މިއަހަރުގެ ރަމަޟާންމަހާއި ޝައްވާލުމަހުގެ ފުރަތަމަ 7 ދުވަހު ބޭންކް އޮފް މޯލްޑިވްސް ހުޅުވާފައި ހުންނަ ގަޑިތައް ހާމަކޮށްފިއެވެ. ބީއެމްއެލްއިން ބުނީ މި ދުވަސްތަކުގައި ބޭންކުގެ ބްރާންޗްތަކާއި ސަރވިސް ސެންޓަރުތައް ހުޅުވާފައި ހުންނާނީ ހެނދުނު 9:30 އިން ފެށިގެން މެންދުރު 12:00 އަށްކަމަށެވެ.
ބޭންކް އޮފް މޯލްޑިވްސްއިން ބުނީ ރާއްޖޭން ބޭރަށް ފައިސާ ފޮނުވުން (ޓީޓީ) އާއި ބީއެމްއެލް ޗެކް ޕްރޮސެސް ކުރުން ޕޭ ރޯލް (މުވައްޒަފުންގެ މުސާރަ ޖަމާކޮށްދިނުން)، ލޯކަލް ޓްރާންސްފަރ އެންޑް ޕޭމަންޓްސް ހެނދުނު 11:00 ގެ ކުރިން ލިބޭ ހުށަހެޅުންތަކާއި ޖަމާކުރާ ޗެކްތައް އެދުވަހު ޕްރޮސެސް ކުރާނެކަމަށެވެ. އެހެން ބޭންކްތަކުގެ ޗެކް ޕްރޮސެސްވާނީ ހެނދުނު 09:00 ގެ ކުރިން ޖަމާކުރާ ޗެކްތައްކަމަށް ބީއެމްއެލްއިން ބުނެއެވެ.
މި ވަގުތުތަކުގެ ފަހުން ލިބޭ ރިކުއެސްޓް ޕްރޮސެސްކުރާނީ ދެން ބޭންކު ހުޅުވޭ ދުވަހެއްގައި ކަމަށް ބީއެމްއެލްއިން ވަނީ ބުނެފައެވެ. ބީއެމްއެލް އިންޓަރނެޓް ބޭންކިންގ އަދި މޮބައިލް އެޕް މެދުވެރިކޮށް ބޭންކިންގ ހިދުމަތްތައް ހޯއްދެވުމަށް ބީއެމްއެލްއިން ވަނީ ކަސްޓަމަރުންގެ ކިބައިން އެދިފައެވެ.
ރާއްޖޭގެ އެކި ކަންކޮޅުތަކުގައި ގާއިމްކޮށްފައިވާ ސެލްފް ސަރވިސް ބޭންކިންގ ސެންޓަރުތައް މެދުވެރިކޮށް ފައިސާ ޖަމާކުރުމާއި، ފައިސާ ނެގުމާއި ފައިސާ ފޮނުވުމުގެ ޚިދުމަތް 24 ގަޑިއިރު ލިބޭނެކަމަށް ބީއެމްއެލްއިން ބުނެއެވެ. މީހުން ދިރިއުޅޭ ރަށްތަކުގައި ގާއިމްކޮށްފައިވާ ކޭޝް އެޖެންޓުން މެދުވެރިކޮށް އަސާސީ ބޭންކިންގ ޚިދުމަތްތައްވެސް މިރަމަޟާންމަހު ކަސްޓަމަރުންނަށް ލިބިގެންދާނެއެވެ. އަދި ބޭންކުގެ ކޮންޓެކްޓް ސެންޓަރ މެދުވެރިކޮށް ކަސްޓަމަރުންނަށް ޚިދުމަތް ދެމުންދާނެ ކަމަށް އެ ބޭންކުން ބުނެއެވެ.