މާޒީގައި އެކި ސަރުކާރުތަކުން ގެންގުޅުނު ތަފާތުކުރުމާއި، އަމިއްލަ އެތައް މަސްލަހަތެއް މިސަރުކާރުން ދޫކޮށް، ހަމަޖެހުން ގާއިމް ކުރުމަށް ކުރެވުނު މަސައްކަތުގެ ނަތީޖާ ފެންނަމުންދާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. މިއަހަރަށް މަޖިލިސް ހުޅުވުމަށް ބޭއްވި ޖަލްސާގައި ޤައުމުގެ ހާލަތަކާއި ގުޅޭގޮތުން އިއްވެވި ރިޔާސީ ބަޔާނުގައި ރައީސުލްޖުމްހޫރިއްޔާ ވަނީ އެމަނިކުފާނުގެ ވެރިކަމުގެ 4 އަހަރުގައި ކުރެވުނު މަސައްކަތާއި ހޯދުނު ކާމިޔާބީތަކަށްވެސް އަލި އަޅުވާލާފައެވެ. އެމަނިކުފާނު ވިދާޅުވީ، ކުރިންނެތް އެތަށް ހަމަޖެހުމަކާ، މަޞްލަޙަތެއް އިޢާދަކުރެވި، ހިފެހެއްޓި ދެމެހެއްޓިފައިވާކަމަށެވެ.
ސަރުކާރާއި ހަވާލުވެވަޑައިގަތުމަށްފަހި އެންމެބޮޑު އިސްކަމެއްދެއްވީ އެންމެ ބޭނުން ޖެހިފައިވާ ކަންކަމަށް އިސްކަންދީގެން، ޤައުމުގެ ހަމަޖެހުމާއި އަމަންއަމާންކަން ގާއިމުކުރުމަށްކަމަށް ރައީސް ވިދާޅުވިއެވެ. ގައުމުގެ ހަމަޖެހުން ގާއިމުކުރުމުގައި އަޑުއެހުމާއި، މަޝްވަރާކުރުމާއި ދޫދޭންޖެހޭ ހާލަތުގައި ދޫދީގެން ކަންކަން ކުރުމަކީ ސަރުކާރުގެ ސިޔާސަތުކަމަށް އެމަނިކުފާނު ވިދާޅުވިއެވެ. މިމަގުން ކުރެވުނު މަސައްކަތްތަކުގެ ނަތީޖާއަކީ މިވޭތުވެދިޔަ ހަތަރު އަހަރަކީ ހުރިހާ ގޮތަކުންވެސް ޤައުމުގެ ހަމަޖެހުމާއި ކުރިއެރުން ގެނެވުނު ހަތަރު އަހަރުގެ ގޮތުގައި ރައީސް ސިފަކުރެއްވިއެވެ.
"ރާއްޖޭގެ ވެރިކަމުގެ މަސްއޫލިއްޔަތާ މިއަދު ޙަވާލުވެވެނީ ތަޞައްވުރެއް އޮވެ، ވަޢުދުވެ، ވީވަޢުދު ފުއްދުމުގެ މައްޗަށް. އެންމެ ބޭނުންޖެހިފައިވާ ކަންކަމަށް، އެންމެ ބޮޑު އިސްކަން ސަރުކާރުން ދީގެން. ގައުމުގެ ހަމަޖެހުމާ ޢާންމު މަޞްލަޙަތާ އަމާންކަން ގެއްލިފައިވާނަމަ، އެންމެ ފުރަތަމަ ސަރުކާރުން އިޢާދަ ކުރަންޖެހޭނީ އެކަންކަން. އެކަންކުރެވޭނީ، އަޑުއެހުމާ، މަޝްވަރާއާ، ދޫދިނުމާ އަދި ހިފަހައްޓަންޖެހޭ އިންތަކާ މިންތަކުގާ ސަރުކާރު ސާބިތުވެ ދެމިއޮވެގެން." ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.
ސަރުކާރުން ރައްޔިތުންނަށް ޚިދުމަތް ދެއްވުމުގައި ވަކި ރަށެއް ވަކި އަތޮޅެއް އަދި ވަކި ރައްޔިތެއް ތަފާތުކުރުމެއް ނެތި ފާއިތުވި ހަތަހަރު އަހަރު ޚިދުމަތް ދެއްވާފައިވާނެކަމަށް ރައީސް ވިދާޅުވިއެވެ. ރައްޔިތުންނަށް ބޭނުންވާ ހައްގުތައް ކަށަވަރުކޮށް ދިނުމުގައި ސަރުކާރުގެ ކުރިމަތީގައި ކޮންމެ ރައްޔިތަކުވެސް ވާނީ ހަމަހަމަ ރައްޔިތަކަށް ކަމަށް އެމަނިކުފާނު ވިދާޅުވިއެވެ.
"ސަރުކާރަށް ހައްތާވެސް ތިބޭނީ ހަމަހަމަ ދިވެހިރައްޔިތުން. އަދާކުރަން ޖެހޭ ޙައްގުތަކާ، އުފުލަން ޖެހޭ މަސްއޫލިއްޔަތާ، ދޭންޖެހޭ ޚިދުމަތުގާ، ކޮންމެ ރައްޔިތަކީ ވެސް ސަރުކާރުގެ ކުރިމަތީގާ ގަދަރުވެރި ދިވެހިރައްޔިތެއް." ރައީސުލްޖުމްހޫރިއްޔާ ވިދާޅުވިއެވެ.
މިސަރުކާރުން ރައްޔިތުންނަށް ޚިދުމަތްދޭން ފެށި ފުރަތަމަ ދުވަހުން ފެށިގެންވެސް މަސައްކަތް ކުރަމުން ދިޔައީ ސިޔާސަތުގެ ތަފާތެއްނެތި އަމާޒެއް އޮވެގެން ކަމަށް ރައީސް ވިދާޅުވިއެވެ. ރައްޔިތުންނަށް އުންމީދާއި ކުރިއެރުން ގެނުވާނެ ބަދަލަކީ އޭގެ ސަބަބުން ޒަމާންތަކަކަށް އޭގެ ހެޔޮބަދަލު ކުރުވާނެ ކަންތައްތަކެއްކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މާޒީގައި އެކި ސަރުކާރުތަކުން ގެންގުޅުނު ތަފާތުކުރުމާއި، އަމިއްލަ އެތައް މަސްލަހަތެއް މިސަރުކާރުން ދޫކޮށްލާފައިވާކަމަށެވެ. އެކަންކަން ސަރުކާރުން ދޫކޮށް ހަމަޖެހުން ގާއިމް ކުރުމަށް ކުރެވުނު މަސައްކަތުން އޭގެ ނަތީޖާ މިއަދު ފެނިގެންދާކަމަށް ރައީސް ވިދާޅުވިއެވެ.