ތާރައާއެކު ދިވެހިން ތައްޔާރު ކުރި ފުރަތަމަ ދީނީ މަދަހަ އަލްބަމް ރިލީޒްކޮށްފިއެވެ.
ދީނީ ނަސޭހަތާއި ކައިވެނީ އިރުޝާދުތައް ހިމެނޭ 16 މަދަހަ އެކުލެވޭ "ކައިވެނި" މި އަލްބަމަކީ ކައިވެނި ހަފުލާތަކުގައި ބޭނުންކުރުމަށް ހާއްސަކޮށް އަލީ ޒައިދު ކޮމްޕޯޒްކޮށް ތައްޔާރުކޮށްފައިވާ އެ އަލްބަމެކެވެ.
މެންހެޓަން ބިޒްނަސް ހޮޓެލުގައި އޮތް ހާއްސަ ރަސްމިއްޔާތެއްގައި މި އަލްބަމް ރިލީސް ކޮށްދިނީ އިސްލާމިކް މިނިސްޓަރު، އަލީ ޒާހިރެވެ.
" ކައިވެނި" މި އަލްބަމް ނެރުމުގެ މައިގަނޑު މަގްސަދަކީ ކައިވެނި ހަފްލާތައް އިސްލާމީ ނަޒަރިއްޔާއިން ފަޅުފިލުވާދިނުމެވެ. މީގެ އިތުރުން ދެމަފިރިއްނަށް ކައިވެނީގެ މަރުހަބާ ކިޔުމާއި ކައިވެނީގެ މަތީގައި ސާބިތުވެ ތިބުމަށް ނަސޭހަތް ދިނުން ހިމެނޭކަމަށް ޒައިދު ވަނީ ބުނެފައެވެ.
ރާއްޖޭގައި ފާހަގަކޮށްލެވޭ މަޝްހޫރު ލަވަކިޔުންތެރިން ވަނީ މި އަލްބަމްގެ މަދަހަތައް ކިޔައިފައެވެ.
އޭގެ ތެރޭގައި މޯލްޑިވިއަން އައިޑަލްއިން ވިދާލި ޝަލަބީ އިބްރާހީމް މުހައްމަދު އަބްދުލް ޢަނީ (ތޭރަވާ)، އިބްރާހީމް ޒައިދު އަލީ (ކުޑައިއްބެ) ހުސައިން އަލީ ހިމެނެއެވެ.
މީގެ އިތުރުން ޓިކްޓޮކުން އާންމުގެ ތެރޭގައި މަގުބޫލުކަން ހޯދި ޝެއިހް އިބްރާހިމް ފަރީދުގެ ދަރިފުޅު، އަބްދުﷲ ފަރީދުވެސް ހިމެނެއެވެ.
ކައިވެނި މި އަލްބަމްގެ މަދަހަތައް މިހާރު ޔޫޓިއުބް މެދުވެރިކޮށް އަޑު އަހާލެވޭނެއެވެ.