ގއ.ވިލިނގިއްޔަކީ ދެކުނުގެ މަސްވެރިކަމުގެ ސިނާޢަތުގައި އެންމެ ބޮޑު ޙިއްސާއެއް އޮތް އެއް ރަށެކެވެ. ރަށަށް މަސްވެރިކަމުގެ ސިނާޢަތުން ބޮޑު އާމްދަނީއެއް ވަންނައިރު، ހަމައެކަނި ވިލިނގިލީގައިވެސް ކަންނެލީގެ މަސްވެރިކަންކުރާ 23 ދޯނި އޮވެއެވެ. ރަށުގެ ބަނދަރުތެރެ ފުރިފައި އޮންނަނީ މަސް ދޯނިތަކުންނެވެ.
ދެކުނުގެ މަސްވެރިކަމުގައި މުހިއްމު އެއް ރަށަށް ގއ. ވިލިގިނލި ވީނަމަވެސް އެރަށުގެ މަސްވެރިންނަށާއި އެރަށަށް އަންނަ މަސްވެރިންނަށްވެސް ކުރިމަތިވާ އެންމެ ބޮޑު އެއް ދައްޗަކީ ބަނދަރުގެ ޖާގައިގެ ދަތިކަމެވެ. ތިރީހަކަށް އަހަރު ވެފައިވާ އެރަށުގެ ބަނދަރަކީ ރާއްޖޭގެ އެންމެ ބޮޑެތި ބަނދަރުތަކުން ބަނދަރެކެވެ. ނަމަވެސް ދިމާވެފައިވާ ބޮޑު މައްސަލައަކީ ބަނދަރު އޮތް ދަތި ޙާލަތެވެ.
ވިލިނގިލީ ކައުންސިލުން ވިދާޅުވީ ބަނދަރުގެ އެއްގަމު ތޮށިން ބައިބައި ކެނޑިގެން ވެއްޓުމާއި، އަދި އޮޑިދޯނި އަޅާފައި ބޭއްވޭނެ ޖާގަވެސް ބަނދަރުގައި ނެތުމަކީ ރައްޔިތުންގެ ކަންބޮޑުވުމެކެވެ. ވިލިނގިލީ ކައުންސިލުން ވިދާޅުވީ، ބަނދަރުގެ މަސައްކަތަކީ އެރަށުގެ ރައްޔިތުންގެ އެތައް ދުވަހެއްވީ އުއްމީދެއްކަމަށެވެ. އަދި ރަށުގެ އިޤްތިޞާދާއި ސީދާގޮތުން ގުޅިފައިވާކަމެއްގެ ގޮތުގައި ކައުންސިލުން މިކަން ފާހަގަކުރައްވައެވެ.
ބަނދަރު ހަލާކުވެމަރާމާތު ނުކުރެވި ޒަމާންތަކެއް ފާއިތުވުމަށްފަހު، އަދި ރައްޔިތުންގެ ދިގު އިންތާޒަރަކަށްފަހު އެ ތަކުލީފުތަކަށް ނިމުމެއް އަންނަނޭކަމުގެ ކޮޅުމަތި މިހާރު ވަނީ ފެންނަން ފަށާފައެވެ. އެއީ ސަރުކާރުން ވަނީ އެރަށުގައި ޒަމާނީތަނަވަސް ބަނދަރެއް ތަރައްޤީކުރުމުގެ މަސައްކަތް މިހާރު ފަށާފައެވެ.
"ހަގީގަތުގައި ދައްނަވާނަމަ މީގެ ކުރިންވެސް ބަނދަރުގެ މަސައްކަތް ރަނގަޅު ކުރުމަށް މަސައްކަތްތަކެއް ކުރި އެކަމަކު އެއްވެސް ކުރިއެރުމެއް ނުލިބޭ. އެކަމަކު މިހާރު އެމްޓީސީސީއިން މި މަސައްކަތް ކުރަމުންދާ ސްޕީޑް ރަނގަޅު. އަޅުގަނޑުމެންވެސް ވަރަށް ގާތުން މި މަސައްކަތް ބަލަމުން މި ދަނީ. ރައްޔިތުންގެވެސް ވަރަށް ބޮޑު ސަމާލުކަމެއް ހަމަ ބަނދަރުގެ މަސައްކަތައް އެބަހުރި" ކައުންސިލުން ވިދާޅުވިއެވެ.
ކޫއްޑޫއަށް މަސްކިރުވުމަށް ރާއްޖޭގެ އެންމެ އުތުރާއި ދެކުނުން އަންނަ ދޯނިތައް މަޑުކޮށްލުމަށް ވަރަށް ގިނައިން ވިލިނގިއްޔަށް އައިނަމަވެސް ބަނދަރުގެ ޖާގައިގެ ދަތިކަމާއެކު އެފުރުޞަތު ތަނަވަސްކުރެވޭނެ މަގެއް މިވަގުތު ނެތްކަން ކައުންސިލުން ފާހަގަކުރައްވައެވެ.
އެހެންކަމުން ބަނދަރުގެ މަސައްކަތް ނިމިގެންދާއިރު ވިލިނގިލީގެ މަސްވެރިންކަން އިތުރަށް ފުޅާވެ، އެރަށަށް އަންނަ މަސްދޯނިތަކަށްވެސް ފުރިހަމަ ޚިދުމަތެއް ފޯރުކޮށްދިނުމަކީ ވިލިނގިލީ ކައުންސިލާއި ރައްޔިތުންގެވެސް އުއްމީދެކެވެ.
ވިލިނގިލީ ބަނދަރުގެ އާ ހާބާ ބޭސިން ފުން ކުރުމުގެ ބޮޑުބައެއްގެ މަސައްކަތް މިހާރު ވަނީ ނިންމާލާފައެވެ.
ވިލިނގިލި ބަނދަރުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާއި ޙަވާލުކޮށްގެން މިހާރުވަނީ 3 ވަނަ ފިޔަވަހީގެ މަސައްކަތް ފަށާފައިވެއެވެ. ގއ. ވިލިނގިލީ ބަނދަރު ތަރައްޤީ ކުރުމުގެ މަޝްރޫޢު (ތިންވަނަ ފިޔަވަހި) ގެ ދަށުން، އައު ހާބަރ ފުންކުރުމުގެ މަސައްކަތް މިހާރު ވަނީ 45 އިންސައްތަ ފުރިހަމަކުރެވިފައިކަމަށާއި، އެއްގަމު ތޮށިލުމުގެ މަސައްކަތް މިހާރު ވަނީ ފަށާފައިކަމަށް އެމްޓީސީއިން ވިދާޅުވެއެވެ.
މި މަޝްރޫޢުގެ ދަށުން، 59,536.80 ކިއުބިކް މީޓަރުގެ ސަރަޙައްދެއްގެ ހާބަރ ބޭސިން ފުންކުރުމާއި، 275 މީޓަރުގެ ސަރަޙައްދެއްގައި ބޭރުތޮށި ލުމާއި، 613 މީޓަރުގެ ސަރަޙައްދެއްގައި ރިވެޓްމެންޓް ޖެހުން ހިމެނެއެވެ. މީގެ އިތުރުން 105 މީޓަރުގެ ސަރަޙައްދެއްގައި ގްރޮއިން ޖެހުމާއި، 685 މީޓަރުގެ ސަރަޙައްދެއްގައި އެއްގަމުތޮށި ލުމުގެ މަސައްކަތް ހިމެނެއެވެ. މި މަޝްރޫޢަކީ 107.86 މިލިއަން ރުފިޔާގެ މަޝްރޫއެކެއެވެ.