އައި.ޖީ.އެމް.އެޗްގެ ލެބޯޓްރީގެ ޚިދުމަތް ވަގުތީގޮތުން މެދުކެނޑިފައިވާކަމަށް އިންދިރާގާނދީ މެމޯރިއަލް ހޮސްޕިޓަލް ވިދާޅުވެއްޖެއެވެ.
އައި.ޖީ.އެމް.އެޗްގެ ލެބޯޓްރީގެ ޚިދުމަތް މެދުކެނޑިފައިވަނީ ދަރުމަވަންތަ ހޮސްޕިޓަލުގެ ފެނުގެ ނިޒާމަށް ދިމާވި މައްސަލައަކާއި ގުޅިގެންކަމަށް އައިޖީއެމްޗުން ވަނީ ވިދާޅުވެއެވެ.
އައި.ޖީ.އެމް.އެޗްއިން ކުރި ޓްވީޓެއްގައި ވިދާޅުވެފައިވަނީ ދަރުމަވަންތަ ހޮސްޕިޓަލް ހުންނަ އިމާރާތުގެ ފެނުގެ ނިޒާމަށް ދިމާވި މައްސަލައަކާއި ގުޅިގެން އެ ހޮސްޕިޓަލުގެ ލެބޯޓްރީން ދެމުން ގެންދިޔަ ޚިދުމަތްތައް ވަގުތީގޮތުން މެދުކެނޑިފައިވާ ކަމަށެވެ.
ދަރުމަވަންތަ ހޮސްޕިޓަލްގެ ފެނުގެ ސިސްޓަމަށް ދިމާވި މައްސަލައަކާއި ގުޅިގެން، ލެބޯޓަރީގެ ޙިދުމަތް ވަގުތީ ގޮތުން ވަނީ ހުއްޓާލެވިފައިއެވެ. މިކަން ހައްލުކުރެވުނުހާ އަވަހަކަށް އިއުލާނު ކުރާނެވާހަކަ ދެންނެވީމެވެ. މިކަމުން ދިމާވެދާނެ ދަތިތަކަށް ނިހާޔަތަށް މަޢާފަށް އެދެމެވެ.
— IGMH (@igmhmv) March 9, 2023
ޕީ.އެސް.އެމް ނިއުސްއަށް މަޢުލޫމާތު ދެއްވަމުން އައި.ޖީ.އެމް.އެޗްގެ މީޑިއާ އޮފިޝަލް ވިދާޅުވީ، މިހާރު އައި.ޖީ.އެމް.އެޗްގައި އެޑްމިޓް ކުރެވިފައިވާ މީހުންގެ ޓެސްޓުތަށް ހެދުމުގެ މަސައްކަތް ހުޅުމާލެ ހޮސްޕިޓަލްއިން ކުރުމުގެ މަސައްކަތް ކުރަމުންދާކަމަށެވެ.
މިކަން ހައްލުކުރުމުގެ މަސައްކަތް މިވަގުތުވެސް ކުރަމުންދާކަމަށާއި، ނަމަވެސް މިކަން ހައްލުވާނެ ސީދާ ގަޑިއެއް އަދި ދަންނަވަން ދަތިކަމަށް އެ ހޮސްޕިޓަލުން ވިދާޅުވެއެވެ. އަދި މިކަން ހައްލުވިހާ އަވަހަކަށް އެ މަޢުލޫމާތު ހިއްސާކުރާނެކަމަށްވެސް އައި.ޖީ.އެމް.އެޗްއިން ވިދާޅުވެއެވެ.