ޒަކާތު ފައިސާ ބެހުމަށް ޝަރުއީ ގޮތުން ކަނޑައަޅާފައިވާ އުސޫލުން ބޭރުން ޒަކާތު ފަންޑުން ޚަރަދުކޮށްފައި ނުވާނެކަމަށް އިސްލާމިކް މިނިސްޓަރ ޑރ.އަހުމަދު ޒާހިރު ޢަލީ ވިދާޅުވެއްޖެއެވެ. މިނިސްޓަރ މިހެން ވިދާޅުވީ ޒަކާތު ފަންޑާއި ގުޅޭގޮތުން ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު ލިޔުމުން ޖަވާބު ހޯދުމަށް ކުރެއްވި ސުވާލުގެ ޖަވާބުގައެވެ.
މެންބަރު އިބްރާހީމް ރަޝީދުގެ ސުވާލުގައި ވަނީ ޒަކާތުގެ ފައިސާ އިސްލާމް ދީނުގައި ކަނޑައަޅުއްވާފައި ވަނީ އަށް ބަޔަށްކަމަށެވެ. ނަމަވެސް އެކިގޮތަކަށް އެ އަށް ބައިގެ ތެރެއިން ބައެއް ބައިބައި އެކިއެކި ކަންކަމަށް ޚަރަދުކުރެވޭ ގޮތަށް، ޒަކާތު ފަންޑުގެ ޚަރަދުތައް ބަހާފައި ހުންނަކަމުގެ މައުލޫމާތު ލިބި ވަޑައިގެންފައިވާތީ މިކަމުގެ ތަފްސީލް ހޯދުމަށް އޭނާ ވަނީ ސުވާލުގައި އެދިވަޑައިގެންފައެވެ.
މިސުވާލުގެ ޖަވާބުގައި އިސްލާމިކް މިނިސްޓަރ ވިދާޅުވީ ޒަކާތުގެ ފައިސާ ބެހުމަށް ޢަމުރު ކުރައްވާފައިވަނީ 8 ބަޔަށްކަމަށާއި، އޭގެ ބޭރުން އެ ފަންޑުން ފައިސާ ޚަރަދުކޮށްފައި ނުވާނެކަމަށެވެ. ޒަކާތުގެ ފައިސާ ބަހާ އަށް ބަޔަކީ، ފަޤީރުންނާއި، މިސްކީނުންނާއި، އާމިލުންނާއި، މުއައްލިފަތު ގުލޫބުހުމް އަދި ދަރަނިވެރިންނާއި، އިބުނުއްސަބީލުގެ އިތުރުން އަޅުން މިނިވަން ކުރުމަށެވެ.
ޒަކާތުގެ ފައިސާ ޚަރަދުކުރުމަށް ޚާއްޞަ އުސޫލްތަކެއްވެސް އިސްލާމިކް މިނިސްތޓްރީން ކަނޑައަޅަފައިވެއެވެ. އެގޮތުން ފަންޑަކީ ޒަކާތުގެ ގޮތުގައި ލިބޭ ފައިސާއިން ޔަތީމުންނާއި މިސްކީނުންނާއި ފަޤީރުންނަށް ބެހުމަށްފަހު ބާކީވާ ފައިސާ ޖަމާކުރާ ފަންޑެވެ. އަދި އެފަންޑުގައި ހުންނަ ފައިސާ ޚަރަދު ކުރަނީ ވަކި އުޞޫލެއްގެ ދަށުން ޒަކާތު ކޮމިޓީގެ ލަފަޔާ މަޝްވަރާގެ މަތިންނެވެ.
ޒަކާތު ފަންޑުން، ނިކަމެތިންނަށް އެހީތެރިވުމަށާއި، މުޖުތަމަޢުގައި ޙާލުގައި ޖެހިފައިތިބި މީހުންނަށް އެހީތެރިވުމަށާއި، ކިޔަވައިދިނުމަށާއި، ބޭސްފަރުވާއަށްވެސް ދަނީ އެހީތެރިކަން ފޯރުކޮށްދެމުންނެވެ.
މިދިޔަ އަހަރު މުދަލު ޒަކާތުގެ ގޮތުގައި 90މިލިއަނަށްވުރެ ގިނަ ރުފިޔާ ދައުލަތަށް ލިބިފައިވެއެވެ.