މޯލްޑިވްސް ލޭބަރ އެންޑް ސޯޝަލް ޑިމޮކްރެޓިކް ޕާޓީ (އެމް.އެލް.އެސް.ޑީ.ޕީ)، އަދި ދިވެހިރައްޔިތުންގެ ޕާޓީ (ޑީ.އާރު.ޕީ) އުވާލައިފިއެވެ.
ޑީއާރުޕީ އާއި ލޭބަރ ޕާޓީ އުވާލަން އިލެކްޝަންސް ކޮމިޝަނުން ނިންމެވީ، ޤާނޫނުގައި ބަޔާންކުރާ ޢަދަދަށް މެންބަރުން ހަމަނުވުމުންނެވެ. ސިޔާސީ ޕާޓީތަކުގެ ޤާނޫނުގައިވާ ގޮތުން ސިޔާސީ ޕާޓީއެއް ހިންގޭނީ އެ ޕާޓީއެއްގައި މަދުވެގެން 3000 މެމްބަރުން ހަމަވާނަމައެވެ.
އިލެކްޝަންސް ކޮމިޝަނުން ވިދާޅުވީ އެ ދެ ޕާޓީން ދަރަންޏަށް ޒިންމާވާނެ ފަރާތެއް އެންގުމަށް ދެވުނު މުއްދަތުގައި، ދަރަންޏަށް ޒިންމާވާނެ ފަރާތެއްވެސް އަންގާފައި ނުވާކަމަށެވެ. އެހެންކަމުން ސިޔާސީ ޕާޓީގެ ގަވާއިދުގެ ދަށުން އެދަރަންޏެއް އުފެދުނުއިރު ޕާޓީގެ އެންމެ އިސްފަރާތެއްގެ ގޮތުގައި ހުންނެވި ފަރާތަކީ ދަރަންޏަށް ޒިންމާވާނެ ފަރާތްކަމުގައި ކަނޑައަޅާފައިވާކަމަށްވެސް އިލެކްޝަންސްއިން ބުނެއެވެ.
ޑިއާރުޕީ އުވާލުމުގެ މަސައްކަތް އިލެކްޝަންސް ކޮމިޝަނުން ކުރަމުން ދަނިކޮށް ޕާޓީގެ ރައީސް ކަމުގައި ހުންނެވި ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ އިސްތިއުފާ ދެއްވާފައެވެ. އަދި އޭނާ ވަނީ ގްރީން ޕާޓީގެ ނަމުގައި އާ ސިޔާސީ ޕާޓީއެއް އުފެއްދުމުގެ މަސައްކަތް ފަށާފައެވެ. އިލެކްޝަނުން އުވާލަން ނިންމި ލޭބާ ޕާޓީއަކީ މަސައްކަތްތެރިންގެ ހައްގުގައި 2019 ވަނަ އަހަރު އުފެއްދި ޕާޓީއެކެވެ.
އިލެކްޝަންގެ ވެބްސައިޓުގައިވާ ގޮތުން މިދިޔަ މަހުގެ 21 ވަނަ ދުވަހާ ހަމައަށް ޑީއާރުޕީގައި ތިބީ 2242 މެމްބަރުންނެވެ. ލޭބަ ޕާޓީގައި ތިބީ 2556 މެމްބަރުންނެވެ.