އިނގިރޭސިވިލާތުން ރާއްޖެއަށް ދޭ ސްކޯލާރޝިޕްގެ ޢަދަދު އިތުރުކުރުމަށް ނިންމައިފިއެވެ. ސްކޯލާރޝިޕްގެ ޢަދަދު އިތުރުކުރުމަށް ރާއްޖެއާއި އިނގިރޭސިވިލާތާ ދެމެދު ބޭއްވި ނިންމީ ސީނިއަރ އޮފިޝަލުންގެ ފެންވަރުގެ ފުރަތަމަ ސްޓްރެޓެޖިކް ޑައިލޮގްގައެވެ.
ރާއްޖެއާއި އިނގިރޭސިވިލާތާ ދެމެދު ބޭއްވެވި މަޝްވަރާތަކުގައި އިގްތިޞާދީ އަދި ވިޔަފާރީގެ އެއްބާރުލުން، ސަލާމަތީ އެއްބާރުލުން، ވެރިކަން، ޑިމޮކްރަސީ، އިންސާނީ ހައްގުތަކާއި ޤާނޫނީ ވެރިކަން، ތިމާވެށްޓާއި މޫސުމަށް އަންނަ ބަދަލުތަކާއި، މަތީ ތަޢުލީމާއި ވިސާއާއި އިމިގްރޭޝަން އަދި ސަރަޙައްދީ އަދި ބައިނަލްއަގްވާމީ އެއްބާރުލުން ހިމެނޭ ގޮތަށް މައުޟޫއީ ދާއިރާތަކަށް އަލިއަޅުވާލާފައިވެއެވެ. މި މަޝްވަރާތަކަށް ފަހު، ކަނޑުގެ ސަލާމަތާ ބެހޭ ގޮތުން މޯލްޑިވްސް-ޔޫކޭ ވޯކިން ގްރޫޕަކާއި ވިޔަފާރިއާ ބެހޭ ވޯކިން ގްރޫޕެއް އުފެއްދުމަށް ދެ ޤައުމުން ވަނީ އެއްބަސްވެފައެވެ. އަދި އިނގިރޭސިވިލާތުގެ ބްލޫ ޕްލެނެޓް ފަންޑުގެ ދަށުން އޯޝަން ކަންޓްރީ ޕާޓްނަޝިޕް ޕްރޮގްރާމް ރަސްމީކޮށް ކުރިއަށް ގެންދިއުމަށް އެއްބަސްވުމެއްގައި ވަނީ ސޮއިކޮށްފައެވެ.
މީގެ އިތުރުން ދެ ޤައުމުންވެސް، ބަދަހި ގުޅުމުގެ ދުވެލި ދެމެހެއްޓުމުގެ މުހިންމުކަން ގަބޫލުކޮށް، ސްޓްރެޓެޖިކް ޑައިލޮގް ފެށުމާއި، އެ މަޝްވަރާތައް އަހަރަކު އެއްފަހަރު ކުރިއަށް ގެންދިއުމަށްވެސް ދެޤައުމުން ވަނީ އެއްބަސްވެފައެވެ. ކޮމަންވެލްތު އެންޑް ސްމޯލް އައިލެންޑް ޑިވެލޮޕްމަންޓް ސްޓޭޓްސް (އެސްއައިޑީއެސް) ގެ އަގުހުރި ގައުމެއްގެ ގޮތުގައި ރާއްޖޭގެ މުހިންމުކަން އިނގިރޭސިވިލާތުން ދެނެގަނެ، ރާއްޖެ އާއި އިނގިރޭސިވިލާތުގެ ދެގައުމުގެ ގުޅުން އިތުރަށް ބަދަހިކުރެވޭނެ ގޮތްތައް ހޯދުމަށާއި، އިގްތިޞާދަށް ވެސް ފައިދާހުރި އަދި ކުރިއެރުވުމަށް ވިޔަފާރީގެ ފުރުޞަތުތައް ހޯދުމަށް ދެ ގައުމުން ވަނީ އެއްބަސްވެފައެވެ.
މީގެ އިތުރުން ދުނިޔޭގެ ގިނަ ހިސާބުތަކުގައި މާގިނައިން މަސްވެރިކަން ކުރުމުން ކަނޑުގެ އާބާދީއަށާއި، އިކޯސިސްޓަމަށް ކުރާ އަސަރު ގަބޫލުކޮށް، ކަނޑުގެ މުހިންމު ވަސީލަތްތައް ހިމާޔަތް ކުރުމަށް ދެމެހެއްޓެނިވި މަސްވެރިކަން ކުރިއެރުވުމަށް ރާއްޖެއާއި އާއި އިނގިރޭސިވިލާތުން މި މަޝްވަރާތަކުގައި ވަނީ އެއްބަސްވެފައެވެ. އަދި ދެޤައުމުން ވަނީ ރިޕޯޓް ނުކުރާ އަދި ގަވާއިދާ ހިލާފަށް ކުރާ މަސްވެރިކަމާ ދެކޮޅަށް ދުނިޔޭގެ ފެންވަރުގައި ކުރަމުންދާ މަސައްކަތްތަކުގައި ގުޅިގެން މަސައްކަތްކުރުމަށްވެސް މަޝްވަރާކޮށްފައެވެ. މި ގޮތުން ދެމެހެއްޓެނިވި މަސްވެރިކަމުގެ ވިޔަފާރީގެ ގުޅުން އިތުރަށް ކުރިއެރުވާ، މަސައްކަތްތައް އާކުރުމަށް އިނގިރޭސިވިލާތާއި ރާއްޖެއިން ވަނީ އެއްބަސްވެއްޖެއެވެ.
ދެ ޤައުމުން ވަނީ، ތައުލީމީ ދާއިރާގައި އެއްބާރުލުން ހަރުދަނާ ކުރުމަށްޓަކައި ކޮމަންވެލްތު އަދި ޗެވަނިން ސްކޮލަޝިޕް މެދުވެރިކޮށް ދިވެހިނަށް ފޯރުކޮށްދޭ ފުރުސަތުތަކުގެ މައްޗަށް ބިނާކޮށް ކުރިއަށް ދިއުމުގެ މުހިންމުކަން ފާހަގަކޮށްފައެވެ. އަދި ރާއްޖެއާއި އިނގިރޭސިވިލާތުން، މިނިސްޓްރީ އޮފް ހަޔަރ އެޑިއުކޭޝަން އޮފް މޯލްޑިވްސްއާ ގުޅިގެން، ދޭ ސްކޮލަޝިޕްގެ އަދަދު އިތުރުކުރުމަށްވެސް ދެގައުމުން ވަނީ އެއްބަސް ވެފައެވެ. އަދި އިނގިރޭސިވިލާތުގައި ކިޔަވަމުންދާ ރާއްޖޭގެ ދަރިވަރުންނަށް ވިސާގެ ޕްރޮސެސްއަށް ސަޕޯޓް ދިނުމާ ގުޅޭ ގޮތުން ވެސް ވަނީ މަޝްވަރާ ކޮށްފައެވެ.
މީގެ އިތުރުން އިނގިރޭސިވިލާތުން ރާއްޖެއަށް ޒިޔާރަތްކުރާ މީހުން އަންނަ މިންވަރު އިތުރުކުރުމާއި، ލޯކަލް ފެންވަރުގައި އެއްބާރުލުން ހަރުދަނާކުރުމާއި، ސަގާފީ އެއްބާރުލުން ކުރިއެރުވުމާއި، ދެގައުމުގެ މެދުގައި އެކުވެރި ބަދަލުކުރުންތައް ކުރިއަށް ގެންދިއުމަށް ވައުދުވެފައިވާކަން އެ ބައްދަލުވުމުގައި ވަނީ ހާމަކޮށްފައެވެ.
ރާއްޖެއާއި އިނގިރޭސިވިލާތުން ވެސް ވަނީ ޓެރަރިޒަމާ ދެކޮޅަށް މަސައްކަތްކުރުމާއި، އަނިޔާވެރި ހަރުކަށި ފިކުރު ހުއްޓުވުމުގައި އެއްބާރުލުން ދިނުމުގެ މުހިންމުކަމަށް އަލިއަޅުވާލާފައެވެ. ރާއްޖެއިން ވަނީ ނޭޝަނަލް އެކްޝަން ޕްލޭން އޮން ޕްރިވެންޓިންގ އެންޑް ކައުންޓަރ ވައިލެންޓް އެކްސްޓްރީމިޒަމް ތަންފީޒުކުރުމުގައި ލިބިފައިވާ ކުރިއެރުންތައް ހިއްސާކޮށް، މެރިޓައިމް ސެކިއުރިޓީ އަދި ޑޮމެއިން އެވޭރެންސް، ޑިފެންސް ކޯޕަރޭޝަން، އިންޓައޭޖެންސީ އޮޕަރޭބިލިޓީ ފޯ އެޓޭކް-ރެސްޕޮންސް އަދި ކާމިޔާބު ކައުންޓަރ ޓެރަރިޒަމް ޕްރޮސެކިއުޝަންތައް ފޯރުކޮށްދިނުމުގައި ސަލާމަތީ ގޮތުން ދަތިތަކާއި އިސްކަންދޭ ދާއިރާތައް ހައްލުކޮށްފައެވެ.
ޖޮއިންޓް އިންޓައޭޖެންސީ އޮޕަރޭޝަންސް ސެންޓަރު (ޖީއައިއޯސީ) އަށް ފަންނީ އެހީތެރިކަން ފޯރުކޮށްދިނުމާއި، ކައުންޓަރ ޓެރަރިޒަމް ލައިވް އެކްސަސައިޒްތަކާއި ތަމްރީނުތަކުގެ ތެރެއިން އިނގިރޭސިވިލާތުން މެދުނުކެނޑި ދެމުންދާ އެހީތެރިކަމަށް ރާއްޖެއިން ޝުކުރު އަދާކުރިއެވެ. މިހާރު އޮތް ޕާޓްނަޝިޕް ފުޅާކުރުމަށްވެސް ދެ ގައުމުން ވެސް ވަނީ އެއްބަސްވެފައިވެއެވެ.
ރާއްޖެއާއި އިނގިރޭސިވިލާތާ ދެމެދު ބޭއްވި މަޝްވަރާތަކުގައި ރާއްޖޭގެ ފަރާތުން އިސްކޮށް ހުންނެވީ ފޮރިން މިނިސްޓްރީގެ ސެކްރެޓަރީ ބައިލެޓަރަލް ޑރ.ހަލާ ހަމީދެވެ. އަދި އިނގިރޭސިވިލާތުން މި މަޝްވަރާތައް އިސްކޮށް ހުންނެވީ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީހުގެ އިންޑިއާ އެންޑް އިންޑިއަން އޯޝަން ޑިރެކްޓަރޭޓްގެ ޑިރެކްޓަރު ބެން މެލޯރއެވެ.