ރޯދަމަހަކީ މަގުތައް އިތުރަށް ހަލަބޮލިވެ، ބާޒާރު ކުރުމަށާއި، މިސްކިތްތަކަށާއި، ފިނި ބުރުޖެހުމަށްވެސް ގިނަ ބަޔަކު ނިކުންނަ މަހެކެވެ. މިއާއެކު މަގުތަކުގެ ކާރޫބާރު ބޮޑުވެ އެތައް ބަޔަކަށް އެކަމުގެ ތަކްލީފާ ކުރިމަތިލާންޖެހެއެވެ. މިއާއެކު ކޮންމެ ރޯދަމަހެއްގައިވެސް ރައްޔިތުންނަށް ފަސޭހަވާނެހެން ކާރޫބާރު ކުޑަކުރުމަށް ފުލުހުން ޚާއްޞަ މަސައްކަތްތަކެއް ކުރެއެވެ. އެގޮތުން ރޯދަމަހު މުދާ އުފުލުމުގައާއި، އެކި ބޭނުންތަކަށް މަގުމަތީގައި ދުއްވާ އުޅަނދުތަކަށާއި، ހިނގާ ބިގާވެ އުޅޭ މީހުންނަށް ފަސޭހައިން މަގު ބޭނުން ކުރެވޭނެ ގޮތްތަކެއް ފަހި ކުރުމަށް މި ރޯދަމަހަށްވެސް ޚާއްސަ ޕްލޭނެއް ފުލުހުން ވަނީ އެކުލަވާލާފައެވެ.
މި ޕްލޭންގެ ދަށުން މާލޭގެ ޓްރެފިކަށް މިވަނީ ބޮޑެތި ބަދަލްތަކެއް ގެނެސްފައެވެ. އެގޮތުން ޖަމާލުއްދީން ސްކޫލުން ފެށިގެން މަޖީދީމަގާއި ހަމައަށް އޮންނަ ރަށްދެބައި މަގުގެ ސަރަހައްދާއި، ރަށްދެބައި މަގަށް ނުކުމެވޭ ގޯޅިތައްކަށް ހަތަރު ފުރޮޅުލީ އުޅަނދުތަކަށް ނުވަދެވޭގޮތަށް ވަނީ ހަދާފައެވެ. އަދި ބާޒާރުމަތިން ބޮޑުތަކުރުފާނު މަގާއި، އަމީރު އަހުމަދު މަގާއި ދެމެދު ހުންނަ ބައެއް މަގުތައްވެސް ވަނީ ހަތަރު ފުރޮޅުލީ އުޅަނދުތަކަށް ބަންދުކޮށްފަ އެވެ.
އެހެން މަސްތެކެކޭ ހިލާފަށް ރޯދަ މަހަކީ މިސްކިތްތައް މީހުން ދާ އަދަދު އިތުރުވާ ދުވަސްވަރަކަށް ވުމުން މާލޭގެ މިސްކިތްތަކަށް ނަމާދުކުރުމަށްދާ މީހުންނަށް އެއްވެސް ދަތިކަމެއްނެތި މިސްކިތްތަކަށް ވަދެނުކުމެ އުޅެވޭނެ މާހައުލެއް ގާއިމުކުރުމާއެކު، ނަމާދު ވަގުތުތަކުގައި ޓްރެފިކް ފްލޯ ބެލެހެއްޓުމަށްވެސް ޚައްޞަ މަސައްކަތްތަކެއް ފުލުހުން ކުރަމުން ދާނެއެވެ.
އެގޮތުން ހަދީބީ މިސްކިތް، އިސްކަންދަރު މިސްކިތް، ޒިޔާރަތް މިސްކިތް، ހުކުރު މިސްކިތް، އީދު މިސްކިތުގެ އިތުރުން އިބްރާހިމް މިސްކިތާއި، ޔޫސުފުލް ބަރްބަރީ މިސްކިތާއި، ސަމްސުއްދިން މިސްކިތާއި، ފުރުގާން މިސްކިތާއި، ނޫރު މިސްކިތް ހިމެނޭ ސަރަހައްދަށް ހަތަރު ފުރުޅުލީ އުޅަނދު ވަނުމަކީ މަނާކަމެއެވެ.
ފުލުހުން ވިދާޅުވީ މި ސަރަހައްދުތަކަށް ހަތަރު ފުރުޅުލީ އުޅަނދު ފަހަރު ވަނުން މަނާވާނީ ނަމާދު ފެށުމުގެ 5 މިނިޓް ކުރިން ފެށިގެން ނަމާދު ނިމެންދެން ކަމަށެއެވެ.
އެގޮތުން، ފުލުހުންނަށް ހުށަހެޅޭ ކުށްތަކުގެ އަދަދު މަދުކުރުމާއެކު ރައްޔިތުންނާ ގާތުން ޚިދުމަތް ދިނުމުގެ މަސައްކަތްކުރިއަށް ގެންދިޔުމާއި މާލެއާއި ބުރިޖު އަދި މާލެ-ހުޅުމާލެ ލިންކު ރޯޑުގައި އާންމުގޮތެއްގައި ދިމާވާ ޓްރެފިކް ބާރުބޮޑުވުން ކުޑަކުރުމަށް ހާއްސަ މަސައްކަތްތަކެއް ކުރުމަށްވަނީ ހަމަޖެހިފައެވެ.
ރޯދަ މަހުގައި ފުލުހުންގެ ޚާއްސަ އޮޕަރޭޝަނެއް ކުރިއަށް ގެންދާއިރު، މުޖުތަމަޢުގައި ކުށްތައް މަދުކުރުމަށްވެސް ޚާއްސަ ސަމާލުކަމެއް ދޭނެކަމަށް ފުލުހުން ވިދާޅުވިއެވެ. އެގޮތުން މީހުން ނަމާދަށް މިސްކިތްތަކަށް ދާ ވަގުތަކާއި، ހެނދުނުގެ ވަގުތުތަކާއި، ދަންވަރުގެ ވަގުތުތަކުގައި ވައްކަން ކުރާ މީހުންނާއި، އެނޫންވެސް ކުށްތަކަށް އަރައިގަންނަ މީހުންނަށް އެފުސަތު ނުދިނުމުމަށް މުޅި މާލޭގައި ފުލުހުން ހަރަކާތްތެރިވާނެކަމަށް ފުލުހުން ވިދާޅުވިއެވެ.
ހަމަ އެހެންމެ ބާޒާރުކުރުމަށާއި އެހެނިހެން ބޭނުންތަކުގައި އެއްވެސް ދަތިކަމެއްނެތި ހިނގާބިނގާވެ އުޅެވޭނެގޮތާއި ދަތުރުފަތުރު ކުރޭވެނޭހެން މަގުމަތި ތަރުތީބުކުރުމުގެ މަސައްކަތްކުރުމުގެ އިތުރުން، ދަތުރުވެރިންގެ މާރުކޭޓު ކައިރީގައި ޤަވާއިދާ ޚިލާފަށް ޕާކުކުރުން ހުއްޓުވުމަށްވެސް އެ ސަރަހައްދުގައި ފުލުހުން ހަރަކާތްތެރިވަމުން ދާނެކަމަށް ފުލުހުން ވިދާޅުވިއެވެ.
މީގެ އިތުރުން މާލޭގައި ބާޒާރު މަތީ ސަރަހައްދާއި، ސްކޫލުތަކާއި، ރައްޔިތުން އާންމުކޮށް އެންމެ ގިނައިން ބާޒާރު ކުރަން ނިކުމެ އުޅޭ ސަރަހައްދުތަކަށް ޚާއްސަ އިސްކަމެއް ދީގެން ޓްރެފިކް ކަންކަން ބަލަހައްޓާނެކަމަށްވެސް ފުލުހުން ވިދާޅުވިއެވެ.
ފުލުހުން ވިދާޅުވީ، ބޯޓު ފަހަރުތަކަށް މުދާ އަރުވައި ބޭލުމަށް މަޑުކޮށްގެން އޮންނަ އުޅަނދުތަކަށް އަވަސްކުރުމަށް އެންގުމާއި، ބާލާފައި ހުންނަ މުދާތައް އަވަހަށް އެތަނުން ހުސްކުރަން އެންގުމާއި، ބާޒާރުމަތީ ފިހާރަތަކަށް މުދާ އަރުވާ ބޭލުމަށް އަންނަ އުޅަނދުތައް އުތުރުފަޅީގައި މަޑުކުރަން އެންގުމުގެ އިތުރުން ޕޭވްމަންޓް އަދި ޕާކިން ޒޯނުތަކުގައި މީހުންނަށް ދަތިވާގޮތަށް ގަވާއިދާ ހިލާފަށް ބަހައްޓާފައި ހުންނަ މުދާތައް ނެގުމަށް އަންގަމުންދާނެކަމަށެވެ.
އަދި މާލެތެރޭގައި ހުރި އެކި މާރުކޭޓްތައް ކައިރީގައިވެސް ޓްރެފިކް ބެލެހެއްޓުމުގައި ފުލުހުން ހަރަކާތްތެރިވަމުން ދާނެއެވެ.
ފުލުހުން ވިދާޅުވީ ހަވީރުގެ ވަގުތުތަކަކީ ގިނަ އަދަދެއްގެ މީހުން މާލޭގެ މަގުތަކަށް ނުކުމެ އުޅޭ ވަގުތުތަކަކަށްވުމުން މާލޭގެ މަގުތަކާއި ބުރިޖު ހައިވޭގެ ޓްރެފިކަށް ހާއްސަ ސަމާލުކަމެއް ދީގެން ބަލަހައްޓަމުންދާނެކަމަށެއެވެ. އެގޮތުން، ބުރިޖާއި ހައިވޭގައި 24 ގަޑިއިރު ޓްރެފިކު ބެލެހެއްޓުމާއި ބުރިޖުގެ ހަތަރު ލޭން ބައްދަލުވާ ހިސާބުން ދުއްވާ އުޅަނދުތަކުގެ ސްޕީޑު މަޑުކުރުމަށްޓަކައި ބެރިކޭޑު ޖެހުމާއި، ދުވެލި މަޑުކުރުމަށާއި، ގަވާއިދާ ހިލާފުވާ ފަރާތްތައް މަދުކުރުމަށް ފުލުހުން ހަރަކާތްތެރިވަމުންދާނެއެވެ. އަދި ބަސް ސްޓޮޕްތައް ކައިރިވެސް ހާއްސަ ސަމާލުކަމެއް ދީގެން ފުލުހުން ބަލަހައްޓަމުންދާނެއެވެ.
ފުލުހުންގެ އަމާޒަކީ ރަމަޟާން މަހުގައިވެސް އަދި އެނޫން މަސްތަކުގައިވެސް އާންމު ރައްޔިތުންނަށް އަމާން ކަމާއި ރައްކާތެރިކަން ކަށަވަރުކޮށް ދިނުންކަމަށް ފުލުހުން ވިދާޅުވެއެވެ.