ފަރާތްތަކުގެ މައުލޫމާތު ރައްކާތެރިކޮށް ބެލެހެއްޓުމަށްޓަކައި ޚާއްސަ އިންތިޒާމްތަކެއް ހަމަޖެހިފައިވާކަމަށް މިފްކޯއިން ވިދާޅުވިއެވެ. އެގޮތުން މި ނިޒާމަކީ ކުންފުނީގެ ބޭރުން، އިންޓާނަލް އޮޑިޓް ޑިޕާޓްމަންޓްގެ ދަށުން މިފްކޯގެ ބޯޑުން އޮޑިޓް ކޮމިޓީއަށް ރިޕޯޓްކުރެވޭ ގޮތައް އެކުލަވާލާފައިވާ ނިޒާމެކެވެ. އަދި މި ނިޒާމްގެ ދަށުން މައްސަލައެއް ރިޕޯޓް ކުރާ ފަރާތުގެ ވަނަވަރު ނޭންގޭގޮތައް ރިޕޯޓް ކުރެވޭނެކަމަށް މިފްކޯއިން ވިދާޅުވިއެވެ.
މިފްކޯގެ ވެބްސައިޓްގައިވާ ވިސްލްބްލޯވަރ ލިންކުން މައްސަލަ ހުށައެޅޭނެއެވެ. އަދި ވިސްލްބްލޮވަރ ހޮޓްލައިން 7212141 އަށް ގުޅައިގެން އަދި ވައިބަރ ނުވަތަ ވަޓްސްއެޕް މެދުވެރިކޮށްވެސް މައްސަލަ ހުށައެޅޭނެއެވެ. ހުށައަޅާ ހުރިހައި މައްސަލައެއްވެސް ބަލާ ފިޔަވަޅު އަޅާނެކަމަށް މިފްކޯއިން ވަނީ ވިދާޅުވެފައެވެ.